25-мартдиз райадминистрациядин заседанийрин залда райондин карчийрин умуми собрание кьиле фена. Ам, собрание эвер гунин макьсаддикай ва анал гьялзавай месэлайрикай куьрелди лугьуналди, райондин карчийрин Союздин правленидин председатель Х. О.Асланова ачухна ва кьиле тухвана.
Ада райондин гъвечIи ва юкьван бизнесдин карчийри (предпринимателри) райондин экономика вилик тухунин, адан бюджет арадал гъунин кардик кутазвай паюникай, гьалтзавай четинвилерикай, алай вахтунда и жигьетдай хцидаказ вилик акъвазнавай месэлайрикай гьахъ-гьисабдин куьруь доклад авуна.
Докладчиди къейд авурвал, алай вахтунда районда хуьруьн майишатдин бязи хилера, алишверишдин, агьалийриз жуьреба-жуьре къуллугъар авунин рекьерай 1062 карчиди кIвалахзава. Абурукайни 220 кас юридический ксар ва амайбурни физический ксар я. Им, гьелбетда, райондин экономика вилик тухун патал еке къуват я. Гьа са вахтунда, - къейдна ада, - чи гьукуматди гъвечIи ва юкьван бизнесдин месэладиз кьетIен фикир гузватIани, хуьруьн майишатдин бязи хилер вилик тухун патал пулдин еке кредитар ахъайиз, куьмекар, инвестицияр кардик кутадай мумкинвилер гузватIани нетижаяр са артух рикIер шадардайбур жезвач. Са бязибуру, малар хуьда, багълар кутада лугьуз, пулунин еке кредитар къачуна, абур чпин хсуси маса рекьериз харж авуна, а пул вахкуникай кьил къакъудиз, и жавабдарвал, гзаф дуьшуьшра чпиз и кардикай гьич хабарни авачир, «поручителрин» хивез вегьена, акьалтIай татугай гьалар арадал гъанва.
Хуьруьн майишатдин продукция гьасилзавайбурални, чкайрал хаммал гьялдай промышленностдин карханаяр тахьун себеб яз, четинвилер гьалтзава, продукциядин жуваз акъваззавай къимет чIехиди жезва, нетижада 200 далай виниз карчияр чпи тухузвай карчивал акъвазаруниз мажбур хьана. Вичин рахунра ада карчийриз кIвалахдай шартIар яратмишун, абурун интересар хуьн патал карчийрин Союздин правлениди райондин къайдаяр хуьдай органрин ва налоговый инспекциядин работникрихъ галаз тайин кIвалах тухвайди къейдна. Гьа са вахтунда гзаф карчийри вахтундамаз чпин герек тир документация гьазуруниз, талукь органрин истемишунар кьилиз акъудуниз бес кьадар фикир гузвач, чпин карханайрин, туьквенрин вилик квай чкайра михьивал, къайда хуьнал бес кьадар амал ийизвач.
Гуьгъуьнлай анал и месэладай вичин фикирар ва теклифар гваз муниципальный райондин администрациядин кьилин заместитель Р. А. Муталибов рахана. Ада залда ацукьнавайбурун патай атай са жерге суалризни тамам жавабар вахкана. Кьилди къачуртIа, карчийриз са йисан къене чпивай къачузвай садтир налогдин кьадар 100 процентдилай виниз артух хьунин себебар, ЦРБ-дин вилик алишверишдин базар алай чкадал алвер ийидай гъвечIи чкаяр эцигун патал чпи гайи пулунин кьисмет гьикI жедатIа, чпи алвер ийизвай чкайрин вилик са налогни тагуз, а чкаяр чиркинариз, чпин бизнесдиз кьецI гузвайбурун жигьетдай гьихьтин серенжемар кьабулдатIа чир хьана кIанзавай.
И месэладай анал талукь къарар кьабулна.
Гуьгъуьнлай анал, ачух сесер гуналди, цIусад касдикай ибарат яз райондин карчийрин Союздин правленидин цIийи состав ва адан председателвилени чи районда машгьур карчи ва райондин Собранидин депутат М. М. Аскеров хкяна.
Эхирдай анал рахай райадминистрациядин кьилин сад лагьай заместитель Агьмедов Мусаиб Гьажибалаевича райондин карчияр чпин дердияр, райондин экономика вилик тухун патал чпин фикирар ва теклифар гваз санал кIватI хьун тебрикна, собранидин кIвалахдиз итог яна. Ада карчияр райондин руководстводи инлай кьулухъни гъвечIи ва юкьван бизнес вилик тухуниз еке фикир гудайдахъ инанмишарна, абурувай кIвалахда гьалтзавай четинвилерин ва гьакIни меслятрин патахъай чпихъ мумкинвал хьайи гьи вахтунда хьайитIани райадминистрациядиз къвез жедайди лагьана.
Гьа иналди райондин карчийрин собраниди вичин кIвалах акьалтIарна.
