Инсанар ва кьисметар… Лугьуда хьи, инсан дуьньядиз атанмазди Аллагь таалади адан пелел гележегдин рехъ, кьисмет кхьизва. Белки гьавиляй «Кьисметдихъай катиз жедач» лугьунни ийизва жеди.
1910- йисуз Алидхуьрел дидедиз хьайи Талибов Визихал аял ва жаван вахтара азиятар, четинвилер гзаф ацалтна. Хуьруьн сифтегьан школа акьалтIарай ам III-Интернационалдин тIварунихъ галай колхозда лежбервал авуниз мажбур хьана.
1942-йисан 21-январдиз В. Талибоваз Кьасумхуьруьн РВК-ди армиядин жергейриз эвер гана. Адакай Харьковский военный округдин 2I0-стрелковый полкуна автоматчик-стрелок хьана.
«Хайи ватан, къудратлу уьлкве, ислягьвал ва зегьмет кIани халкь душмандин пацук кутун зи намусди кьабулдач»-хиял рикIеваз женгерик экечIиз хьана В. Талибов. Гьа икI, вич кьиникьикайни фикир тийиз, душмандин хуруз фена ам. Амма… сад ава кIанивал, сад- жеривал. Барабарсуз, гьам техникадин, гьам аскеррин барадай са шумуд сеферда артух тир са женгина, вич-вичелай фенваз, ам душмандин есирда гьатна. 1942-йисан июндилай та 1945-йисан 8-майдалди В. Талибов немсерин лагерра (Италиядин сергьятда) есирда хьана. Четинвилер, азиятар, зиллетар, каш, мекь… Мегер тIимил хьанани абур есирда гьатай дагъвидин уьмуьрда?! Ваъ, «Белки зи кьисмет гьак икI я жеди» лугьуз, ада вичиз сабур гуз алахъзавайтIани, рикIе ажугъвал, душмандиз такIанвал гзаф тир. Юкь агъузнач В. Талибова четинвилерин, азиятрин вилик… 1945-йисан майдин сифте кьилера, есирда гьатнавай гзаф маса офицеррихъни аскеррихъ галаз, В. Талибовни Советрин кьушунри есирвиляй акъуд хъувуна, азадна.
Дяведилай гуьгъуьниз В.Талибова колхозда, совхозда ва консервиярдай заводда зегьмет чIугуна.
-Вучда кьван, фейи уьмуьрдилай, кьисметдилай рази хьуниз мажбур я чун,-чина, са патахъай вичелай аслу тушиз кьилел атай агьвалатри сефилариз, муькуь патахъай ЧIехи Гъалибвилин 65 йисан юбилейдин гьуьрметдай шадвал ийиз лугьузва Визих халуди