Алай девирдин несилдиз Алибег Фатаховахъ галаз чан аламаз рахун-луькIуьндай кьисмет хьанач. Ам лап жегьил яз, 25 йисан яшда аваз, чавай къакъуднай. Акуна кIандай кас тир регьметлуди.
Чун адан гуьрчег къаматдихъ галаз шикилдай, къанажагъдихъ - чи халкьдиз аманат яз тур яратмишунрин хазинадай: дерин руьгьдин, мана-метлебдин жигьетдай алай девирда тешпигь авачир хьтин шииррайни поэмайрай, шиирралди кхьенвай романдайни гьикаятдай таниш я.
Алибеган таяри-туьшери авур ихтилатри чаз адан уьмуьрдихъ галаз дериндай таниш жедай мумкинвал гузва.
-Чи муаллимар Зияудин Эфендиев, Рагьман Рагьманов ва Сейфудин Гьажиев тир. За регьметлудахъ галаз санал 1919-йисалай Цмуррин хуьруьн сифтегьан школада, сад лагьай классдилай башламишна кIелнай. Алибег зигьиндиз гзаф хциди тир, - лугьуз, ихтилатдай Алибеган тай Сефудинов Багьаудин халуди, шаирдикай суьгьбетардай вахтунда, - Асланни Риза рагьметлудан рикI алай дустар тир. Абур пудни санал гъвечIи чIавуз Барзадани Хьтуьхьа, Литални, Гъугъандихъ нуькIверин мукара авай какаяр, шарагар гьисабиз, атирлу некьияр, жуьреба-жуьре чIуру емишар, хийирлу набататар кIватIиз, гад атайла, балугъар кьаз, чуьхуьнагар ийиз вацIара жедай. «- Бес я, хва, вуна ви дустарихъ галаз санал и берекатлу чуьллера сиягьат авур кьван. Гила хуьре ахъайнавай школада кIелна кIанда», - лагьанай дуьньядикай хабар авай Фетягь дахди. Асланазни Ризадиз школадиз къведай мумкинвал хьаначир, зун, хуьруьн сифтегьан школа акьалтIарна, хсуси никIер цаз амукьнай, Алибег лагьайтIа, кIелун давамариз Къасумхуьрел школадиз ракъурнай. Абуруз мал-мулк авайди тушир. Бакудин рабочийвиляй хтана, хуьре вичиз са акьван еке тушир туьквен ахъайнавай Фетягь халуди.
- Алибег зи рикIел, чиг жегьил тир вахтара, къуватдиз дигмиш жезвай жаван чIавара гьикI тиртIа, алама. Кьуршахар кьадай чна чIурарал, гъилерин къуватар алцумдай раган еке къванерал, акъажунар ийидай яргъал мензилдиз катунай. Фетягь халудин гададив къведай кас квачир са тангъахдал авай хуьруьн гадайрик. ВацIарин и патай а патаз хкадарунизни Алибег гзаф викIегь тир, - лугьуз, ахъайдай Агъабегов Рустам халуди.
- Алибег Фатахов, заз чидайвал, аял чIавуз вичин таяр рушарихъ, гадайрихъ галаз иллаки ислягь гада тир. Абуруз еке кьур авай. Суварриз хуьруьн жемятдин аялар, руш-гада талгьана, абурун кьурак кIватI жедай. Парпилагар кутуна, чун кьурак яргъалди, ислягьвилелди къугъвадай. Алибег виридахъ галаз гзаф гьуьрметлу жедай, - еке гьайиф чIугваз Алибеган, лугьудай Майтаб, Шекер, Ишира халайри.
Чаз чидайвал, халис инсанперес тир Алибег Фатахов, - лугьуз, дерин нефес чIугунивди, суьгьбетдай къунши качалахуьруьнвийри Рустамани Эседуллагьа. - Са сеферда чун Махачкъалада расалмиш хьанай кьегьал шаирдал. Кьве хуьруьн жемятарни жузунай чавай ада. Масаниз чун ахъайначир къучагъди. Йиф чи жумарт Алибеган кIвале хьанай. Адан юлдашдини, лезги чIал чидачиртIани, чун гъавурда акьадай урус гафаралди вири мукьвабур хабар кьунай...
Халис лезги хуьруьн къайдада къунагънай чун писателдин жегьил хзанди. А чIавуз абурухъ са гъвечIи рушни авай.
Сагърай чи хуьр!!!