Ингье живер, къаяр, гьавадин дегишвилер гваз атай хъуьт1уьн эхиримжи варз тир феврални акъатна, гатфарин сифтегьан варз тир мартни алукьнава. Ада чаз вуч гьазурнава ва ам гьавадин гьакъиндай гьихьтинди жеда?
Дагъустандин гидрометцентрди хабар гузвайвал, алай вахтунда гьавадик мекьивал куматIани, 8 мартдин дишегьлийрин суварилай гуьгъуьниз ам чимивилихъ элкъведа ва гатфари вич къвезвайдакай хабар гуда.
Санлай кьурла и вацран гьавадин чимивили юкьван гьисабдалди 3-4 градус тешкилда, дагълух районра 0-1 градусдин чими жеда. Къайи гьава вацран сифтегьан йикъара жеда. Йифиз 3-8 градусдин, дагълух районрани 7-12 градусдин мекьивилер амукьда. Юкъуз 2-7 градусдин чими жеда, 3 градусдин мекьивилелай 2 градусдал къведалди чимивал жеда.
Вацран са бязи йикъара гьавадин температура 15-20 градусдив агакьна, дагълух районрани 10-15 градусдин, са бязи чкайрани 18-23 градусдив агакьна чимивал жеда. Къвалрин кьадар алатай йисарив гекъигайла са т1имил артух жеда.
Вац1ара цин гьерекат, и вахтуниз талукь тирвал, секинди жеда.
Санлай кьурла и варз багълара ва уьзуьмлухра агротехникадин герек серенжемар кьиле тухун патал къулайди жеда.