Хайи Куьре бажарагълу шаиррални алимралди хьиз, баркаллу кьегьал рухвайралдини машгьур я.
2007-йисан 27-августдиз 94-йисан яшда аваз чи арадай акъатай ва вичи гзаф йисара къенепатан крарин органра кIвалах авур бажарагълу руководитель, адалатлу хзандин кьил, хъсан инсан милициядин подполковник Насруллаев Мегьамедсаид Насруллаевични ахьтинбурун жергедик акатзава.
М.Н.Насруллаев 1913-йисуз Кьасухуьруьн райондин Сайтархуьре лежбердин хзанда дидедиз хьана. Хайи хуьре сифтегьан, Уллу Гъетягъани 8 йисан школаяр акьалтIарна. Гуьгъуьнлай Дербентдин педучилище кIелна куьтягьна.
1932- 1934-йисара Советрин Армиядин жергейра къуллугъна. Пушкино шегьерда НКВД-дин школада кIелна.
Мегьамедсаид Насруллаева 1934-йисалай 1965-йисан январдин вацралди, начагъвилиз килигна отставкадиз экъечI-далди, милициядин органра кIвалахна. Кьилди къачуртIа, ада дяведин йисара 1941-йисан июндилай 1943-йисан ноябрдалди Агъул районда НКВД-дин начальник яз ва гьа са вахтунда шпионрихъ, дизертиррихъ, бандитрихъ галаз женг тухудай батальондин начальникни яз кIвалахна.
1943-1950-йисара адакай цIийиз тешкилнавай Мегьарамдхуьруьн райондин НКВД-дин начальник хьана.
Гуьгъуьнлай Хив районда МВД-дин райондин отделдин начальник яз ва 1954-1964-йисарани Кьасумхуьруьн райондин къенепатан крарин отделдин начальник яз кIвалахна. 1965-1970-йисара ада Кьасумхуьруьн заготконторадин директорвилин къуллугъни кьиле тухвана.
М.Н. Насруллаеван гзаф йисарин намуслу зегьметдиз Гьукуматдини еке къимет гана. Ам «Трудовое Красное Знамя», «Красная звезда» ва «Знак Почета» орденрин, хейлин медалрин, вири санлай кьурла 20- дахъ агакьна наградайрин сагьиб я. Адан зегьметдин книжкада намуслу зегьметдай гьар йисара малумарнавай 10 чухсагъул авайди, 1962-йисуз адаз багъишнавай тIвар кхьенвай сят ва 1964-йисуз «милициядин отличник» значок ганвайдини къейднава.
Ам гьакI 1989-йисуз «50 йисуз партиядин жергейра» КПСС-дин ЦК-дин значок гунизни лайихлу хьана .
Дяведин йисара ада Агъул районда авур кIвалахрикай 1985-йисуз чапдай акъудай «Чекисты Дагестана» ктабдани кхьенва.
Кьилди къачуртIа, и ктабдин 73-74-чинра икI кхьизва: «…Агъул райондин Буршагърин хуьруьн колхозникри 1942-йисан 13-сентябрдин йифиз Дуфдагъ дагъларин кьилел тайин тушир самолет яргъал вахтунда элкъвез хьайидакай хабар гана. Куьз лагьайтIа йифен геж вахтунда и райондин кьилел самолет акун лап кьери дуьшуьш тир, гьавиляй а чка ахтармишун кьетIна. Гьавиляй аниз кьиле НКВД-дин Агъул райондин отделенидин начальник Насруллаев аваз оперативный группа рекье гьатна.
Тамун чка ахтармишайла анай абуруз чубанрин къайдада парталар алукIнавай кьве жегьил итим акуна. Оперативный группадин членар акурла абур чуьнуьх жез алахъна. Абурун арада гуьлле алай яракьдай - ягъунар кьиле фена, и арада абурукай садал хер хьана. Эхир абур кьведни рей гуниз мажбур хьана. Ахтармишайла абурувай 2 пистолет, абурун патрумар, 11 мина, 6 гранат, абур самолетдай гадарай чкадални 6 парашют, Советрин Союздиз акси гзаф литература ва шпионвилин тадаракар жагъана, кьунвайбурал чубанрин алухрин кIаникай немсерин офицеррин парталар алай.
Кьунвайбурухъ галаз силис тухвайла малум хьайивал, и группадай 4 кас парашютистриз абур цавай гадрай чкадилай, гьар патарихъ фена, чуьнуьх жедай мумкинвал хьана. Силисдин вахтунда малум хьайивал алава делилрин бинедаллаз республикадин масштабда оперативно- розыскной серенжемар кьиле тухвана. Нетижада куьруь са вахтунда Гунибдин ва Лак райондин сергьятра амайбурни жагъурна, дустагъ авуна».
Вичел тапшурмишай гьар са кIвалах намуслувилелди кьилиз акъудун адет хьанвай, вичин жавабдарвал кIевелай гьисс ийидай, гьахъвал кIандай къанажагълу инсан тир адаз халкьдин арада еке гьуьрмет авай.
Хъсан руководитель, тешкилатчи, савадлу пешекар хьиз, Насруллаев Мегьамедсаид Насруллаевич адалатлу хзандин кьилни тир. Са йисан идалай вилик регьметдиз фейи вичин уьмуьрдин юлдашдихъ галаз санал абуру 4 хвани са руш хвена, чIехи авуна, абурукай хайи халкь ва Ватан патал вафалу инсанар хкудна: чIехи хва Сиражудин хуьруьн майишатдин, Фажрудин физикадинни математикадин илимрин кандидатар я. Ростовдин мединститут куьтягьай Фахрудина Москвада авай Сербскийдин тIварунихъ галай илимдинни ахтармишунрин институтда са отделдин зеведиш яз кIвалахзава.
ДГУ-дин инженерно- строительный факультет акьалтIарай Насруллагьа «Дагагропромпроектдин» проектрин институтдин проектрин кьилин инженер яз кIвалахзава. Абурун веледрини чпин чIехи бубадин тIварцIел адан крарал дамахзава ва адалай чешне къачузва.
Эхь, бубайрин мисалда лугьудайвал, катран мукай катран шарагри лув гуда. Вич кечмиш хьайидалай гуьгъуьнизни халкьдин рикIера яшамиш жез амукьдайди са чIавузни рекьидач.
