Цавун тагъдал нур гузвай гъетерин ишигъ сад туш. Садбуру къати ишигъ гуда, муькуьбуру- зайиф. Гьавиляй бязи гъетер муькуьбурукай хкатна аквада: абурал инсанар ашукь жеда, а ишигълу гъетерихъ галаз инсанри чпин кьадар-кьисмет сад ийиз алахъда, гьатта чпин веледрални а гъетерин тIварар эцигда.
Лезги литературадин экуь, нурлу гъед тир РФ-дин писателрин ва журналистрин союзрин член, ДР- дин культурадин лайихлу работник Абдулбари Магьмудован 80 йис тамам хьанва . Яшар хьанватIани, ада вичин къелемдиз къуьруь жедай мажал вугузвач, халкьдин вилик цIийи- цIийи «бегьерар» гъизва. ИкI, мукьвара Махачкъалада «Мавел» ООО- дин издательствода А.Магьмудован «Зи уьмуьрдин цIарар» тIвар алаз цIийи ктаб чапдай акъатна. Ада машгьур зариди межлисрал авур рахунар, вичикай газетриз акъатай макъалаяр, кагъазрай ва газетрай къачунвай цIарар, бахш- бендер, шаржар, организацийрин, коллективрин патай тебрикар, гьуьрметлу грамотаяр, шикилар гьатнава.
120 чиникай, 7,5 печатдин шартIунин листиникай ибарат тир ктабдин тираж 500 экземпляр я.
…ВацIуз акъвазун хас туш. Гьамиша гьерекатдик квай дагъдин гурлу ва такабурлу вацIу хьиз, чи бажарагълу писатель А.Магьмудовани виликди еримишзава, вичин яратмишунрин рехъ давамзава. Ам мадни бегьерлуди ва яргъиди хьурай!