Малум тирвал, алатай йисан 5-майдиз чи машгьур генералри – Шайдаеври чпин хуьре эцигай кIелунинни спортдин центр шад гьалара ачухнай ва ам чIехи стха Шайдаев Мегьамедгьанифа Гьажибалаевичан тIварунихъ янай.
Алай йисан 5-майдиз и хуьре лезгийрин кьегьал хва Шайдаев Мегьамедгьанифа Гьажибалаевичан экуь къамат рикIел хкун яз волейболдай адан тIварунихъ галай турнир кьиле фена.
Ам шад гьалара ачухуниз талукьарнавай межлисдал сифте гаф гана рахай «Сулейман-Стальский район» муниципальный райондин администрациядин кьилин заместитель Назим Къурбанова райондин руководстводин тIварунихъай и мярекат тебрикна, турнирдин иштиракчийриз хуш келимаяр лагьана. Анал кIватI хьанвайбур райондин руководстводи спорт вилик тухуниз гележегдани еке фикир гудайдахъ инанмишарна.
Гуьгъуьнлай анал тебрикдин хуш келимаяр гваз «сельсовет Цмурский» МО-дин администрациядин кьил Раида Алибегова, и хуьруьн агъсакъал Ягъибегов Абдулашим, Шайдаеврин гъвечIи стха генерал Шайдаев Гьажикъурбан Гьажибалаевич, РУО-дин начальникдин заместитель Къачабег Аминов ва масабур рахана. Анал рахайбуру и турнир гьар йисуз кьиле тухунин теклифар гана.
Къизгъиндаказ кьиле фейи акъажунра 1-чка Кьасумхуьруьн ДЮСШ-дин, 2-чка Герейханован хуьруьн ва 3-чкани Кьулан СтIалрин хкягънавай командайри кьуна. Абуруз, талукь тирвал, 10, 7 ва 5 агъзур манат пул ва тафаватлу хьайи кьилдин спортсменризни къиметлу пишкешар гана.