Немсерин фашистрал гъалибвал къазанмишайдалай инихъ 65 йис тамам жезвай сувариз вири уьлкведа гьазурвилер аквазва. Шадвалдай вакъиа я. Амма инсанрин рикIерик сефилвал кутазвай карни ава: йисар къвез фирдавай Ватандин ЧIехи дяведа гъалибвал къазанмишуник пай кутур ветеранрин-кьегьалрин кьадар тIимил жезва. Ингье, алай вахтунда районда ветеранрикай амайди 15 кас я. Абурукай садахъ – Чуьхверхуьрелай тир Рагьимханов Казимханахъ галаз чун и йикъара гуьруьшмиш хьана.
- 65 йис алатнаватIани, хтул, дяведин йисар, вакъиаяр къени зи бейнидай акъатзавач, - лугьузва агъсакъалди. – Ватандин ЧIехи дяведин ялавар хкаж жедалди вилик, 1939-йисан 1-сентябрдиз Германияди Польшадал гьужум авуналди, Дуьньядин кьвед лагьай дяве башламиш хьанай. Польшадилай гуьгъуьниз немсерин кьушунри Европадин са жерге маса уьлквеяр – Дания, Бельгия, Голландия, Люксембург, Франция ва масабур чпин пацук кутунай. Немсерин фашистрин кьушунар тамамвилелди кукIварунин акьалтIай жавабдар везифа Советрин уьлкведин ва адан Яракьлу Къуватрин хиве гьатнай. Абуру лагьайтIа, чпин хиве гьатай виридалайни тарих патал метлеб авай и везифа кьегьалвилелди кьилизни акъудна.
К. Рагьимхановахъ галаз авур суьгьбетдай малум хьайивал, адаз дяве башламиш хьайи сифте йикъара армиядин жергейриз эвер ганай.
- Дяве физвай вири вахтунда армияда хьанатIани, заз женгера иштиракун кьисмет хьанач, - давамарзава ихтилат ветеранди. – За Гуржистандин Поти шегьердин патав гвай частуна къуллугъна. Чна фронт патал тамай кIарасар атIузвай, жуьреба-жуьре маса кIвалахар тамамарзавай, фронтдиз куьмекар гузвай.
Гьар са кIвалах гъиляй къвезвай дагъви гададал частунин командованиди жуьреба-жуьре маса крар тапшурмишзавай. ИкI, тамай кIарасар акъуд хъийизвай балкIанрин кIвачериз леэнар ягъун, арабаяр ремонт хъувун К. Рагьимханован хиве авай.
- За кIвачериз леэнар ягъай балкIанар поездриз ягъиз фронтдиз, маса чкайриз тухвай дуьшуьшарни са шумудра хьанай, - лугьузва агъсакъалди.
К. Рагьимханова 1947-йисалди армиядин жергейра къуллугъна. Вичин хиве авай везифаяр намуслудаказ кьилиз акъудай адаз Ватандин ЧIехи дяведин 2-дережадин орден, медалар гана. Дяведин йисара К. Рагьимханов лайихлу хьайи «За отвагу» медаль адав 2005-йисуз, Ватандин ЧIехи дяведа гъалибвал къазанмишайдалай инихъ 60 йис тамам хьунин юбилей къейд ийидайла, Кьасумхуьрел вахканай.
Дяведилай гуьгъуьниз К. Рагьимханова саки 45 йисуз производствода намуслувилелди кIвалахна.
Казимхан бубадин яшар 87 йисалай алатнава. Ам мукьвал-мукьвал жегьилрихъ, школьникрихъ галаз гуьруьшмиш жезва, ада абуруз дяведин йисарикай, чи халкьдин кьегьалвиликай суьгьбетар ийизва, несигьатчивилин кIвалах тухузва.
