И йикъара чун Сулейман-Стальский райондин ОВД-дин патав гвай силисдин отделдин начальник (и везифаяр ада 2008-йисалай тамамарзава) юстициядин майор Р. Гь. Абукаровахъ галаз гуьруьшмиш хьана ва адавай кIвалахдихъ галаз алакъалу са шумуд суалдиз жаваб гун тIалабна.
- Ражидин Гьажирамазанович, сифтедай чаз Куьне отделдин везифайрикай ва анин работникрикай куьрелди лагьанайтIа кIанзавай.
- Везифайрикай рахайтIа, абурукай отделдин тIварцIи вичи лугьузва: силис тухун. Яни чи работникри тахсиркарвал авур ва я тахсиркарвал авунай шак физвай инсанривай силис тухузва, тахсиркарвал авунани, авуначни чирзава, гьакъикъат дуьздал акъудзава. Эгер тахсиркарвал авунвайди тестикь хьайитIа, герек документар гьазурзава, абур прокуратурадал агакьарзава.
Работникрикай рахайтIа, чи отделда 6 касди кIвалахзава. Старший силисчи юстициядин майор Эседулаев Арсен Эседулаевичан, юстициядин майор Герейханов Садилагь Тагьировичан, юстициядин старший лейтенант Гьайдаров Ильяс Гьайдаровичан кIвалахдилай зун гзаф рази я.
- КIвалах гзаф авани? Санлай къачурла, гьи рекьерай тахсиркарвилер гзаф жезва?
- Гьелбетда, кIвалахни тIимил туш. Тахсиркарвилерикай рахайтIа, кIвалерай шейэр чуьнуьхзавай дуьшуьшар гзаф я. Йисан сифтедилай и рекьяй 25 дело ава. Тек са вацран къене чи отделдин работникар килигай 9 делодикай 6 кIвалер атIунихъ галаз алакъалубур я.
- Жаванрин, яни яш тамам тахьанвайбурун патай тарсиркарвилер жезвани?
- Гьайиф къведай кар ятIани, эхь лугьуниз мажбур жезва. Мисал яз, ЦIийи хуьряй тир 14 йисни тахьанвай Агьмедова 3 сеферда масабурун кIвалерай шейэр чуьнуьхна.
Алатай йисан эхирра Кьиблепатан Сухокумск шегьердин агьали тир 1994-йисуз дидедиз хьайи Г. Гьасанагъаева, виликамаз яш бегьем тахьанвай Э. Эседовахъ галаз масадан шейэр чуьнуьхунин патахъай меслят хьана, Кьулан СтIалдал алай Р. Алисееван туьквендай 2500 манат пул, «Винстон» пIапIрусрин 3, «Золотая ява» пIапIрусрин 6 ва «Красная ява» пIапIрусрин 2 блок чуьнуьхна. Идалди абуру РФ-дин УК-дин 158-статьядин 2-частунин «А. Б. В» пунктарай тахсиркарвал авуна. Ихьтин мисалар мадни гъиз жеда.
- Ражидин Гьажирамазанович, Куь фикирдалди, жаванрин патай тахсиркарвилер гзаф хьун квелай аслу я?
- Себебар садни-кьвед авач. Мисал яз, диде-бубайрин патай аялрал бес кьадар гуьзчивал алач. 10-14 йисан яшара авай аялар йифен геждалди куьчейра жезва. Диде-бубади и кардиз манийвал тавурла, абуру пIапIрусар чIугвазва, ички хъвазва, тахсиркарвилер ийизва.
Жаванрин патай тахсиркарвилер гзаф хьунин тахсир школайрин хивени ава. Школьникрин патай тахсиркарвилер хьайила, чна гьа школадиз ва РУО-диз представленияр рахкурзава. Гьайиф хьи, абуру са серенжемни кьабулзавач. Мисал яз, РУО-диз 3 представление рекье туна. Са жавабни хьанач.
Гьелбетда, тахсиркарвилер хьун хъсан кар туш. Иллаки яш тамам тахьанвайбурун патай. Гьич садани фикир тавурай хьи, милициядин работникрин кIвалах тахсиркарвал авурди кьуна дустагъда ацукьарун я лагьана. Туш. Къайдаяр хуьдай органрин работникри тахсиркарвилер тахьун патал агьалийрихъ галаз профилактикадин еке кIвалах тухузвайди я. Кьилди чи отделдикай рахайтIа, чна участковый инспекторрихъ, хуьрерин поселенийрин кьилерихъ, райадминистрациядин патав гвай яш тамам тахьанвайбурухъ галаз кIвалахдай комиссиядихъ ва талукь маса къуллугърихъ галаз сих алакъада аваз кIвалахзавайди я.
Умудзава, гележегда ида хъсан нетижа гуда, агьалийрин патай законар чIурунар, тахсиркарвилер тIимил жеда.