Алай вахтунда Россиядин Федерациядин Яракьлу Къуватра чи райондайни гзаф кьадар аскерри ва офицерри намуслувилелди къуллугъзава, чпиз диде-бубади, райондин военный комиссарди, дяведин ветеранри гайи насигьатар, тапшуругъар ян тагана кьилиз акъудзава. И кардин гьакъиндай абуру къуллугъзавай военный частарай анрин командиррилай хквезвай чухсагъулдин чарари ачух шагьидвалзава.
Агъа СтIалдилай тир Дагъустандин лайихлу муаллим Дадашев Рамазанан гъвечIи хва Тельман армиядиз къуллугъиз рекье твадайла, диде-бубади хьиз, адан чIехи буба, Ватандин ЧIехи дяведин активный иштиракчи гвардиядин майор Къазимегьамедов Гьажимегьамед Къазимегьамедовичани адаз, аферин къведайвал, намуслувилелди къуллугъ авун патал насигьатар ва тапшуругъар ганай.
ЧIехи Гъалибвилин суварин вилик Дадашеврин хзандин тIварцIихъ абурун хва Тельмана къуллугъзавай частунин командирдилай Чухсагъулдин чар хтана. Суварин савкьват хьиз агакьай а чарче икI кхьенва:
«Гьуьрметлу Рамазан Гьажимегьамедович ва Ажерхалум Мегьамедгьадиевна. Частунин командованидиз квез куь хва гвардиядин младший сержант Дадашев Тельман Рамазановича хъсандиз къуллугъзавайдакай ва Военный Кьин гунин Уставрин истемишунар, командирринни начальникрин тапшуругъар намуслувилелди кьилиз акъудзавайдакай еке разивилелди хабар гуз кIанзава. Ада женгинин техника ва яракьар устадвилелди ишлемишзава. Женгинин къуллугъдин вири четинвилериз лайихлувилелди дурум гузва. Адаз командиррин ва къуллугъдин юлдашрин арада гьуьрмет ва авторитет ава. Хъсан алакьунрай, инициатива гваз экъечIунай ва зегьметдал рикI хьунай дивизиондин командованиди ам са шумудра руьгьдин жигьетдай ашкъиламишнава.
Куь хци инлай кьулухъни вичин хивевай аскервилин буржи намуслувилелди кьилиз акъуддайдак умуд кутаз кIанзава. Ихьтин хва тербияламишунай квез рикIин сидкьидай чухсагъул.
Квехъ мягькем сагъламвал, уьмуьрда бахт, берекат, агалкьунар хьурай.
Еке гьуьрметдивди реактивный артиллериядин дивизиондин командир гвардиядин подполковник Д. Курзин».
Гъалибвилин сувариз савкьват яз хтай и Чухсагъулдин чарчи Тельманан диде-бубадин, гьакIни чIехи дидединни бубадин, вири мукьва-кьилийрин гуьгьуьлар шадарна.
