ДуркIунра къванер авайла, агъадихъ галай рецептдикай менфят къачуда. Гатун халидин са стакандавай цилер къавурмишна, як регъведай машиндай авадарна, 2 литрдин баллондиз вегьена, ргазвай яд илична, са суткада тада. Ахпа 10 юкъуз йикъа 3-4 стакандавайди хъвада. ЦIуд юкъ¬уз ял яна, мад тикрар хъийида.
***
Бедендик цIарнах квайла, хуьрекдин са тIурунавай паркьулдин ва некIед хъчарин дувулрал нянихъ 3 стакандавай яд илична, пакамалди тада. Ахпа ам ругана, са сятда къурда. Куьз¬на, йикъа пуд сеферда стакандин кьатIа авайди хъвада.
***
Азардиз акси къуват (имму¬нитет) хкажун патал кьурурнавай лаврдин 10 пешинал са ста¬кан яд илична, 5 декьикьада ругуна, 4 сятда тада. Ахпа ам куьзна, фу недалди вилик йикъа пуд-кьуд сеферда са тIурунавайди ишлемишда.
***
Инияр рикI тIазвайбур патал гзаф хийирлу я.
30 ини цилерни кваз куьлуь авуна, са стакан ргазвай яд илична, 10 декьикьада зайиф цIал ргада. Ахпа и къаришма, куьлуь-куьлуь хупIар ийиз, са юкъуз хъвана куьтягьда. Ихьтин настойкади тIазвай рикIиз лап хъсан таъсирда.
***
Вилерин, кьилин мефтIедин давление авайла, ихьтин рецептдикай менфят къачуда:
хуьрекдин кьуд тIурунавай мегъуьн тарцин чкалрал 1 литр ргаз¬вай яд илична, са суткада тада. Ахпа пуд къат жунадай куьзна, йикъа пуд сеферда фу нез зур сят амаз хуьрекдин пуд тIурунавайди ишлемишда. Сагъарунин вахт 2 гьафте я.
***
Зигьин хъсанарун патал, 200 грамм кудай таза вергер баллондиз вегьена, 0,5 л. эрекь илична, сив жунадалди кутIунна, са суткада пенжердал, ахпа 8 суткада мичIи шкафда эцигда.
Къаришма куьзна, мичIи ран¬гунин бутылкадиз цана, фу нез 30 декьикьа амайла, хуьрекдин са тIурунавайди ишлемишда. ***
Нера чIахачIах (гайморит) авайла, йикъа са шумуд сеферда шуьшедай, я тахьайтIа, яйлухдал са шумуд стIал пихтадин гъери вегьена, ни чIугвада.
***
Са килограмм чIухлумпIар (калина) регъвена, адак 1 кг. вирт ва 0,5 л. коньяк хъсандиз какадарна, 3 литрдин баллондиз цана, са вацран вахтунда мичIи чкада эцигда. Ара-ара банка юзурда. Са вацралай и дарман гьазур жеда.
Ам фу недай вахтунда са тIурунавайди ишлемишда. Са кьве гьафтедилай куьне регьят хьанвайди гьиссда. Давление къайдадик акатда, дуркIунра авай къум авахьда, хуквадинни ратарин кIвалахни къайдадик акатда.
Бронхрин астма авайла, чугъундурдин, чIулав турпунин, лимондин, клюквадин, чичIекдин мижеяр (вири сад хьтин паяр) ва вирт какадарна, йикъа 3-4 сеферда фу нез зур сят амай¬ла хуьрекдин 1-2 тIурунавайди 2 вацран вахтунда ишлемишун меслят къалурзава.
