Эхиримжи вахтара чи районда исламдин дин кIвачел ахкьалдар хъувунин месэладиз йис- йисандавай артух фикир гузва. И кардин шагьидар эхиримжи вахтара чи райондин хуьрера ачухнавай цIийи мискIинар я. 22-апрелдиз Курхуьрел цIийи мискIин ачухуниз талукьарнавай райондин динэгьлийрин чIехи межлис кьиле фена. Аниз райондин вири хуьрерин мискIинрин имамар, патарал яшамиш жезвай хуьруьнвияр, хейлин динэгьлияр атанвай.
Межлисда райондин депутатрин Собранидин председателдин заместитель Н. А. Абдулмуталибова, ДР-дин культурадин министрдин заместитель М. Мегьемедрасулова, райондин администрациядин кьилин заместитель С. Велиева, агъсакъалрин Советдин председатель Х. Асланова, дяведин ва зегьметдин ветеранрин Советдин председатель М. Гьасанова, райондин имам Р. Рустамова, адан заместитель ЦIийи хуьруьн мискIиндин имам Ш.Абдулмуталибова ва хейлин маса юлдашри иштиракна. МискIин ачухунин сифте гаф «село Куркент» администрациядин кьил Р. Гьажалиеваз гана. Вичин куьруь рахунра ада мискIинрин тарихдикай, акьалтзавай несил тербияламишунин карда мискIинрин ролдикай, жегьилар мискIинриз атайла, абур нагьакьан крарикай къерех жедайди, пIапIрус-эрекьдикай хкатдайди, диде- бубадин, мукьва-кьилийрин, ярар-дустарин гьуьрмет хуьнин алакъайрин кардизни таъсир ийидайди лагьана. Ада гьакI мискIин эцигунин кардик чIехи пай кутур и хуьруьнвияр тир, алай вахтунда Сургутда ва Санкт Петербургда яшамиш жезвай Адилов Казбеказ, Ибрагьимов Ибрагьимаз, прораб яз кIвалах авур Бабаев Нейратаз, устIарриз, хуьруьнвийрин, вири динэгьлийрин ва кьилди вичин патай чухсагъул лагьана ва абуру гележегдани хуьр патал еке кIвалахар ийидайдахъ межлисда кIватI хьанвайбур инанмишарна.Гаф райондин имам Рустамов Рамазан гьажидиз гана. Ада курхуьруьнвийриз, иниз атанвай мугьманриз цIийи мискIин ачухун мубаракна. Эгер вахтунда динэгьлийри, диде-бубайри, тарс гузвай муаллимри, гьукумдарри, къуватар сад авуна, акьалтзавай несил дуьз рекьел тагъайтIа, нетижаяр хъсанбур тежедайди ашкара кар я. И жигьетдай жегьилар дуьз рекьел гъунин карда диндин маналувал зурба я, - лагьана райондин имам Рамазан гьажиди.
Межлис тухузвайди тир райондин телевиденидин руководитель Я. Ярагьмедова гаф райондин депутатрин Собранидин председателдин заместитель Н. Абдулмуталибоваз гана. Ада, районэгьлийри исламдин пак ивирар, чи бубайрин хъсан адетар хуьнин жигьетдай тухузвай баркаллу кIвалах къейд авунихъ галаз сад хьиз, «Сулейман-Стальский район» муниципальный райондин, райондин депутатрин Собранидин, администрациядин ва кьилди вичин патай Адилов Казбеказ, Ибрагьимов Ибрагьимаз, мискIин эцигунин кардик чпин лайихлу пай кутур вирибуруз къенин межлис мубаракна, ихьтин мярекатри чи халкьарин алакъа мягькемаруниз, адалат, ислягьвал хуьниз еке куьмек гудайди къейдна.
Межлисдал гьакI ДР-дин культурадин министрдин заместитель М. Мегьамедрасулов, агъсакъалрин Советдин председатель Х. Асланов, ветеранрин Советдин председатель М. Гьасанов, хуьруьнви А.Рустамов, хуьруьн 2-нумрадин юкьван школадин директор Н. Алхасов, К. Адилов ва маса юлдашар рахана. Эхирдай анал шаир Сажидина, Р. Набиева мискIиндиз талукьарнавай чпин шиирар кIелна.
Рахунрилай гуьгъуьниз мискIин ачухунин лишан яз «село Куркент» МО-дин кьил Р. Гьажалиева, райондин депутатрин Собранидин председателдин заместитель Н. Абдулмуталибова, мискIин эцигунин кардик вичин лайихлу пай кутур К. Адилова къацу лент атIана.
Эхирдай динэгьлийри мискIинда мевлид кIелна, капI авуна.