Алатай гьафтеда Герейханован хуьре 2008-йисан 19-июндиз «совхоз Герейханово» контрольно- загородительный постунал вичин къуллугъдин везифаяр тамамардайла игитвилелди телеф хьайи, Россиядин Федерациядин Президент Д. Медведева 2009-йисан 30-августдиз акъудай Указдалди «ВикIегьвилин орден» гайи Къазиагьмедов Роберт Абидиновичан тIварунихъ галай стадион ачухуниз талукьарнавай шадвилин мярекат кьиле фена. Ана неинки чи республикадин, гьакI яргъал шегьеррайни районрай атанвай жавабдар къуллугъчийри, мугьманри, ДР-дин МВД-дин, С-Стальский РОВД-дин работникри, хуьруьнвийри иштиракна.
Сифтедамаз лугьуз кIанзава хьи, игит стхадиз ихьтин ядигар, гуьрчегдиз туькIуьрнавай, вичиз барабар са бязи шегьеррани авачир хьтин стадион арадал хкайди Роберт Къазиагьмедован стхаяр Загьидин ва Къазиагьмед Абидиновичар я. Аферин ва баркалла ихьтин жумарт, рикI михьи, гъил ачух рухвайриз!
Хъсандиз тешкилнавай, шад гьалара кьиле фейи и мярекат райондин образованидин управленидин начальникдин заместитель Н. Аминова кьиле тухвана.
Мярекатдал «сельсовет Герейханово» МО-дин кьил А.Абдурагьманов, «Дагъустан Республикадин муниципальный тешкилатрин совет» ассоциациядин крар идара ийидай секретарь Гь.Балатов, Герейханован хуьруьн мискIиндин имам Магьарам гьажи, райондин администрациядин кьилин заместитель К. Алискеров, РОВД-дин начальник Э. Эседулаев, ДР-дин МВД-дин отделдин начальник В.Зейналов, Герейхановский 1-нумрадин юкьван школадин директор М. Гьажимурадова, Дагъустандин Огни шегьердин ОВД-дин начальник А.Нурдинов, муаллимар тир С. Гьасанов, Р. Набиев, Ш. Магьамдаров ва маса юлдашар рахана. Абуру Роберт Къазиагьмедован лайихлувилер, игитвал къейд авуна, ихьтин гуьрчег стадион туькIуьрунай адан стхаяр тир Къазиагьмед ва Загьидин Абидиновичриз рикIин сидкьидай чухсагъул лагьана.
Анал Къазиагьмедоврин тIваруни-хъай рахай Загьидин Абидиновича и мярекат тешкилай, ана иштирак авур вири юлдашриз чухсагъул малумарна.