Кьасумхуьр. Эхиримжи зенг ягъуниз талукьарнавай шадвилин линейка СтIал Сулейманан тIварунихъ галай Кьасумхуьруьн 1-нумрадин юкьван школада, виликан йисара хьиз, хъсан тешкиллувал аваз кьиле фена. Аялар ва муаллимар линейкадал акъвазнавайла, шад авазрин ван кьилеллаз, майдандал цуькверин кIунчIар гвай 1-классрин ученикрин гъилер кьуна выпускной классрин аялар атана. Абур вирида гурлу капар ягъуналди къаршиламишна.
Шадвилин линейка 11-класс акьалтIарзавай Мукаилова Дианади ва Дадашев Агьмеда кьиле тухвана.
Сифте гаф гана рахай школадин директор Х. Н. Хаирова лишанлу югъ муаллимриз, аялриз ва абурун диде-бубайриз рикIин сидкьидай мубаракна, алай кIелунин йисуз школадихъ кIелунин, тербиядин ва спортдин рекьерай хьайи агалкьунрикай гегьеншдиз суьгьбетна. Ада къейд авурвал, школада 645 аялди кIелзава, 58 аялди школа акьалтIарзава. Директорди тебрикдин хуш келимайрилай гуьгъуьниз кIелунин йисуз хъсан къиметар аваз кIелай, райондин ва республикадин олимпиадайра кIвенкIвечи чкаяр кьур аялрив гьуьрметдин грамотаяр вахкана.
Гуьгъуьнилай рахай муниципальный райондин администрациядин кьилин заместитель С. М. Велиева райондин руководстводин патай муаллимриз ва школьникриз сувар мубаракна, выпускникрихъ гележегда кIелунра ва кIвалахда агалкьунар хьана кIанзавайди лагьана.
Шадвилин линейкадал, тебрикдин гафар лугьуналди, 11-классдин руководитель М. Оружева, выпускникрин сифтегьан муаллим З. Мурадова, педагогикадин зегьметдин ветеран И. Рамазанова рахана.
Школа акьалтIарзавай Керимова Тамаради чпиз чирвилер ва тербия гунай муаллимриз чухсагъул лагьана.
Тешкиллувал аваз кьиле фейи мярекат школадин художественный самодеятельностдин коллективди концерт гуналди ва школьникри кьуьлер авуналди куьтягь хьана.
ЦIийихуьруьн юкьван школадин гьаят. Сятдин муьжуьд. Школадин вилик пад ва гьаят аялри шараралди, плакатралди безетмишнава. Са аялри къуьнелайгъуз лентер вегьена, муькуьбуру гъилера цуькверин кIунчIар аваз школадихъди еримишзава. Им къе школада шадвилин мярекат ава лагьай чIал я. Хуьрел музыкадин ван ала.
Школадин тешкилатчи Женетханова сятдин кIуьд жедайла 11-классрин аялриз шадвилин линейкадал эверзава. Гъилера цуьквер ва пишкешар авай 11 ва 1-классрин аялар, гъилер кьуна, школадин вилик кIватI жезва. Линейка ачухнавайди яз малумарзава.
Вичи аялриз сувар мубарак авурдалай кьулухъ Надир Женетханова гаф школадин директор Ягъибеков Бег Абдулашимовичаз гузва. Ада аялриз сувар мубаракзава ва школада тухвай кIвалахдикай гегьеншдиз лагьана.
Адалай гуьгъуьниз инал райадминистрациядин векил, райондин депутатрин Собранидин председателдин заместитель и мектебдин выпускник Абдулмуталибов Нариман Шамсудинович рахана. Ада лагьайвал, вичи и школа куьтягьайдалай кьулухъ школада гзаф дегишвилер хьанва. Учителрин коллективдиз, аялриз сувар мубарак авурдалай кьулухъ ада школадин директордив Ватандин ЧIехи дяведа 65 йисан гъалибвилин суварик тешкиллувилелди иштирак авунай сад лагьай чка кьунай администрациядин грамота вахкана.
Адан гуьгъуьнлай рахай школадин завуч Мирзеханов Сулейман Тагьировича аялриз сувар мубарак авурдалай кьулухъ лап хъсан кIелзавай 11-классрин аялриз ва спортсменриз грамотаяр гана. Гаф сифте тарс гайи муаллимрикай сад тир Бабаева Гуьлселем Селимовнадиз гана. Ада аялрихъ гележег хьун, чпин рикIе авай мурадар кьилиз акъатун тIалабна. Адалай гуьгъуьниз чпин шиирар ва манияр гваз 1-классрин аялар рахана. Диде-бубайрин патай Агьмедова Валида Мегьамедрагьимовна рахана ва школадиз, муаллимриз, аялриз тарс ва тербия гунай чухсагъул лагьана.
Ахпа 11 «в» классдин руководитель Гъаниева Изабелла Тельмановна рахана, ада аялрихъ зурба агалкьунар хьана кIанзавайдакай лагьана.
11-классрин аялри и мярекатдал чпин шиирар, тIалабунар, чухсагъулар лугьуз хьана.
Ахпа 11-классрин аялри 10-классрин аялрив чирвилерин лишанар тир ктаб ва куьлег шад гьалара вахкана.
Эхиримжи зенг ягъун патал лап хъсан къиметар авай 11-классдин ученик Мустафаев Тагьираз ва 1-классдин ученица Кьасумова Аринадиз мярекатдал атун теклифна. Вири кIватI хьанвайбуру капар ягъуналди, абуру выпускникриз эхиримжи зенг яна.
Адалай гуьгъуьниз аялри и шад мярекат кьуьлер, шадвилер авуналди яргъалди давамарна.
Эхиримжи зенгиниз талукьарнавай мярекат Курхуьруьн 2-нумрадин юкьван мектебдани хьана. Мярекатдал мектебдин директор Н. Алхасов рахана, ада эхиримжи зенгинин сувар виридаз мубаракна, выпускникриз насигьатдин гафар лагьана. Ахпа анал директордин заместителар Э. Абдулазизов, Гь. Шихбабаев выпускникрин сифтегьан муаллим М. Насрулаева, классдин руководитель О. Велибекова, диде-бубайрин патай М. Ханова, К. Къагьриманов, чими келимаяр рахана.
Чпин нубатдай выпускникри чпиз дерин чирвилер гайи вири муаллимриз чухсагъул лагьана, муаллимар са чIавузни, рикIелай ракъур тийидайдахъ, чпи инлай кьулухъни кIелунар давамардайдахъ инанмишарна.
Ахпа аялри муаллимриз цуьквер, пишкешар гана, шиирар кIелна. Олимпиадайра, конкурсра, спортда тафаватлу хьайи аялриз, муаллимриз дипломар, грамотаяр, пишкешар гана.
Гуьгъуьнлай 11-классдин аялри шад гьалара 10-классдив хъсан адетар давамарунин лишан яз Дагъустан республикадин пайдах, символикадин лишан тир куьлег вугана. Анал гьакI дуствилин лишан яз цавуз лиферни ахъайна.
Эхирдай вичи мектеб къизилдин медалди куьтягьзавай Къагьриманов Камалани 1-классдиз атанвай Бутаева Севилади эхиримжи зенг яна.
Герейхановский 2-нумрадин юкьван школадани эхиримжи зенгиниз талукьарнавай митинг шад гьалара кьиле фена.
Митинг школадин тешкилатчи З. Абуева ачухна ва сифте гаф школадин директор С. Гьасановаз гана. Ада кIватI хьанвайбуруз и югъ мубаракна. Митингда райондин хуьруьн майишатдин управленидин начальник М. Бабаева иштиракна ва ам анал рахана.
***
Выпускной классрин аялар патал школадин эхиримжи зенг ягъуниз талукьарнавай шадвилин линейка Османов Раидинан т1варунихъ галай Герейхановский 1-нумрадин юкьван школадани хъсан тешкиллувал аваз кьиле фена.
Ам и мектебдин тешкилатчи Алаудин Агъададашева ачухна ва кьиле тухвана. Анал тебрикдин хуш келимаяр гваз школадин директор, муаллимар, аялар, РУО-дин векил Муслим Альдеров, и хуьруьн шаир Зумрият Жабраилова ва маса юлдашар рахана. Шадвилер яргъалди давам хьана. Амрагь КIириви
Эминхуьр. Сятдин 9 тамам хьайила инин юкьван школада эхиримжи зенг ягъуниз талукьарнавай шадвилин мярекат муаллим-тешкилатчи М. Зиямудинова ачухна.
Гуьгъуьнлай гаф гана рахай школадин директор Р. Османова школадихъ хьайи агалкьунрикай суьгьбетна, тебрикдин гафар лагьана.
Хуьруьн поселенидин кьил Р. Рамазанова, диде-бубайрин патай рахай Ф. Османовади, муаллимар тир Къ. Кьасумова, Р. Османова выпускникриз и югъ мубаракна, алхишдин гафар лагьана.
Аялри лагьай манийри, авур кьуьлери и мярекат мадни шадлу авуна.
