Эхиримжи йисара чи халкь уьлкведин жуьреба-жуьре регионра жезвай терактрин шагьидар хьана. Алай йисан 29-мартдиз пакамахъ кьве террористкади Москвадин метродин «Лубянка» ва «Культурадин парк» станцийрал хъиткьинардай шейэр кардик кутуна. Хъиткьинарунин нетижада, СМИ-дин такьатри хабар гузвайвал, 39 кас телеф хьана. 70-касдилай виниз хирер хьана.
31-мартдиз, тахминан пакаман сятдин 9 тамам жез 30 декьикьа амаз Къизлярда милициядин работникар авай автомашин шегьердин къенепатан крарин отделдай экъечIайдалай гуьгъуьниз Московский куьчеда акъвазарнавай «Нива» маркадин автомашинда хъиткьинардай шей кардик акатна. Тахминан 20 декьикьа арадай фейила, агьвалат кьиле фейи чкадал силисдин оперативный дестеди кIвалахзавай чIавуз милицейский китель алай, чандилай гъил къачунвай кас сухулмиш хьана ва ада вичив гвай хъиткьинардай шей кардик кутуна. И кьве дуьшуьшдин нетижада 12 кас телеф хьана, абурукай кьуд кас милициядин работникар я.
И чIуру гьерекатар, уьлкведин, Дагъустандин агьалийри хьиз, чи районэгьлийрини пислемишзава, абуру террористриз лянет гъизва.
Ингье чаз са шумуд касди лагьай гафар:
Р. Алибегова, «сельсовет Цмурский» муниципальный тешкилатдин кьил: - Гьайиф хьи, чи халкь террористрин гьерекатрал расалмиш жез им сад лагьай йис туш. Абурун нетижада са тахсирни квачир инсанар телеф жезва. Террориствилин жуьредин тахсиркарвилерин, инсанар чандиз къаст ийиз кьиникьин дуьшуьшрин кьадар, къанун-къайда хуьдай, государстводин властдин органрин, общественный, диндин деятелрин чандиз къаст ийиз алахъунин дуьшуьшрин кьадар артух хьуни инсанрик екедаказ секинсузвал кутазва. Гьавиляй террористрин аксина серенжемар аквадайвал гужлу авун чарасуз я.
З. Межидов, дяведин ветеран, Герейханован хуьр:
- Чи халкьди Ватандин ЧIехи дяведа гъалибвал къазанмишна 65 йис тамам жезва. Амма инсанрин рикIер секин туш, гила майдандиз террористар лугьудай дявекарар акъатнава. Террористриз инсанар лугьуз жедач, абур инсандин кIалубда авай вагьшияр я. Германиядин фашизмдин винел гъалиб хьайи чи халкьдик террористривай кичI кутаз жедач. Диндикай багьна кьуна ислягь девирда инсанар телефзавай алчахриз лянет ва мад сеферда лянет!
- С. Магьмудова, 10 аялдин диде, Эминхуьр:
- Чи уьлкведи, республикади, районди абадвилихъ, мублагьвилихъ йисандавай-суз виликди камар къачузва. И кар, акунрай, са низ ятIани хуш туш. Гьавиляй абуру обществода чIуру гьалар арадал гъун патал терактар тухузва, са тахсирни квачир инсанар телефзава. Яраб, лугьузва за, террорист жедай чIал чидайтIа, ам хайи дидеди вуч ийидайтIа? Зун инанмиш я: вичи хайи гададикай ва рушакай террорист жедайди чир хьанайтIа, дидеди ам гьа хайи чкадал бамишна рекьидай. Терг хьурай дуьньядилай алчахар!