Алатай 2009-йис чи райондин яратмишдай интеллигенциядин векилар патал бегьерлуди хьана.
ИкI, и йисуз Дагъустандин халкьдин ша-ир СтIал Сулейманан 140 йис тамам хьунин юбилейдихъ галаз алакъалу яз лезги писателрин Союздин райотделенидин бюроди «Куьредин ярар» медениятдин макандин комитетдихъ галаз санал чIехи шаирдин вичин, Гьамзат ЦIадасади адаз бахшна кхьенвай, гьакIни райондин яратмишдай интеллигенциядин векилар тир 27 касдин бахш шиирар авай «Илгьамдин чешме» кIватIал гьазурна, райондин «Куьредин хабарар» газетдин типографияда 200 экземплярдин кьадарда аваз чапдай акъудна.
2009-йисуз чпин хсуси такьатрин гьисабдай «Мавел» ООО-дин типографияда 500 экземплярдин кьадарда аваз шаирар тир Мирземет Салманован «Кьве вил», Вадим Жамалдинован «Гъетягърин булахар», Саиратан «Рубаияр» ктабар чапдай акъудна.
И йисуз «Куьредин ярар» медениятдин макандин компьютердин базадин бинедаллаз шаирар тир Дашдемир Адилован «Ша, лезгияр!», Абидин Камилован «Руьгьдин гуьзгуь», (шииррин кIватIал), «Машгьурвилин суракьда» (къаравилийрин таж), гьакIни алай йисакай алатнавай куьруь са вахтунда журналист Райсудин Набиеван «Зи хайи хуьр» (Курхуьруьн тарих) ктабар чапдай акъудна. КIелзавайбурал гьакI шаир ва журналист Шагьабудин Шабатован аялар патал урус чIалалди кхьенвай «Дети аула» шииррин гъвечIи ктабни агакьнава. Адан мад кьве ктаб - «Рекьерин къейдер» ва «И я хочу оставить след» чапдай акъудиз «Даггизда» ава.
Алай вахтунда «Куьредин ярар» медениятдин макандин 20 йис тамам хьуниз талукьарна чи райондин яратмишдай интеллигенциядин векилрин эсерар авай кIватIал чапдиз гьазурзава.
2010-йисан 29-декабрдин сятдин 11-даз Кьасумхуьруьн Культурадин Дворецда "Куьредин ярар" медениятдин макан тешкил хьайидлай инихъ 20 йис тамам хьуниз талукьарнавай яратмишдай интеллигенциядин юбилейный ч1ехи мярекат кьиле фида.