Ватандин ЧIехи дяведиз Курхуьрелай 220 касдихъ агакьна жегьилар фена.Абурун арадай 9 кас муаллимар тир. 100-далай виниз агьалийри зегьметдин фронтда иштиракна.
Хуьруьнвийри «Вири фронт патал, вири гъалибвал патал!» лозунгдик кваз гьам фронтда,гьам зегьметда кьегьалвилер къалуруналди Гъалибвилин югъ мукьва авуна.
«Дагъустандин правда» газетда ихьтин цIарар ава: «Курхуьруьн Сталинан тIварунихъ галай колхоздин колхозчийри Советрин Союздин Игит Валентин Эмирован тIварунихъ галай самолетрин эскадрилья эцигун патал 340 агъзур манат,60 пут къуьл,30 пут як вахканва». Муаллимрин коллективдини, 450 манат и фондуниз вахкуналди чпин пайни кутуна.
Зегьметдин фронтда активвал къалурай-муаллимрикай чавай Агъарзаева Нинадин ва Атлуханова Хасахалуман тIварар кьаз жеда.
Къенин чи ихтилат Курхуьруькай вичиз кьвед лагьай Ватан хьайи, яргъал йисара хуьруьн школада акьалтзавай несилдиз урус чIаланни литературадин тарсар гайи,дяведин йисара зегьметдин фронтда активвилелди иштиракай урус дишегьли-муаллим Агъарзаева Нина Иосифовнадикай я.
Щукина Нина Иосифовна 1923 йисуз Тамбов шегьерда ракьун рекьерин къуллугъчидин хзанда дидедиз хьана.
Тамбов шегьердин ракьун рекьерин техникум куьтягьай адан буба Щукин Иосиф направленидалди 1930 йисуз Кеферпатан Кавказдин ракьун рекьерин отделениядиз рекье туна.
Ада яргъал йисара Дербент,Темиргое,Махачкъала ракьун рекьерин станцийрин начальниквиле кIвалахна.
1938-йисуз Нина Иосифовнади Махачкъаладин 2-нумрадин школада 7-класс куьтягьзава.
Дагъустан, дагъвийрин адетар,инсанпересвал, мугьманпересвал,дуствал, эдебият, меденият,урус халкьдиз дагъвийри ийизвай гьуьрмет бегенмиш хьайи Щукин Иосиф гьамишалугъ Дагъустанда хзанни галаз акъваззава. Абур Дербентда яшамиш жезва.
1938-йисуз Нина Иосифовна Дербентдин педучилищедиз гьахьзава ва анаг 1941-йисуз агалкьунралди куьтягьзава. Училище куьтягьай жегьил пешекар Кьасумхуьруьн райондин халкьдин образованидин отделдин ихтиярдиз рекье твазва.
Ватандин ЧIехи дяве башламиш жезва.
Сифтегьан кьве йисуз Нина Иосифовнади Шихидхуьруьн школада гъвечIи классрин муаллимвиле кIвалахзава.
Ам зегьметдин фронтда 6 вацра хьана.Четин шартIара, дагъвийри са куьруь вахтунда гъил-гъиле кьуна, югъ-йиф, каш-мекь талгьана чпин вилик эцигнавай мажбурнамаяр кьилиз акъудна. Гьар йикъан планар 2-3 сеферда кьилиз акъудиз хьана.
Нина Иосифовна 1943-йисуз Курхуьруьн школадиз урус чIаланни-литературадин муаллим яз хквезва.
Математикадин муаллим вичи хейлин йисара райондин инспекторвиле кIвалах авур Агъарзаев Жабраила Нина Иосифовнадихъ галаз чпин кьадар-кьисмет сад ийизва. Дяведилай кьулухъ Агъарзаева Нина Иосифовнади кIвалахни ийиз Дагъустандин учителрин институтда кIелзава ва 1952-йисуз куьтягьзава. 1962-йисуз ам Дагъустандин государстводин педагогвилин Гьамзат ЦIадасадин тIварунихъ галай институтдин филологиядин факультетдик экечIзава ва 1965-йисуз агалкьунралди куьтягьзава. Вичин гьакъисагъ зегьметдалди ада аялрин, муаллимрин, диде-бубайрин арада гьуьрмет къазанмишзава. Ада тарсар гайи аялрикай къе чпикай дидеяр-бубаяр хьана, чи уьлкведин гьар са пипIе яшамиш жезва. Абурун арада алимарни муаллимар, духтурарни инженерар, артистарни юристар ва маса кеспийрин иесияр ава. Къе хуьруьн кьве школада кIвалахзавай муаллимрин чIехи пай Нина Иосифовнадин ученикар я. 1973-йисуз Нина учительница лайихлу пенсиядиз экъечIна ва 1986 йисалди школада муаллимвиле кIвалахна. Нина Иосифовна КПСС-дин член, 1966-йисалай пенсиядиз экъечIдалди школадин партийный организациядин секретарь тир. Са шумудра ам хуьруьн, райондин Советрин депутатвиле, райондин суддин заседателвиле, партиядин райкомдин Пленумдин членвиле хкянай. Адакай Дагъустандин дишегьлийрин 12-съезддин делегатни хьанай. Адан гьакъисагъ зегьметдиз Гьукуматди лайихлу къиметни гана. Нина Иосифовна «учитель-методист», «старший учитель» тIварариз, РСФСР-дин, ДАССР-дин халкьдин образованидин министерствойрин, райондин са шумуд Гьуьрметдин грамотайриз лайихлу хьана . Ам «За оборону Кавказа», «За доблестный труд в Великой Отечественной войне 1941-1945 г», «100 летие со дня рождения В.И.Ленина», «Ветеран труда» ва са шумуд юбилейрин медалрин сагьиб тир.
Жабраил муаллимдинни Нина учительницадин хзанда 7 аял хана, хвена, намуслу тербия, образование гана, виридахъ чпин кIвал-югъ, хзанар хьана, динж хьанва.
ЧIехи хва Агъарзади Небит-дагдин нафтIадинни газдин институт куьтягьна, хейлин йисара Туьркменистанда нафтIадин мяденра кIвалахна. Ам чи арада амач, вичиз регьмет хьурай. Хва Багъира, ДГУ куьтягьна, хейлин йисара Каспийск шегьерда механический техникумда директордин заместителвиле кIвалахна. Алай вахтунда Уфада предпринимательстводал машгъул я.
Руш Эминади Кьулан СтIалрин Радим Халикьован тIварунихъ галай школада муаллимвиле кIвалахзава.
Хва Руслана, ДГУ-дин физикадин факультет куьтягьна, Избербашдин са школада кIвалахзава.
Руш Светади Дагъустандин мединститут куьтягьна, Красноуральск шегьердин больницада духтурвиле кIвалахзава.
Гада Тимура, Рязандин политехнический институт куьтягьна, алай вахтунда Рязань шегьердин электросетрин начальниквиле кIвалахзава.
Школа къизилдин медалдалди куьтягьай гъвечIи руш Тамаради, ДГУ-дин химический факультет куьтягьна, Махачкъалада са школада кIвалахзава.
