Мукьвара рагъэкъечIдай патан женгинин искусстводин жуьрейрикай сад тир кудо-дай кьиле фейи Россиядин чемпионатда Эминхуьряй тир стхаяр Муса ва Ислам Рамазановри чпин заланвилин категорийрай 1-чкаяр кьуна ва Россиядин чемпионвилин тIварар къачуна. И йикъара Ислам Рамазанов ватандиз хтанвай. 26-мартдиз Россиядин чемпион И. Рамазанов «Сулейман Стальский район» муниципальный райондин Кьил Имам Музамудинович Яралиева кьабулна. И гуьруьшда райондин депутатрин Собранидин Председателдин заместитель Н. Ш. Абдулмуталибова, чемпиондин сифтегьан тренер А. А. Мегьамедкеримова, Эминхуьруьн патай райондин Собранидин депутат М. З. Мегьамедова, массовый информациядин такьатрин векилри иштиракна.
- Зун кудо-дай кьиле фейи Россиядин чемпионатда 270 единицадин категориядай гъалибвал къачур Ислам Рамазанов тебрик авунал шад я, - лагьана Имам Музамудиновича. – Лагьана кIанда: и чемпионатда Исламан стха Мусадини иштиракна ва 240 единицадин категориядай гъалибвал къачуна. За райондин администрациядин, Собранидин депутатрин ва вири районэгьлийрин патай стхаяр тир Рамазановриз къазанмишнавай агалкьунар мубаракзава, къенлай къулухъни абурухъ мадни еке агалкьунар хьана кIанзава.
И. М. Яралиева къейд авурвал, спортдин рекье Исламани Мусади сифте камар хайи хуьре къачуна. Алай вахтунда абур спортдин международный классдин мастерар я.
Тебрикдин хуш келимаяр рахайдалай гуьгъуьниз Имам Музамудиновича И. Рамазановаз муниципальный райондин Гьуьрметдин грамота ва къиметлу пишкешар гана.
Вич кьабулунай ва хуш келимаяр лугьунай Ислам Рамазанова Имам Музамудиновичаз чухсагъул лагьана.