Ингье фадлай чи халкьдин вил алай гуьзел ва эрзиман суваррикай сад тир, миллионралди советрин инсанрин чанаралди къазанмишай ЧIехи Гъалибвилин суварин югъ алукьзава. И югъ къе чи арада сагъ яз амай дяведин иштиракчийри иллаки рикIерик еке гъалаба кваз гуьзлемишзава. Им тIебии карни я. Абурун жергеярни, гьайиф хьи, йисалай- суз кьери жезва. Са шаирди лагьайвал, дяведин ветеранри къе гьар са югъ душмандив гвай эхиримжи тепе хьиз къачузва. Дяве куьтягь хьана 65 йис алатнаватIани, къенин юкъузни адан хирер сагъ хьанвач, абуру чпикай хабар гузва.
Дяведин сифте девир чи кьушунриз гзаф четиндиз акъвазна. Гьам техникадал, гьамни кьушунрин кьадардал гьалтайла еке артуханвилер авай фашистри са къатда виликди гьужумзавай ва 1941-1942-йисара Москвадив, Сталинграддив ва Кавказдин дагъларив кьван агакьна.
Дуьньядин кьвед лагьай дяведиз 61 государство чIугунвай, 110 мил¬лион касди гъиле яракь кьунвай. Советринни Германиядин фронтда женгер гьикI куьтягь жедатIа, гьадалай инсаниятдин кьисмет аслу тир. Гьа и фронтда виридалайни гзаф ивияр экъична, инсафсуз ва зурба ягъунар кьиле фена, гьа и фронтда Верхмахтдин сечме 607 дивизия кукIварна, фашистрин блокдин 70 процентдилай виниз женгинин техни¬ка, аскерар тергна. Советринни Гер¬маниядин фронт дуьньядин кьвед лагьай дяведин кар алай фронт тир. И фронтда къизгъин женгер саки кьуд йисуз давам хьана.
Гьа и девирда Коммунистрин партиядин ва чи Яракьлу Къуватрин бажарагълу военноначальникрин регьбервилик кваз женгинин зурба операцияр кьиле тухвана ва виридуьньядин тарих патал метлеб авай Гъалибвал къазанмишна.
Ватандин ЧIехи дяведи чи инсанрин тешпигь авачир хьтин дурумлувал, ватанпересвал, викIегьвал, кьегьалвал къалурна. Советрин уьлкведин халкьарин садвал, абурун дуствал ва женгерани абуру чпин рейсадвал къалурун ЧIехи Гъалибвал къазанмишунин кар алай шартI хьа¬на.
Ва¬тандин ЧIехи дяведа гъалибвал къазанмишайди сифте нубатда чи халкь я. Гьа и дяведа виликан Советрин Союздин вири миллетрин ва халкьарин векилри къвал-къвала аваз душмандин аксина женг чIугуна. Ватандин ЧIехи дяведин фронтра къалурай кьегьалвилерай 11 агъзурни 600-далай виниз ксар Советрин Союздин Игитвилин чIехи тIварцIиз лайихлу хьана.
Ватандин ЧIехи дяведин йисара СССР-дин вири халкьарихъ галаз санал дагъустанвиярни Ватан хуьн патал къарагъна.
Ватандин ЧIехи дяведин йисара, вири уьлкведа хьиз, Дагъустандани гзаф кьадар агьалияр гуьгьуьллудаказ армиядин жергейриз физ хьана. Дяведин анжах сифтегьан пуд йикъан къене Дагъустандай армиядин жергейриз гуьгьуьллудаказ тухун тIалабзавай ксарин 3350 арза агакьна. Гуьгьуьллудаказ фронтдиз физ кIанзавайбурун арзаяр виринрай неинки дяведин эвел кьилера, гьакIни ам куьтягь жедалди агакьиз хьана.
Ватандин ЧIехи дяведа 198 агъ¬зур кас дагъустанвийри, гьа жергедай яз 3930 кас чи районэгьлийрини иштиракна, абуру Ватан лайихлудаказ хуьнни авуна, дяведин вири фронтра кьегьалвилелди женг чIугуна. Абурукай 1832 касдиз элкъвена хтун кьисмет хьанач. Дагъустандин баркаллу дишегьлийрини Ватандин ЧIехи дяведин фронтра викIегьвилелди женг чIугуна. Абурукай хейлинбуруз гьукуматдин виниз тир наградаяр гана.
Дагъустандин вири халкьарин жергедай тир агъзурралди кьегьал рухваяр уьлкведин орденризни медалриз, 59 кас Советрин Союздин Игитвилин тIварцIиз лайихлу хьана, 7 касдикай Баркалладин вири дережайрин сагьибар хьана. 80 агъзурдалай виниз дагъустанвияр дяведа телеф хьана, чпин ивидалди абуру СССР-дин стхавилин халкьа-рихъ галаз, эвелни-эвел вичел дяведин асул пар гьалтай урус халкьдихъ галаз дуствилин алакъаяр мягькемарна.
Ватан патал женгера телеф хьайи 80 агъзур касдилай виниз чи ватанэгьлийрин тIварар Вирисоюздин РикIел хуьдай ктабда кхьенва.
9-Май чи уьмуьрда кьетIен жуьредин рикIик гъалаба кутадай югъ я. И сувар чи Ватандин Игитвилин та¬рихда къизилдин гьарфаралди кхьенва ва ам чи тарихда ислягьвилин сувар яз акьулдин ва инсанпересвилин къуватри чапхунчивилин къуватрин винел гъалибвал къазан¬мишунин сувар яз гьатнава.
Чи бубайрин къазанмишунар, чи уьлкведин аслу туширвал, къудратлувал хуьн, чи армия алай аямдин техникадалди таъминарун, чи аскерриз ва офицерриз къуллугъдинни яшайишдин къулай шартIар яратмишун, санлай армия пешекарвилинди авун патал чи уьлкведи гьар йисуз и рекьериз пулунин еке такьатар чара ийизва.
Чи райондайни гзаф кьадар аскерри ва офицерри алай вахтунда армияда намуслувилелди къуллугъзава. Армиядиз икьрардин (контракдин) бинедаллаз къуллугъиз 2009- йисалай къенин йикъалди 90 далай виниз пешекарар рекье туна. Чи военкоматдин направленидалди цIи гьазурнавай 40 кас пешекарарни (водителар) армиядиз къуллугъиз фида.
Чи райондай военный училищейриз кIелиз фидайбурун кьадарни йисалай-суз артух жезва. ИкI, шаз чна 20 касдилай виниз жегьилар анриз кIелиз рекье туна, алай йисузни 27 касдин документар (делояр) гьазурнава.
Гатфарин призывдиз чи райондай тапшуругъдин бинедаллаз 50 кас жегьилар армиядиз рекье туна кIанзава. 22- апрелдиз чна сифтегьан отправкадик кваз чи райондай 12 кас жегьилар армиядиз рекье тунва. Умудзава, абуруни, чи бубайрин хъсан адетар давамаруналди, намуслувилелди къуллугъда, абурун гьакъиндай чал хкведайбурни анжах чухсагъулдин чарар жеда.
Мумкинвиликай менфят къачуналди, заз Ватандин ЧIехи дяведин иштиракчийриз, дяведин ва зегьметдин фронтдин ветеранриз, армияда къуллугъзавай ва гьакIни запасда авай вири офицерриз, прапорщикриз, мичманриз, сержантриз, аскерриз ва гьакIни вири районэгьлийриз ЧIехи Гъалибвилин 65 йисан сувар рикIин сидкьидай мубаракзава. Къуй куь кьилел ислягь цав, кIвалерани бахт, берекат, мублагьвал хьурай, гьуьрметлу юлдашар!
