Са акьван гзаф вахт амач, кьве вацралай уьлкведи ЧIехи Гъалибвилин 65 йис тамам хьунин шад сувар къейд ийида. Виринра и кардиз виликамаз гьазурвилерни аквазва. Амма гьайиф хьи, чи хуьрера Ватан патал душмандиз акси къизгъин женгера иштиракна чкайрал хтай ветеранрин кьадар къвердавай кьери жезва. Гьайиф чIугвадай кар генани ам я хьи, бязи хуьрера абурукай садни амач. Алкьвадрин хуьре са ветеран яшамиш жезмайдакай хабар хьуникди, зун адан патав фена. Ам алай вахтунда вичин яшар 87 йис жезвай Балакъардашев Мегьамед халу я. Вичин суракьдиз атанвайди кьатIай адаз тежер кьван шадни хьана.
Мегьамед халу, жедачни дявейрин йисара вун армиядиз гьикI фенатIа, гьинра женгера иштирак-натIа суьгьбет авуртIа, - суал гана за адаз. Ада рикIел хкайвал, чархун синек ккIанвай чубарукдин муг кьван гъвечIи Алкьвадрин хуьряй Ватан хуьз 48 кас жегьилар рекье гьатнай. Абурукайни 33 касди женгерин майданда душмандихъ галаз хьайи барабарсуз женгера чпин чанар къурбандна. 15 даз элкъвена хуькведай мумкинвал хьана. Мегьамед Балакъардашев армиядиз 1943-йисуз женгерин лап къизгъин, душманди лап пехъивилелди дявеяр тухузвайла фена. Курхуьрел 9-классда кIелзавай Мегьамедахъ галаз 8 кас Рамазанов Вили, Астарханов Къадирбег, Сардар хуьряй Азимов Азим, Векьерилай Ашуров Гьабибулагь, Гьажимурадов Гьажимурад, Къазибеков Селимхан фронтдиз фена.
Мадни лугьун хьайитIа, им мекьи, мишекъат хъуьтIуьн февралдин варз тир. Вилералди масанрайни кIватI хьанвай жегьилар са хзан хьиз Гуржистандиз тухвана. Ина гьар жуьре полкар тешкилиз, тади гьалда яракьрихъ вердишариз фронтдиз рекье твазвай. Дагъустандай атанвай жегьилрикай гуьгьуьллубурун махсус полк туькIуьрна. Са тIимил вахтара лазим тир гьазурвилер акурдалай ва яракьрихъ галаз танишарайдалай кьулухъ полк гьарниз апайна, - суьгьбетзава ветеранди. Мегьамед сифтедай Новокузнецкийдиз акъатна. Ина 110-полкуна хьана. Сталинграддихъ, Москвадихъ ялзавай немсери лап вагьшивилелди дяве тухузвай. Мегьамед авай полкни ина сифтегьан женгерик экечIна. Къати ягъунрилай гуьгъуьниз са гужа гуж Новокузнецк фашистрикай азаднай. Амма Смоленскийдин патарив женгер мадни къатизвай. Инай къуватар Смоленск шегьердин терефдихъ рекье туна. Рекье гьатай чIавуз са шумуд гъвечIи хуьрерни азаднай. Дорогабуждин патарив гагь сенгерар кьаз, гагь гьужумдиз физ хьана. Эхирки виняй приказ атана, вуч авуртIани, Смоленск душмандивай вахчун. Къати ягъунрилай гуьгъуьниз амни вахчуна. И ягъунар Мегьамедан рикIелай тефидайбур хьана. Адан чапла кIвачел лап залан хер хьана. Ам Оренбург шегьердин госпиталдиз агакьарна. И вахтунда Мегьамедал вичи женгера къалурай викIегь-вилерай «За отвагу» медални агакьна, чIехи командиррин патай чухсагъуларни малумарна. Гуьгъуьналлаз ам Ватандин дяведин 2-дережадин ордендиз лайихлу хьана. Ам 2-группадин инвалид яз 1944-йисуз хайи хуьруьз хтана. Хуьруьз хтай дагъвиди колхозда бригадирвал, фермадин зеведишвал авуна. Гуьгъуьнлай ада са йисан партийный школани кIелна куьтягьна. Ахпа Мегьамед Балакъардашева 1971-йисалай 1977-йисалди хуьруьн Советдин председателвал авуна. Хуьре мектеб, медпункт, адахъ туькIвей рекьер хьун, колхоздин экономика хкажун патални зегьмет чIугуна. А вахтара Молотован тIварунихъ галай хуьруьн колхоз вири терефрихъай вилик жергейризни экъечIнай.
Лап яргъал йисара Мегьамеда совхоздин профсоюздин комитетдин председатель, 1980-йисалди совхоздин бухгалтер яз зегьмет чIугуна. Ам ЧIехи Гъалибвилин 20,30,40,50,60-йисарин юбилейрин «За доблестный труд», К. Жукован ва Германиядин винел гъалиб хьунай медалралрин сагьиб я. Инал къейдна кIанзава Мегьамед Балакъардашев хуьре амай тек са дяведин ветеран я. Гъалибвилин 65 йисан юбилейдин гьуьрметдай ам чкадин юкьван мектебдиз физва, хуьруьн библиотекада, клубда аялрихъ, жегьилрихъ галаз гуьруьшмиш жезва, женгерин рекьерикай суьгьбетар ийизва, жегьилар ватанпересвилин руьгьдаллаз тербияламишун патал зегьмет чIугвазва.