Райондин Культурадин Дворецдин патав «Куьре» тIвар алаз фольклордин коллектив тешкилна 5 йис жезва. Адаз вич манидар, гьа са вахтунда шаирни тир Назифа Юркъулиевади регьбервал гузва.
-Чи коллективдин репертуардик халкьдин куьгьне манияр, виликан адетар къалурзавай сегьнеяр, лезги кьуьлер ква,- лугьузва Н.Юркъулиевади.- Абур чна районда тухузвай шадвилин мярекатра, килигунрани конкурсра, фестивалра къалурзава. Абур агьалийри хушвилелди кьабулни ийизва. Шаз чна Дербентда тухвай шадвилин са шумуд мярекатдани иштиракна.
Фольклордин «Куьре» коллектив 16 касдикай ибарат я. Манидарар, ашукьар, музыкантар, гьевескар артистар тир Селимат Гьажиевади, Агъарагьим Агъарагьимова, Перихалум Къазанбеговади, Эминулагь Кьадиева, Майила Ягьяевади, Бурлият Гьажиевади ва масабуру коллективдин кIвалахда активвилелди иштиракзава.