Мектебдин гьеле гъвечIи классра кIелдай чIавалай Уружбекова Шамамадин рикIе къецепатан чIаларин муаллим хьунин фикир гьатна. И пешедал адан рикI гзаф ацукьнавай. Гьа икI мектебдин йисарни акъатна, мектебни ада хъсан чирвилер аваз куьтягьна. Яргъалди фикир тавуна Шамама Дагъустандин Государстводин пединститутдик экечIна ва 1983-йисуз анин немс ва инглис чIаларин отделение хъсан чирвилер аваз акьалтIарна.
Жегьил муаллимдиз Сийидрин хуьруьн юкьван мектебда к1валах авун кьисмет хьана. Ина ада старший пионервожатыйвилин кIвалахни ийиз, инглис чIалан тарсарни гуз хьана. Гьа инлай Шамамадин зегьметдин рехъни башламиш хьана.
ИкI, ада Сийидрин мектебда аялриз англилис чIалан сирер чириз, вичин предметдал абур ашукьариз эгечIна. Аялрин иштираквал ва куьмекарни галаз ада хейлин герек къвезвай схемаяр, плакатар ва маса затIар гьазурна кабинет кардик кутуна. Кабинетда герек гьар жуьре затIар гъилик хьайивиляй аялрин чирвилерни авайдалай артух ва мягькем жез эгечIна.
Алай вахтунда, Шамама Незирмамедовнади ина саки кьве йисуз зегьмет чIугуна, ада Курхуьруьн М. Рагьимован тIварунихъ галай юкьван мектебда немс чIалан тарсар гузва, вичин хивевай и жавабдар кIвалах намуслувилелди кьиле тухузва. Ина лагьайтIа, тарсара, практикадин кIвалахра герек вири затIар – немс чIалан газетар, ктабар, плакатарни схемаяр гзаф ава. Абурукай, муаллимди хьиз, аялрини гегьеншдиз менфят къачузва.
Ам кIвалахдин тамам тежриба хьанвай, гьар са аялдин къилих чидай юлдашрин арада авторитет ва гьуьрмет авай муаллим я. Вичин тежриба жегьил муаллимризни чирзава. Немс чIал аялриз гзаф кIан я, и рекьяй чирвилерни деринбур жезва. И карни аялри сифте мектебда, ахпа районда, гуьгъуьнлайни республикада тухузвай олимпиадайра кардалди тестикьарзава.
2006-йисуз республикадин олимпиадада призовой чка кьур Мегьамедова Наида ДР-дин образованидин ва илимдин Министерстводин Дипломдиз лайихлу хьана. И кардин куьмекни галаз ам ДГУ-дин къецепатан чIаларин факультетдиз кьабулна ва ана хъсандиз кIелзава.
2008-йисуз Меликова Эльмиради 3-чка кьунай. ЦIинин йис мадни бегьерлуди ва рикIел аламукьдайди хьанва. Чпин чирвилералди вахар тир 9-классда кIелзавай Диана ва 11-класс куьтягьзавай винидихъ тIвар кьунвай Эльмира Меликовайри республикадин олимпиадада немс чIалай 3-чкаяр кьуналди, Дипломар гваз хтанва.
Гьелбетда и кардик абур олимпиадайриз хъсандиз гьазурай Шамама Уружбековадин зегьметдин еке пай ква.
Инал чарасуз къейдна кIанзава: Шамама гьар са тарсуниз лап хъсандиз гьазур жезва. Нетижада тарсуна амаз аялриз адан мана-метлеб чирни жезва. Имни, гьелбетда, тарсунин асул метлеб я. Вичин кIвалахдикай, тежрибадикай Шамама Незирмамедовнади педсоветрин заседанийрал, методобъединенийрал суьгьбетар ийизва, меслятарни гузва.
Эхиримжи йисара адан гъилик кIелна мектеб акьалтIарай 24 аялдикай 16 да вузрани юкьван учебный заведенийра кIелзава. ИкI, Шихбабаев Альберта Санкт-Петербургдин военный училищеда, Нурмегьамедов Шабана политехнический университетда, Гьажалиев Гьажиди правовой академияда, Рустамова Регинади ДГУ-дин социальный факультетда кIелзава. Абуру чпин муаллим рикIелай ракъурзавач, адахъ галаз алакъа хуьзва. Шамама Назирмамедовна 6- классдин руководитель я. Ада диде-бубайрихъ галаз сих алакъада аваз аялрихъ галаз еке тербиядин кIвалахар тухузва.
Вири аялар общественный тапшуругъралдини таъминарнава. Мукьвал-мукьвал гьар жуьре викторинаяр, ктабар хуьнин килигунар- конкурсар тухузва, цлан газетни акъудзава.
Гьелбетда ада чIугур ва чIугвазвай зегьмет къимет тагана тазвач.
ИкI, 2005 ва 2006-йисара ада «Учитель года»- конкурсра иштиракна ва призерни хьанай. Ам гзаф сеферра райондин образованиедин управлениедин, ДР-дин Образованиедин ва илимдин Министерстводин Дипломралди ва райадминистрациядин Гьуьрметдин грамотайралди, республикадин «Халкьдин образованиедин отличник» знакдалди руьгьламишнава.
Шамама Незирмамедовна патал алатай 2009-йис рикIел аламукьдайди хьана. Ам «Россиядин Федерациядин образованиедин Гьуьрметлу работник» лагьай знакдиз лайихлу хьана. Аквазвайвал, Шамама муаллим неинки вичин пешедал ашукь, адал рикI алай, вичин уьмуьр аялриз бахшнавай кас я.