Чи районда кардик квай Кьасумхуьруьн дзюдодинни самбодин ДЮСШ-дин тербиячийри чи республикада ва адалай къеце кьиле физвай турнирра, чемпионатра чпихъ хъсан алакьунар авайди къалурзава. Абурун жергедай тир Кьасумхуьруьн 1-нумрадин юкьван школадин 11-классдин ученик самбодай РФ-дин спортдин мастервиле кандидат Алискеров Икрама вичихъ хъсан гележег авайди къалурзава.
ИкI, алатай мартдин вацран эхирра Махачкъалада Али Алиеван тIварунихъ галай спорткомплексда Дагъустан Республикадин кIвен-кIвечивал патал 1994-1996-йисара ханвай жаванрин арада кьиле фейи акъажунра Икрамакай, 78 килограммдин заланвал авай спортсменрин арада 1-чка кьуналди, ДР-дин чемпион хьана. Ам къизилдин медаль ва 1-дережадин диплом гуниз лайихлу хьана.
Адан тренер – дзюдодай мастеррин арада дуьньядин чемпион, международный классдин спортдин мастер Тельман Къурбанова суьгьбет авурвал, и акъажунра гъалибвал къазанмишун лап четин тир. Гьар са заланвилин категориядай гъалиб хьун патал 45-50 спортсмен женгиник экечIнавай. Чи чемпион Икрам Алискерова майдин вацра самбодай Кьиблепатан Федеральный округдин кIвенквIечивал патал кьиле физвай акъажунра иштиракда. Чна ам анайни чемпионвилин тIвар гваз хуькведайдак умуд кутазва.