Гатфаринни гатун тIебиатдал ял ядай сезондин вахт алукьунихъ галаз алакъалу яз «Дагестансельлес» госучрежденидик акатзавай Дагъустандин гзаф маса чкайра хьиз, чи районрин уртах С. Стальский хуьруьн тамарин майишатдин тамара цIай кьунин дуьшуьшар арадал атунин къурхулувални артух жезва. Гьа вилик вахтара хьиз, тамара цIаяр кьунин дуьшуьшар арадал атунин кьилин себебрикай сад инсан, адан мукъаятвал тахьун я. Адет яз, гьаваяр чими хьунихъ галаз инсанри тамун къерехрив гвай векь ядай векьин чкаяр кьаларикай ва кьурай векьикай михьун патал цIаяр яда. Гьа са вахтунда гар акъатун ва я гуьзчивиликай хкатун себеб яз цIай чиле кьурай пешер ва векь авай тамарани гьатун мумкин я.
Идахъ галаз сад хьиз, алахьай чими йикъара гзаф аялар экскурсийриз, жегьилар ял ягъиз тамун къерехрив гвай булахрал, тамун гуьзел чкайриз фида. Гзаф дуьшуьшра, чна къадагъа ийизватIани, абуру цIаяр хъувуна, анрал шишер язава, маса хуьрекар гьазурзава, гьа са вахтунда чеб хъфидайла аламай цIай хкадарун фикирдай акъатзава. Нетижада гар ахъатайла цIун цIелхемар кьурай векьиз тухун мумкин я. Ихьтин чIуру нетижайрал къведай дуьшуьшар тахьун патал чна мукъаятвал хвена кIанда.
Бубайрин мисалда лугьудайвал, вацIар чилин дамарар ятIа, тамар адан жигерар я. Чаз михьи гьава, серин, къайи ятар гузвай тамар хуьн, абурухъ гелкъуьн, абур цIай кьунин дуьшуьшар тахьун патал гъавурда тунин кIвалах тухун тагькимарун чи гьар садан буржи я.
Тамун чкайра цIай кьунин дуьшуьш хьайитIа суткадин вири вахтунда оперативный дежурныйдиз агъадихъ галай телефондин нумрадиз зенг ийиз жеда: Тел: 89285509750