Акьулбалугъвилин аттестат къачун патал Кьасумхуьруьн юкьван школада за имтигьанар вахкузвай. Тарихдин (историядин) тарсунай чирвилериз къимет гузвай югъ тир. Чи классда экзамендин комиссияди кIвалахзавай. Председатель школадин директор Абдуллаев Рамазан Абдуллаевича, экзаменатор Мегьтиханов Муханжир Рамазановича, членрини - Къагьриманов Мегьамед Тегьмезовича ва Меликов СултIангьамид Меликовича дикъетдивди имтигьан кьазвай.
Зи билетдин кьвед лагьай суал «СССР-да культурный революция» тир. Билетдин суалдиз лазим тирвал жаваб гайидалай гуьгъуьниз, за алава хъувунай: - Культурный революция Дагъустанда метлеблудаказ тухунин кардик зи хуьруьнви Алибег Фатахова дурумлу пай кутуна. А уьлкве патал важиблу гьерекатда Фатахован яратмишунрин шериквал екеди хьана. Ада лезги литературада хейлин цIийивилер турди хьиз, виридагъустандин литературада эвелимжи яз азаб-зиллетдин мавгьуматди кабабарай, къе дуьньядиз экуь кьве вил ачухна, азаддиз килигзавай дишегьлидин образ устадвилелди яратмишна («Гуьлпери» ва масабур) Прозадин диб-дувул кутурдини Алибег Фатахов хьана («Риза», «Газет» ва масабур).
- Яргъи жезва, - лагьанай за. - «КьатI-кьатI авур зунжурар» - шиирралди кхьенвай роман анжах са лезги литературада ваъ, ам гьакI Дагъустандин литературадин сад лагьай чIехи яратмишун я. Ахьтин эсер къецин юкъузни мад чи медениятдин хзанда авач. Культурный революция тухун А. Фатахован яратмишунрин кьилин тема хьанай».
И гафар лагьайла, Рамазан Абдуллаевича (вичиз Аллагьди рагьмет гурай, женнетда ам шак алачиз авайди я) вичин гьамиша акуна кIан жедай сарар къалурна, хъвернай ва заз аферин малумарнай. Амай муаллимри, классдин секинвал чIур тежедайвал, дамарар тIарамарна, яваш ванцелди капар янай (чпиз рагьмет гуй).
Эхь, зи муаллимриз Алибег Фатахов гзаф кIандай; шаирдиз, гьикаятчидиз лайихлу гьуьрметдай.
Виш йис жезва ам хайидалай инихъ цIинин йисуз. Къецин юкъузни, гележегдани чи лезги халкьди милли литературадин бине эцигай, лап жегьил яз дуьньядилай фейи Алибегаз жанлудаз хьиз гьуьрметзава, тавазвалзава ва ийида.