- Дяве мусибат, цIай-гум, кашни мекь я, ам вуч лагьана рикIел хкида, дуст кас, - суал гудай къайдада лагьана Герейханован хуьре яшамиш жезвай чантархуьруьнви Межидов Зияудина и йикъара зун газетдиз макъала кхьин патал вичин патав фейила.
Са тIимил вахтунда чина сефилвал гьатна хияллу хьайидалай гуьгъуьниз З. Межидова гъана столдал зи вилик вахтуни хъипи авунвай дяведин йисарин документар, чарар, вичиз фронтда къалурай кьегьалвилерай ганвай наградаяр эцигна. «Женгерин цIаярай игитвилелди экъечIай халис дагъви я» - хиял фена зи рикIяй.
Ветерандин чарар, документар са-сад гъилелай ийиз, жуван блокнотда къейдерни ийиз, за Зияудин халуди ийизвай суьгьбетдихъ яб акалзава.
Малум хьайивал, 1924-йисан апрелдиз дидедиз хьайи Зияудин Межидовичан аял ва жаван вахтарни регьятбур, лугьудайвал, «рагъ хъуьрейбур» хьанач. Дах фад рагьметдиз фена, кIвалин, аялар хуьнин вири везифаяр дидедин хиве гьатна. Чантархуьряй Гъетягъиз физ-хуьквез Зияудина школадани кIелзавай, хтайла дидедизни куьмекар гузвай. Гьа икI ада 1939-йисуз 7-класс акьалтIарна, дидедихъ галаз колхозда кIвалахна. 1942-йисуз Чирюртдин зегьметдин фронтдани адал четинвилер тIимил ацалтнач. Дурум гана абурузни рикIе къаст авай гадади.
- Зияудин халу, фронтдиз фейи югъ рикIел аламани? – хабар кьуна за ветерандивай.
- Вири уьмуьрда рикIелай тефидай вакъиаяр, дуьшуьшар хьиз, йикъарни авайди я, - лагьана Зияудин Межидовича. -1943-йисан 17-мартдиз зун гуьгьуьллувилелди фронтдиз фена. Ватан къурхуллувилик квайла завай секиндиз кIвале ацукьиз хьанач, и кар зи рикIи кьабулнач.
Женгинин сифте чирвилер ва вердишвилер З. Межидова Гуржистанда къачуна. Мусибатдин дяве адаз Украинадин 2-фронтдин составда авай къати женгерик экечIайла вичин вилералди акуна. Къати женгер чIугуналди душмандикай хвейи, гуьгъуьнилай немсери кьунвай, абур азад хъийиз З. Межидов виликди фейи шегьерар, хуьрер гзаф хьана.
- Женгер, ягъунар кьиле фидайла кичI, къурхуллувални акат тавуна жеч, - сивяй и гафар акъатайдалай гуьгъуьниз утанмиш хьанатIани, хабар кьуна за ветерандивай.
- Сад-вад югъ хьайила дявени вердиш жедай затI я, хтул, - лагьана Зияудин Межидовича. – КичIе хьуникай рахайтIа, женг кьиле фидайла гьич садани вич кьиникай фикирзавайди туш, виридан рикIе авайди душман терг авун я. ГьакI хьайивиляй чи халкь, Яракьлу Къуватар фашистрин Германиядал гъалибни хьана.
Украинадин Мелитополь шегьер немсерикай хуьн патал кьиле фейи къати са женгина викIегь дагъвидал залан хер хьана. Сифтедай дивизиядин санчастуна, гуьгъуьнилай Бакудин госпиталда сагъар хъувур З. Межидов, кIвализ рахкурзавайтIани, мад фронтдиз хъфена, женгерик экечI хъувуна. Пуд вацралай адал мад хер хъхьана. Еревандин 14-72-нумрадин госпиталда сагъар хъувурдалай гуьгъуьниз, инвалид яз, З. Межидов 1944-йисан эхирра хуьруьз хтана.
Фронтда къалурай кьегьалвилерай Зияудин Межидовичаз Ватандин ЧIехи дяведин 2-дережадин орден, «За отвагу», «За боевые заслуги», Жуковскийдин ва маса медалар гана, 5 сеферда адаз И. В. Сталина чухсагъулар малумарна.
Фронтда кьегьалвилер къалурайди хьиз, З. Межидова производстводани намуслувилелди зегьмет чIугуна. ИкI, ада 1945-1952-йисара Чантархуьруьн колхозда складчивиле, фермадин зеведишвиле, Уллугъетягърин хуьруьн Советда хуьруьн майишатдин агентвиле кIвалахна.
1953-йисуз З. Межидов хзанни галаз Герейханован тIварунихъ галай совхоздиз куьч хьана, кIвал-югъ кутуна. И йисалай 1980-йисалди ада ина жавабдар хейлин къуллугъар кьилиз акъудна. Нетижада, фронтда къалурай кьегьалвилерай гайи орденрални медалрал «За трудовой доблесть» медаль, «Коммунистический зегьметдин зарбачи» знакар алава хъхьана. Адахъ гьакI ЧIехи Гъалибвилин юбилейрин са шумуд медаль, РФ-дин Президентдилай хтанвай Гъалибвилин суварар тебрикзавай телеграммаярни ава.
Дяведин ва зегьметдин ветеран, 1-группадин инвалид Зияудин Межидовичахъ 6 велед, 25-дав агакьна хтулар ва птулар ава.
Чаз малум хьайивал, яшар 86 йисав агакьнаватIани, Зияудин Межидовича кьуьзуьвал хиве кьазвач, я ам секиндиз кIвалени ацукьнавач. Ветеран салахъни гелкъвезва, адахъ чIижерин куьнуьярни ава. Ада жегьилрин арада несигьатчивилин еке кIвалахни тухузва.
Чазни адахъ мягькем сагъламвал хьана кIанзава.
