КIварчагърин хуьре 1951-йисуз харат устIар Рамазанан хзанда дидедиз руш хьана. Мукьва-кьилийри адал Айнахалум тIвар эцигна ва адак, гележегда баркаллу инсан жеда лагьана, еке умударни кутуна.
1968-йисуз КIварчагърин 8-класс акьалтIарай ам Дербентдин педучилищедик кIелиз экечIна. Агалкьунралди акьалтIарай жегьил пешекар направленидалди КIварчагърин хуьруьн юкьван школадиз кIвалахал хтана.
Школадамаз муаллимвилин пешедал рикI алай Айнахалума вичин мурад кьилиз акъудиз – гъвечIи аялриз чирвилер гуз башламишна. Сифте йикъарилай ада вич хъсан чирвилер авай муаллим яз къалурна. Адахъ кIвалахда йисалай-суз хъсан нетижаярни жез хьана.
Бажарагълу муаллим Айнахалум Мегьамедовади сифтегьан классрин аялриз тарсар гуз 37 йисав агакьзава. ГъвечIи классрин аялриз тарсар гун гьикьван четин ятIа бицIекрихъ галаз кIвалахзавайбуруз хъсандиз чида.
Вичин чирвилерин дережа хкажун патал ам 1987-йисуз, заочныйдаказ кIелиз Дагпединститутдик экечIна. 1991-йисуз, «Педагогика и методика начального обучения» пешедай диплом къачуналди, ада институт хъсан къиметралди акьалтIарна.
Ам гьар са тарсуна акьалтзавай несилдик, чирвилер ва дуьз тербия гунихъ галаз санал, багъри ерияр кIан хьунин, ватанпересвилин, кIелунрив ва зегьметдив намуслувилелди эгечIунин гьиссер кутаз чалишмиш жезва.
Гьакъисагъвилелди зегьмет чIугвазвай чи руьгьдин къул хуьзвайди тир А. Мегьамедовадиз школадин педколлективдин, аялрин ва абурун диде-бубайрин арада еке гьуьрмет ава.
Вичин пешедал рикI алай руьгьдин таъминвал жагъанвай А. Мегьамедовади, аялриз дерин чирвилер гун вичин виридалайни кьилин везифа, уьмуьрдин макьсад я лугьузва.
Уьмуьрдин чIехи пай акьалтзавай несилдиз чирвилер ва тербия гуниз бахшнавай ам вичин кьисметдилай рази я. Ада школада ва хуьруьн Культурадин кIвале тухузвай жуьреба-жуьре культурно-массовый мярекатра гьамишанда активвилелди иштиракзава, аялар виликамаз гьазурна сегьнедиз акъудзава. Ахьтин мярекатрикай яз «Хайи чилин сагьибар я чун», «Дагъустан – чи виридан кIвал я», «Халкьдин ЧIехи Гъалибвал», «Женнет дидейрин кIвачерик ква», «Чун ва чи аялар», «Вун зи намус я, дидед чIал» ва масабур къейд ийиз жеда.
Школада диде-бубайрин комитетдин председатель яз, за адан са шумуд тарсуна иштиракна.
Са шакни авач, тарсар вини дережада аваз кьиле физва. Ада тарсар гайи аялрикай школа гьар йисара Абасова Эльминади, Абдулмежидова Рагнетади, Абасов Тельмана къизилдин ва Юзбеков Юзикани гимишдин медалралди акьалтIарна.
Муаллимвилин везифа жавабдарвал дериндай гьисс авуна кьиле тухузвай Айнахалумаз РСФСР-дин просвещенидин министерстводин Гьуьрметдин грамота, 1998-йисузни «Старший учитель» тIвар гана. Ам кьилин категориядин муаллим я.
Шадвалдай кар мадни ам я хьи, ада тарсар гайи гадайрини рушари кIелзавай, кIвалахзавай, къуллугъзавай чкайрай адаз разивилин чухсагъулдин чарар хквезва. Имни муаллимдин зегьметдиз гузвай еке къимет я.
Ада вичин пуд веледни хайи халкьдиз вафалу инсанар яз хкуднава.
ДГУ кIелна акьалтIарнавай чIехи руш Маинади Курхуьруьн юкьван школада муаллимвиле кIвалахзава. Гада Расимани ДГУ- акьалтIарна, алай вахтунда Москвада кIвалахзава.
Алукьзавай 8 мартдин суварин югъ тебрик авуналди заз муаллим А. Мегьамедоврикай куьруь гаф шиирдин цIараралди акьалтIариз кIанзава:
Тербиядин пак кIвалахди
КIулавай пар Айнахалум,
Хуьруьнвийри дамахдивди,
Кьазва ви тIвар Айнахалум
