Лезгийрин къадим суваррикай сад тир Яран сувар райондин центрдал-Кьасумхуьрел- вири халкьдин иштираквал аваз, шад гьалара кьиле тухун фадлай хъсан адет хьанва. И кардиз виликамаз талукь тир гьазурвилерни акунвай.
21-март. И йикъан сятдин кьведаз райцентрдал суварик, кIеретI-кIерет хьана, жегьилар, чпин хтуларни галаз яшлу инсанарни къвезвай. В.И. Ленинан тIварунихъ галай майдандал суварин сегьне ва яран цIай куькIуьрун патал кIарасрин хара туькIуьрнавай.
Суварин шадвилер Мегьарамдхуьруьн райондай атанвай цавун пагьливандин къугъунрилай ва адахъ галай квасадин-цIегьрен шад кьуьруькрилай башламиш хьана. Майдандал и сувариз талукьарна путар хкажунай, шалмандиз акьахунай акъажунарни физвай.
Сятдин 3 тамам жедайла райондин культурадин Дворецдин виликай суварин сегьне галайвал кьиле райондин депутатрин Собранидин председателдин заместитель Н. Ш. Абдулмуталибов аваз жавабдар къуллугъчияр, милли парталар алай культурадин работникар, цIийиз тешкилнавай «Куьре» ансамблдин кьуьлердайбур, кьве къвалаллаз гъилера куькIуьрнавай чирагъар авай жегьилар, музыкадин ван кьилеллаз, суварин майдандал атана.
Яран цIай куькIуьрунихъ галаз санал суварин межлисни башламиш хьана.
Ам, майдандал кIватI хьанвайбуруз ва вири районэгьлийриз къадим Яран сувар мубарак авуналди, адан тарихдикай куьруь гаф рахуналди, Я.Ярагьмедова ачухна.
Суварин майдан сифте «Куьре» ансамблдин кьуьлердайбурун ихтиярда вугана. Абуру авур кьуьлер суварин иштиракчийри еке хушвилелди кьабулна. Гуьгъуьнлай инсанрин рикIер машгьур манидар Эльмира Къарахановади вичин манийралди шадарна.
Гаф муниципальный райондин администрациядин кьилин заместитель Велиев Савин Мирзоевичаз гана. Ада райондин руководстводин ва гьакIни вичин патай вири районэгьлийриз сувар мубарак авуна ва тебрикдин хуш келимаяр лагьана.
Гуьгъуьнлай анал райондин Культурадин Дворецдин манидарри лезги халкьдин са шумуд манидикай ибарат тир попури тамамарна.
Микрофондихъ атай и суварин тешкилатчийрикай сад тир «сельсовет Касумкентский» муниципальный тешкилатдин кьил Бремов Брем Керимовича и хуьруьн администрациядин тIварунихъай межлисдин иштиракчийриз ва гьакIни вири районэгьлийриз Яран сувар мубарак авуна ва и сувариз талукьарна спортдин рекьяй тухвай акъажунра гъалиб хьайи ва гьакIни тафаватлу хьайибурув (путар хкажунай ва кьакьан шалмандин кукIвал кьван фад акьахунай) сад лагьай чкаяр кьурбуруз гьар садаз 1500 манатдин пулдин пишкешар авай, амай тафаватлу хьайибурувни тайин кьадарра пул авай конвертар шад гьалара вахкана. Путар хкажунай 1- чка кьурдаз кьилин приз тир гьер гана.
Райондин аялрин музыкальный школадин далдамчийрин дестеди устадвилелди тамамарай дагъдин везинри и межлис мадни гурлу ва цицIи авуна.
Манидарри, сада-сад эвез ийиз, суварин межлис яргъалди давам хьана. И межлисдин къабачи- квасади (артист Закир Алискеров) ам мадни гурлу авун патал еке чалишмишвилер авуна, иллаки гъвечIи аялрив кьуьлер ийиз таз, абуруз вичин чантадай савкьватар гуз, абурун активвал хкажиз хьана, вичини зарафатдин са шумуд мани лагьана.
Межлисдин эхирдай анал и сувариз талукь милли хуьрекар гьазурунин конкурсда тафаватлу хьайибурузни пулдин пишкешарни гана.
И мярекат санлай кьурла хъсан тешкиллувал аваз кьиле фена ва ам райондин культурадин уьмуьрда лишанлу са вакъиадиз элкъвена.
