8-июндиз Россиядин Федерациядин социальный къуллугърин работникри чпин пешекарвилин сувар 10-сеферда къейдда. Алай аямдин шартIара социальный кIвалах – им тек са пеше туш, им куьмек кIанзавай гьар са касдив дикъетлудаказ, къайгъударвилелди эгечIзавай агъзурралди инсанрин яшайишдин къайдани я.
Россияда социальный кIвалахдихъ девлетлу тарих ава. ИкI, гьеле Петрди губернийра чка-чкада кIанзавай ксар кьабулдай кIвалер тешкилун ва инвалидриз монастырра чка гунин патахъай къайгъударвал авун истемишнай.
Йисар, вахтар къвез алатна. Уьлкведа социальный къуллугъдин тIварар, къурулуш, кIвалахдин жуьреяр ва къайдаярни дегиш хьана. Амма и къуллугъ игьтияж авай ватанэгьлийриз куьмек гунин барадай чпин хиве авай асул везифайриз гьамиша вафалу яз амукьна.
Лагьана кIанда хьи, санлай Россияда хьиз, Дагъустан Республикадани социальный жигьетдай къуллугъ авунин месэлайрал машгъул жезвай идарайрин сетни гегьенш жезва. ИкI, шегьеррани районра агьалийриз социальный жигьетдай къуллугъдай центраяр, отделенияр, гьакIни кIвалера социальный, медицинадин жигьетдай къуллугъдай махсус отделенияр тешкилнава.
Ватандин ЧIехи дяведин иштиракчийрин, чпивай чпихъ гелкъвез тежезмай ва я чпихъ гелкъуьнин мумкинвиликай са кьадар дережеда магьрум хьанвай инсанрин, етим, набуд аялрин гьакъиндай социальный къуллугъри кьетIен къайгъударвал ийизва.
Гьакъикъатдани, социальный къуллугърин работникрин зегьмет герекди я. Гьавиляй абуруз обществода еке къиметни гузва.
