60 кIвал авай ХипитIрин хуьряй Ватандин ЧIехи дяведин йисара фронтдиз 63 кас фенай. Абурукай 41 кас Ватандин азадвал патал кьиле фейи къати женгера игитвилелди телеф хьана. Гъалибвал къачуна хтай 22 касдикай къе хуьре амайди са кас – Агъаметов Мегьамедхан я. И йикъара чун ветерандиз мугьман хьана.
Малум хьайивал, Ватандин ЧIехи дяве башламишайла Мегьамедхан, жаван гада яз, хуьруьн Кагановичан тIварунихъ галай колхозда лежбервилел машгъул тир. 1942-йисан сифте кьилера, 18 йис тамам хьанмазди, ам гуьгьуьллувилелди фронтдиз фена. Сифтедай ада Гуржистанда пияда кьушунрин пуд вацран школада женгинин сифтегьан вердишвилер къачуна. Ахпа ам пулеметчик яз 1-Украинадин фронтдин составда аваз женгерик экечIна. Адан женгинин рехъ четинди ва яргъиди хьана: Сталинград, Курск, Брянск, Минск ва гзаф маса шегьерар, гьакIни вишералди хуьрер азад хъувур женгер адан бейнидай къени акъатзавач. Дагъвидиз хас тирвал, М. Агъаметова женгера жуьрэтлувилер къалурна, душмандиз къати ягъунар кьуна.
1944-йисан юкьвара М. Агъаметовал са женгина залан хер хьана. Госпиталда сагъар хъувурдалай гуьгъуьниз, инвалид яз, ам хуьруьз хтана. Женгера къалурай кьегьалвилерай адаз Ватандин ЧIехи дяведин 2-дережадин орден, «Германиядин винел гъалиб хьунай», «За отвагу» ва маса медалар гана, кьуд сеферда адаз В. И. Сталинан тIварунихъай чухсагъулар малумарна.
М. Агъаметова гуьгъуьнлай ХипитIрин Кагановичан тIварунихъ галай колхозда фермадин зеведишвиле, бригадирвиле, «Аламишинский» совхозда харат устIарвиле, кассирвиле намуслувилелди зегьмет чIугуна. Идан гьакъиндай адаз «За доблестный труд» ва «Зегьметдин ветеран» медалар гуни ачухдиз шагьидвал ийизва.
Дяведин ва зегьметдин ветеран чIехи ва гьуьрметлу хзандин кьилни я. Яшар 85 йисалай алатнавай М. Агъаметова хуьре несигьатчивилин еке кIвалахни тухузва.