Мукьвара вичин 90 йисан юбилей къейд ийидай Агъа-СтIалрин хуьряй тир агъсакъал Къазимегьамедов Гьажимегьамедани вич фейи уьмуьр рикIел хкизва. Уьмуьрда укIуь-цуру гзаф акуна адаз. Четинвилер, азиятарни тIимил акунач, хъутIалрани хьана ам. РикI шадардай, сивел хъвер хьайи вакъиаяр, йикъарни тIимил туш.
Гь. Къазимегьамедовахъ галаз авур суьгьбетдай малум хьайивал, ам 1920-йисуз кесиб хзанда дидедиз хьана. Ада хуьре 7-класс, 1940-йисуз Кьасумхуьрел 10-класс акьалтIарна. Гьа и йисуз ам РККА-дин жергейриз къуллугъ ийиз фена. Азербайжандин Къусар шегьерда авай 406-полкунин школа акьалтIарай Гьажимегьамеда Гуржистандин Махарадзе шегьерда стрелковый полкуна отделенидин командир яз къуллугъна. Кар алакьдай ва дирибаш аскер 1941-йисуз Телавидин пияда кьушунрин училищедиз кIелиз рекье туна. 1942-йисан майдин вацра ам лейтенантвилин чин аваз акьалтIарай Гь. Къазимегьамедов къуллугъ давамарун патал 58-армиядин 317-стрелковый дивизиядин 761-нумрадин полкуниз рекье туна. Вичин женгинин рехъ ада Кеферпатан Кавказдин фронтда Моздок шегьер хуьн патал кьиле фейи женгерилай башламишна. Ада вич неинки викIегь аскер яз, гьакI женгинин кар хъсандиз чидай командир язни къалурна. Гьа и кIвалахриз килигна Гь. Къазимегьамедоваз 1942-йисан декабрдин вацра вахтундилай вилик старший лейтенантвилин чин гана.
- Зи уьмуьрда рикIелай алат тийидай крар, вакъиаяр гзаф хьана, - ихтилатзава агъсакъалди, - заз Дагъустандин халкьдин шаир СтIал Сулейман лап мукьувай чидай. Мегер им рикIелай алатдай кар яни?! Къуншидал яшамиш жезвай Сулейманан буба чи кIвализ мукьвал-мукьвал къведай. Адан камаллу ихтилатрихъ за дикъетдивди яб акалдай. Дяведин четин йисара зи рикIел Сулейман бубади заз мукьвал-мукьвал тикрардай гафар хтана: «Чан хва, Ватан жуван чандилайни гзаф кIан хьухь...» Камаллу касдин и гафари заз Ватан мадни кIанарна, къагьриман гьиссерив рикI ацIана зун душмандин хурузни физ хьана.
Эхь, чIехи шаирдин тIвар, адан несигьатар рикIе аваз женгинин рекьерай виликни фена ам. Жуьрэтлувилер, кьегьалвилерни къалурна. Кавказ, Харьков, Киев, Львов ва маса шегьерарни хуьрер азад хъувун патал кьиле фейи женгера иштиракна ада.
... 1944-йисан июнь. Капитан Гь. Къазимегьамедова 1-Украинадин фронтда 3-танковый армиядин 22-мотострелковый бригадада танково-десантный ротадиз команда гузвай. Абуру Львов шегьер ва Украинадин Судовий Вишня, Местиска, Яворова хуьрер азад хъийидайла гзаф кьадар немсерин офицерар ва аскерар есирда кьуна.
- Львовдин мукьув гвай Броди хуьруьн патав чна душмандин кьушунар элкъуьрна гьалкъада туна ва тергна, - рикIел хкизва Гь. Къазимегьамедова. – 27-июлдиз Львов шегьер азад хъувуна ва чи бригада Польшадин Перемышль шегьер галайвал виликди фена...
Польшадин Родомск шегьер ва Обер-Белоу хуьр азад хъийидайла Гь. Къазимегьамедов кьиле авай ротади иллаки еке кьегьалвилер къалурна. Са шумуд касдиз, абурукай яз викIегь агъастIалвидизни Ватандин ЧIехи дяведин 1-дережадин орден гана.
Польшадин чилел Гь. Къазимегьамедовал залан хер хьана. Госпиталда сагъар хъувурдалай гуьгъуьниз ам мад фронтдиз рекье гьат хъувуна.1893-артиллерийский полкунин автоматчикрин-десантникрин ротадин командир яз капитан Гь. Къазимегьамедова Берлиндал гьужум авунин къати женгерани иштиракна. Берлин къачурдалай гуьгъуьниз ада рейхстагдин цлал «Гь. Къазимегьамедов. Агъа стIал. Лезги. Гьахъ винел акьалтна, чун гъалиб хьана!» гафар кхьена.
Гьелбетда, Гь. Къазимегьамедован женгинин рекьикай яргъалди кхьиз, мисалар гъиз жеда. Дяведин йисара ада къалурай жуьрэтлувилерай адаз Ватандин ЧIехи дяведин 1 ва 2-дережайрин, Красная Звездадин орденар, «Кавказ оборона авунай», «За отвагу», «Германиядин винел гъалиб хьунай», «Прага азад авунай», «Ставрополь азад авунай», «Берлин къачунай», «Будапештдин пайдах авай 3I7-стрелковый дивизиядин ветеран» ва маса медалар гана.
Гъалибвал къазанмишна хтай Гь. Къазимегьамедова яргъал йисара Агъа-СтIалрин юкьван мектебда муаллимвиле кIвалахна.
Вахтар къвез физватIани, Гь. Къазимегьамедован рикIелай дяведин йисар, женгинин юлдашар алатзавач. Ада дяведин ветеранар тир саки 200 касдихъ, чи уьлкведин 28 школадихъ, 4 музейдихъ ва гел жагъурдай са шумуд отряддихъ галаз алакъа хуьзва. Саки 20 сеферда Гьажимегьамед халуди 3-танковый армиядин ветеранрин гуьруьшмиш хьунра иштиракна.
Гь. Къазимегьамедов Ставропольский крайдин Новоалександровск шегьердин гьуьрметлу агьалини я.
Яшар хьанватIани, Гьажимегьамед халуди кьуьзуьвал хиве кьазвач. Ада районда, хуьре несигьатвилин еке кIвалах тухузва.
... Физва уьмуьр. Майор, чIехи хзандин кьил тир Гь. Къазимегьамедовни уьмуьрда саки 90 йисан рекьиз фенва. Элкъвена кьулухъди килигзава ам фейи рекьиз. Хуьруьнвийрин, мукьва-кьилийрин, ярар-дустарин, хзандин вилик уьзуьагъ я ам.
Гьажимегьамед халудин уьмуьрдин рехъ мадни яргъади, баркалла алайди хьун чи мурад я.