Мегьри вичин гада ашукь хьанвай рушак лишан кутун патал къунши хуьруьз фена.
- Тариф авун туш, зи рушак лишан кутаз атана куь бахтуни гъана, - адетдин жузун-качузун авурдалай гуьгъуьниз башламишна рушан дидеди. – КIандай чкаяр мадни ава. ЯтIани, квелай за ам элкъуьрдач. Мад руш туш-къизил я! Квез ада манияр лугьудайла акуртIа-билбил я! Мехъерик кьуьлер ийидайла вирида зи рушал гьейранвал ийида - на лугьуди, ам артистка я. Мадни зи рушаз машин гьализ чида. Куьлуь-шуьлуь пешеяр мадни ква... Гуьрчегвиликай, буй-бухахдикай мад рахамир - женнетдин къуш я! Я вах, бес а куь гададик вуч пешеяр квайди я, ам куьн иеси я?
Рушан дидеди ийизвай ихтилатар акурла Мегьри са геренда серсер хьана, гаф акъат тийиз, амукьна.
- Я вах, вун вучиз кис хьана, ви гададик са пешени квачни? - хабар кьазва рушан дидеди. - Пеше квачтIани къайгъу авач, зи руша чирда адаз пешеяр. Вири кIвалахар чиз садни хайиди туш. Чир жеда абур.
- За ваз вуч лугьун, зи гададикни пешеяр квачиз туш, - кардин гъавурда акьурла айгьамдивди лагьана Мегьриди. - Зи гадади гзаф тIеамлу хуьрекар гьазурда - на лугьуди, ам ашпаз я. Кал ацада, перемар чуьхуьда, абуруз уьтуь яда...
- АкI ятIа, абур чеб-чпиз лайихлу жегьилар я, - шад хьана рушан дидедиз. - Абурухъ хъсан кIвал-югъ жеда.
Амма, Мегьридай мад гаф акъат хъувунач. Ам гьа атайвал рекье гьат хъувуна...
