Къазимегьамедов Гьажимегьамед Къазимегьамедович, гвардиядин майор 1920-йисан 15-сентябрдиз Агъа СтIалдал хана. Хуьре 7-класс, 1940- йисуз Кьасумхуьруьн юкьван школа акьалтIарна. Гьа и йисуз армиядин жергейриз эвер гана. Азербайжандин Къусар шегьерда 406-полкунин школа акьалтIарна. 1941-йисуз Гуржистанда Телавидин пияда кьушунрин училищедиз рекье туна ва 1942-йисан майдин вацра анаг, лейтенантвилин чин къачуналди акьал-тIарна. Жегьил пешекар-офицер 58-армиядин 317-стрелковый дивизиядин 761-нумрадин полкуниз рекье туна. Вичин женгинин рехъ ада Кеферпатан Кавказдин фронтда Моздок шегьер хуьн патал кьиле фейи женгерилай башламишна. 1944-йисуз гвардиядин капитан Гь.Къазимегьамедова 1- Украинадин фронтда 3-танковый армиядин 22-мотострелковый бригадада танково- десантный ротадиз регьбервал гана. Ада Германиядал кьван агакьдалди гзаф уьлквейрин хуьрер ва шегьерар азад авунин, Берлин къачунин женгера иштиракна. Агъа СтIалдал яшамиш жезва.
Межидов Зияудин Агъасович, 1924-йисуз Кьасумхуьруьн райондин Чантархуьре хана. 7-класс акьалтIарна. 1943- йисан мартдиз армиядин жергейриз къуллугъ ийиз эвер гана. 1943-йисан мартдилай 1944-йисан мартдалди 665-стрелковый полкуна стрелок яз женгера иштиракна. 1944-йисан мартдин вацра залан хирер хьана. 1944-йисан 15-мартдиз запасдиз ахъайна. Герейханован хуьруьн участковый больницада кIвалахна. Герейханован хуьре яшамиш жезва.
Жамалдинов Мирзеагьмед Мегьамедович, 1923-йисуз Куьре округдин Мегьарамдхуьруьн райондин ЦIелегуьнрин хуьре хана. 1939-йисуз армиядин жергейриз эвер гана. Сифте Польшада кьиле фейи вакъиайра, гуьгъуьнлай Финляндиядихъ галаз кьиле фейи женгера иштиракна. Ада алакъадин батальонда къуллугъ авуна. 1-Белорусский фронтдин 3-нумрадин атлуйрин корпусдин составда аваз ада Польшадин, Румыниядин гзаф шегьерар азад авунин женгера иштиракна. Са женгина адал залан хер хьана. Армиядай хтайдалай кьулухъ ада районда жуьреба- жуьре къуллугъар авуна .
Кьасумхуьрел яшамиш жезва.
Сабетов Агъарагьим Алисултанович, 1919-йисуз Кьасумхуьрел хана, юкьван школа акьалтIарна.
1941-йисуз армиядин жергейриз къуллугъиз фена. Киевдин военно- медицинский училищеда кIелна. Лейтенантвилин чин авай жегьил пешекар Новосибирский военный округдиз акъатна.
1942-йисалай ада дяведин женгера иштиракна. Москвадин кIанихъ кьиле фейи женгерилай эгечIна ада хейлин хуьрер ва шегьерар азад авуник вичин пайни кутуна. Женгера хирер хьана, 91-строительный батальондин къурулушда аваз, Ясско- Кишиневский операцияда, гуьгъуьнлай Румыния, Венгрия, адан меркез Будапешт азад авунин женгера иштиракна. Гъалибвал Австрияда къаршиламишна.
1947-йисуз хайи Ватан-диз хтана. Районда михьиви-лер хуьдай къуллугърал кIвалахна.
Кьасумхуьрел яшамиш жезва.
Агъаметов Мегьамедхан Агъаметович, 1922- йисуз Кьасумхуьруьн райондин ХпитIрин хуьре хана 7 класс куьтягьна. 1942- йисан 8-мартдиз армиядин жергейриз эвер гана. Сержант тир ада 1942-йисан мартдин вацралай 1944-йисан апрелдалди 67-стрелковый полкуна отделенидин командир яз женгера иштиракна . 1944-йисуз залан хер хьана.
1944-йисан апрелдиз запасдиз ахъайна. Дяведилай гуьгъуьниз КIварчагърин «Коммуна» совхозда рабочийвиле, «Аламишинский» совхозда кассирвиле кIвалахна.
Эминхуьре яшамиш жезва.
Балакъардашев Мегьамед Балакъардашевич, 1923-йисуз Кьасумхуьруьн райондин Алкьвадрин хуьре хана. 9 класс акьалтIарна. 1943-йисан 23- мартдиз армиядин жергейриз эвер гана.
1943-йисан августдилай 1944-йисан январдалди дяведа иштиракна.
455-стрелковый полкунин стрелок- жергедин аскер тир адал 1943-йисан августдин вацра женгина залан хер хьана.
1944-йисан январдиз запасдиз ахъайна.
Алкьвадрин Советдин председателвал ва маса кIвалахар авуна.
Алкьвадрал яшамиш жезва.
Ибрагьимов Нажмудин Ибрагьимович, 1923-йисуз Мегьарамдхуьруьн райондин Магьмудхуьрел хана. 10 класс акьалтIарна 1943-йисуз армиядин жергейриз эвер гана. 1943-йисан августдинни сентябрдин варцара 110-стрелковый полкунин стрелок яз хьана. 1944-1946-йисара 230-нумрадин залан танкарин самоходный полкуна залан танкунин механик-водитель яз къуллугъна. 1946-1947-йисара ГСМ авай складрин зеведиш хьана.
Герейханован хуьре яшамиш жезва.
Абдулкъадиров Исмаил Гьажибегович, 1922-йисуз Ахцегь райондин Ялакърин хуьре хана. Хуьре 7 класс, 1942-йисузни Бакудин военно- пехотный училище акьалтIарна, младший лейтенантвилин чин къачуна
1942-йисан июндилай 1943-йисан январдалди 61-стрелковый дивизиядин 66-полкунин миномётрин взводдин командир яз Закавказский фронтда къуллугъна. Герейханован хуьре яшамиш жезва.
Бремов Ширинбег Бремович, 1923-йисуз Кьасумхуьруьн райондин Вини Хъартасрин хуьре хана.
1942-йисан мартдин вацралай 1942-йисан августдалди 183-кьилдин стрелковый батальонда стрелок яз хьана. Младший сержант тир ада 1942-йисан августдилай 1949-йисан мартдалди МВД-дин 2007-нумрадин комендатурада стрелок яз къуллугъна.
1-группадин инвалид тир ам Вини Хъартасрин хуьре яшамиш жезва.
Шайдаев Нажмудин Шайдаевич, младший лейтенант, 1920-йисуз Агъа СтIалдал хана. 10 класс Кьасумхуьрел куьтягьна. 1939-йисуз Хасавюртдин хуьруьн майишатдин техникумдик кIелиз экечIна.
Харьковдин военный округда взводрин командирар-младший лейтенантар-куьруь вахтунда гьазурдай курсар акьалтIарна.
Ватандин ЧIехи дяведа 102-стрелковый дивизиядин 40-нумрадин стрелковый полкунин составда аваз, взводдин командир яз, 1-Украинский фронтда хьана.Пулеметдин взводдин командир яз 1946-йисан июндин вацра запасдиз ахъайна.
ДАССР-дин МВД-дин идарайра къуллугъна.
Агъа СтIалдал яшамиш жезва.
Нисредов Бутай Нисредович, 1923-йисуз Кьасумхуьруьн райондин Асалдхуьре хана. 4 класс куьтягьна.
1943-йисан 22-мартдиз армиядин жергейриз къуллугъиз эвер гана.
1943-йисан мартдилай 1944-йисан январдалди 110-стрелковый полкунин стрелок яз хьана. 1943-йисан июндилай сентябрдин вацралди дяведин женгера иштиракна. 1943-йисан 30-августдиз залан хер хьана.
1944-йисан 15 январдиз запасдиз ахъайна.
Дяведилай гуьгъуьниз гзаф йисара хайи колхозда ва «Агасиевский» совхозда лежбервилин ва малдарвилин хилера кIвалахна.
Асалдхуьре яшамиш жезва.
Рагьимханов Казимхан Рагьимханович, жергедин аскер, 1923-йисуз Кьасумхуьруьн райондин Чуьхверхуьрел хана, 4 класс куьтягьна, 1943-йисан июндин вацра армиядин жергейриз къуллугъиз фена.
1943-йисан июндилай 1944-йисан октябрдалди 493-нумрадин кьилдин строительный ротада чатун устIар яз къуллугъ авуна. 1944-йисан октябрдилай 1945-йисан январдалди 900-нумрадин артиллерийский полкунин чатун устIар яз хьана. 1945-йисан январдилай 1947-йисан мартдалди 478- нумрадин алакъадин кьилдин батальонда къуллугъна.
Чуьхверхуьрел яшамиш жезва.
Талибов Везих Талибович, жергедин аскер, 1910-йисуз Кьасумхуьрел хана, Алидхуьрел 2 класс куьтягьна. 1942-йисан январдиз армиядин жергейриз къуллугъиз фена. 210-стрелковый полкуна къуллугъна. Немсерин пленда гьатна. Дяведилай гуьгъуьниз жуьреба-жуьре кIвалахар авуна.
Кьасумхуьрел яшамиш жезва.