Ингье фадлай вил алай ЧIехи Гъалибвилин суварин югъни алукьна. Ам хъсан тешкиллувал аваз ва шад гьалара къейд авун патал чи райондани виликамаз талукь гьазурвилер акунвай: райцентрдал ва гьакIни дяведин женгера телеф хьайи чи районэгьлийриз ЦIийи поселокдин кьилихъ абур рикIел хуьн патал эцигнавай сур-гуьмбетдал физвай рехъ тирвал чка-чкадал сувар тебрикзавай лозунгар янавай, обелиск алай чкани суварин къайдада туькIуьрнавай, анал пакамлай эгечIна дяведиз талукьарнавай манийрин ван алай.
ЧIехи Гъалибвилин 65 йис тамам жезвай 9-майдин и лишанлу югъ тIебиатдин патайни алахьай, гуьлуьшанди яз атанвай. Кьуд патаз кIеретI-кIеретI хьана суварик къвезвай инсанрин шад хъуьруьнрин ван, гатфарин цуькверин атир чкIизвай.
Гъилера пайдахар, кубокар, транспарантар, цуьквер, гьар рангарин шарар аваз, обелискдин патав атай чи райондин спортсменрин, Кьасумхуьруьн 1 ва 2-нумрайрин, ЦIийи поселокдин юкьван школайрин аялрин колоннайри суварин майдан мадни гуьрчегарна.
Обелискдал пионерар гьуьрметдин къаравулда акъвазнавай.
Пионерри ва школьникри райондин руководителар, дяведин ва зегьметдин ветеранар, суварик хтанвай багьа мугьманар, цуькверин кIунчIар гуналди, шад гьалара къаршиламишна.
Суварин межлис кьиле тухузвайди тир КТВ-дин руководитель Ярагьмед Ярагьмедова вичин гужлу сесиналди урусрин машгьур шаир Роберт Рождественскийдин «Реквием» шиир таъсир ийидайвал лугьуз, мидаим цIун вилик венокар, цуькверин кIунчIар эцигайдалай гуьгъуьниз кьиле «Сулейман-Стальский район» муниципальный райондин Кьилин везифаяр тамамарзавайди тир Магомедханов Штибег Гаджимагомедович аваз суварик атанвай мугьманар, дяведин ветеранар ва райондин идарайрин, организацийрин руководителар суварин президиумдиз хкаж хьана.
Гаф муниципальный райондин Кьилин везифаяр тамамарзавайди тир Ш. Г. Магомедхановаз гана.
Ада ЧIехи Гъалибвилин 65 йис тамам хьуниз талукьарнавай суварин межлис ачухун малумарна.
Россиядин Федерациядин Гимн яна.
Муниципальный райондин, администрациядин руководстводин, депутатрин Собранидин патай дяведин ва зегьметдин фронтдин ветеранриз ва вири районэгьлийриз ЧIехи Гъалибвилин сувар тебрик авурдалай гуьгъуьниз ам анал куьруь гаф рахана. Дяведин ва гьакIни зегьметдин фронтра советрин вири халкьарихъ галаз санал чи районэгьлийрини игитвилин чешнеяр къалурайди хьиз, дяведилай гуьгъуьнин девирдани чпин намуслу зегьметдалди чпел баркалла гъайиди, чи райондин экономика вилик тухун ам абад хьун патал еке пай кутурди, райондин руководстводи и жигьетдай алай вахтундани еке серенжемар кьабулзавайди лагьана.
Эхирдай ада алай вахтунда Дербент шегьердин кьиле акъвазнавай чи районэгьли Яралиев Имам Музамудиновичахъ вичин хивевай жавабдар кIвалахда агалкьунар хьун кIанзавайди лагьана.
Адан теклифдалди суварин иштиракчийри дяведа телеф хьайи районэгьлийрин экуь къаматар са декьикьада кIвачел къарагъна, кисна акъвазуналди, рикIел хкана.
Гуьгъуьнлай анал суварин тебрикдин гафар гваз рахай ДР-дин военный комиссариатдин С. Стальский районда авай отделдин начальник Рейзудин Женетова, ЧIехи Гъалибвилин Югъ мукьва авуник чи районэгьлийрини еке пай кутурди, алай вахтунда чи уьлкведин руководстводи Россиядин къудратлувал мягькемарунин, агьалийрин истемишунриз жаваб гудай пешекарвилинди авун патал са жерге серенжемар кьабулзавайди, чи райондайни алай вахтунда гзаф кьадар аскерри ва офицерри чпин хивевай Ватан хуьнин буржи намуслувилелди кьилиз акъудзавайди къейдна.
Гаф чи райондай Берлиндиз кьван женг чIугваз фейи, дяведин активный иштиракчи гвардиядин майор Гьажимегьамед Къазимегьамедоваз гана. Ада вичиз хас тир командирвилин кьетIи сесиналди вири ветеранриз, районэгьлийриз сувар мубаракна.
Суварин тебрикдин гафар ва хуш келимаяр гваз гуьгъуьнлай анал чи баркаллу районэгьлияр – багьа мугьманар тир РФ-дин Госдумадин депутат А. Н. Нуьдуьрбегов, ДР-дин Халкьдин Собранидин депутат Гь. И. Мегьамедов ва эхирдайни ЦIийи поселокдин юкьван школадин ученица Азизова Гуьлназ рахана.
Суварин мярекатдин 2-паюнив эгечIна. Ам гьевескар артист Гьажибала Гьажимисриева лагьай «Лянет» шиирдилай башламиш хьана.
Сегьне чи районда Дагъустандин лайихлу артист Назим Идрисован регьбервилик кваз тешкилнавай кьуьлердайбурун «Кюре» ансамблдин ихтиярда вугана. И коллективдин гадайри ва рушари тамамарай кьуьлер, композицияр халкьди хушвилелди кьабулна.
Райондин Культурадин Дворецдин гьевескаррин, ЦIийи поселокдин юкьван школадин, маса коллективрин иштираквал аваз гьазурнавай концертдин программадик литературадинни художественный композицияр, шиирар, манияр, кьуьлер, военно-спортивный акъажунар ва маса нумраяр квай.
