Испикрин фельдшервилинни акушервилин пунктуна чпихъ махсус пешекарвилин образование авай 3 касди кIвалах-зава. Абуру хуьре яшамиш жезвай 509 касдиз медицинадин рекьяй къуллугъзава.
Хъсандиз кIвалахзавай, вичин хиве авай везифаяр намуслудаказ кьилиз акъудзавай духтуррикай яз хуьруьнвийри чаз акушерка Гьабибулаева Ритадин тIвар кьуна.
Малум хьайивал, Р. Гьабибулаева кIвалахдин гзаф йисарин тежриба авай, пешедал рикI алай духтур я. 1977-йисуз Дагъустандин медицинадин училище акьалтIарайдалай гуьгъуьниз ада Дар-кIушрин амбулаторияда, ЦРБ-да инфекционный ва «Тади куьмек» отделенийра медсестравиле кIвалахна. 1989-йисалай инихъ Ритади, чна винидихъ лагьайвал, Испикрин ФАП-да акушерка яз кIвалах-зава.
- Хуьруьн агьалийрикай 278 дишегьлияр, абурукайни 139 аял хадай яшара авайбур я, - лугьузва Р. Гьабибулаевади. – Абурун гьакъиндай чна къайгъударвални ийизва. Идалайни гъейри, алай вахтунда чи учетда аялдик квай 6 дишегьлини ава. Абур чи гьар йикъан гуьзчивилик ква.
Р. Гьабибулаевади чаз лагьайвал, «Сагъламвал» милли проект уьмуьрдиз кечирмишун себеб яз мукьвара ФАП-да акушервилин кабинет ачухна, анаг хъсандиз тадаракламишна. Ида духтурдиз-акушеркадиз кIвалах авунин рекьяй еке регьятвал яратмишна.
Чаз малум хьайивал эхиримжи йисара хуьре аялар ва аялдик квай дишегьлияр кьейи дуьшуьшар хьанвач. Идак, гьелбетда, Р. Гьабибулаевадин зегьметдин пайни ква.
