1948-йисуз винистIалви Мегьамедов Рамазанан лежбер хзанда дидедиз са гъвечIи руш хьана. Адал тIварни Бике эцигна. 1955-йисуз Бике гьа и хуьруьн мектебда 1-классда партадихъ ацукьна. Дерин зигьин ва кьатIунар авай, махарик квай хьтин гуьрчег руша школа хъсан къиметар аваз акьалтIарна. Чирвилерихъ къаних тир ам кIелун давамариз педучилищедиз гьахьна. 1969-йисуз анаг Яру дипломдалди куьтягьна ва вичин хайи хуьруьн школада сифтегьан классрин муаллимвиле кIвалах ийиз башламишна. Жегьил пешекарди гьа сифте йикъалай эгечIна къенин йикъалди вичин чирвилер, тежриба аялриз гуз, абурукай хайи халкьдиз, Ватандиз вафалу инсанар хкудиз алахънава.
Адахъ исятда 41 йисан муаллимвилин стаж ава. Бике муаллимди гьикI кIвалахзаватIа, ада тарс гайи аялриз, абурун диде-бубайриз ва хуьруьн жемятдиз хъсан чизва. Бике Рамазановади тарсар гайи гзаф аялрикай муаллимар хьанва, абуру чпин муаллимдихъ галаз са коллективда кIвалахзава.
Ам гьамиша вичин кIвалахдин юлдашриз куьмек гуз гьазур я. Бике муаллимди гъвечIи классра амаз чирвилерин бине кутур аялрикай хъсан юристар, муаллимар, инженерар, духтурар ва маса кеспийрин сагьибар хьанва.
1985-йисуз Бике муаллимдиз акьалтзавай несилдиз дерин чирвилер ва тербия гунин карда къазанмишнавай агалкьунрай Гьуьрметдин грамота, 1987-йисузни «Старший учитель» лагьай гьуьрметдин тIвар ганва. Адахъ вичи кIвалахзавай коллективдани еке гьуьрмет ва авторитет ава.
Адан классда доскадин кьилел ихьтин гафар кхьенвай лозунг ала: «Пусть солнце светит всем детям на земле». Цларални «Правильно сиди – при письме», «Вся радость учителя в учениках – в росте посеянных им семян», «Нет силы более могучей, чем знание», «Классный уголок» ва маса плакатар аквазва. Классда авай стол ва партаяр вири цIийибур я. Исятда Бике муаллимди 4-классда тарсар гузва.
Гьеле педучилищеда кIелзамаз и жегьил руша вичин уьмуьр гьа и хуьруьнви, вичихъ высший образование авай географический факультет куьтягьнавай Абдулакимов Керимахъ галаз сад авуна. Ам, хъсан муаллим хьиз, серли веледрин мегьрибан дидени, хъсан тербиячини я. Адахъ 3 велед ава. Руш Замиради высший образование къачуна, ЦIийи хуьруьн СОШ-да муаллим-психолог яз кIвалахзава. Гада Артика юридический факультет куьтягьна, алай вахтунда Мегьарамдхуьруьн сергьятда авай пограничный постунал кIвалахзава, Малика автодорожный институт куьтягьна.
Адан 3 веледни, чпин кIвал-югъ хьана кьилди яшамиш жезва. Бике муаллимдихъ 9 хтул ава. Хтулрини адаз «чан чи чIехи диде муаллим» лугьузва.