Са сеферда заз, гьикI ятIани, Уллугъетягърин хуьруьн мектебдин сифтегьан классра тарсар гузвай муаллим Агъабалаева Мусинат Абасовна герек хьанвай. Ам переменада муаллимрин ял язавай кIвале авачир. И кар себеб яз зун классдиз финиз мажбур хьана. Классдин рак ахъагъайла са цуькведин кIунчI хьтин бицIи руш зи вилик акъатна. Ам классда дежурный тир. Ада завай квез вуж герекзава лагьана жузурла, за адаз Мусинат муаллим герекзавайди я лагьана. -Мусинат муаллим ваъ, ам «чи муаллим я», - лагьана ада викIегьвилелди . Мусинат Абасовна переменада аялрихъ галаз школадин гьаятда авайдакай хабар гана. Дугъриданни, ам переменада аялрихъ галаз школадин гьаятда машгъул тир.
Аялди заз гайи жавабдин гафар – «ам чи муаллим я!» - зи япарай акъатзавачир. Килиг садра, школадиз атана са йисни хьанвач, и бицIеказ чпин муаллим гьикьван багьа ятIа?!
Ам вуж я а «чи муаллим» Агъабалаева Мусинат Абасовна – 1955-йисан 12-апрелдиз Агъа СтIалрин хуьре районда машгьур механизатор Эседуллаев Абасан хзанда дидедиз хьана. 1971-йисуз хайи хуьре 8-класс тарифдин Грамота къачуналди куьтягьна. Гьа и йисуз Мусинат Абасовна Дербентдин педучилищедиз кIелиз гьахьна. 1975-йисуз ада анаг хъсан чирвилер аваз куьтягьна. Педучилище куьтягьай агъастIалвидин жегьил рушаз кьадар-кьисметдай Уллугъетягърин хуьруькай кьвед лагьай ватан хьана. Гьа икI Мусинат Абасовнади 1975-йисалай башламишна къенин йикъалди Уллугъетягърин юкьван школадин сифтегьан классра аялриз дерин чирвилерни тербия гузва.
Вич хъсан къилихрин сабурлу дишегьли ва диде яз, ада классда кIелзавай бицIекринни вичин хайи аялрин арада тафават твазвач. ИкI тирвиляй адаз классда кIелзавай аялрини «чи муаллим» лугьузва. Мусинат Абасовнади вичин кIвалахда гьар жуьредин тарсар гунин цIийи къайдайрикай менфят къачузва. Школада кIвалахзавай 35 йисан девирда адахъ девлетлу тежрибани хьанва. Ам кьилин категориядин муаллим я. Ам гьар юкъуз тарсариз хъсан гьазур жезва, ахпа а чирвилер аялрални агакьарзава.
Ада тарсар гайи аялри райондин ва республикадин гзаф карханайра кIвалахзава. Вичин классда кIелзавай аялрин диде-бубайрихъ галазни ада сигъдаказ кIвалах тухузва. Мусинат Абасовнадиз вичи кIвалахзавай коллективда еке гьуьрмет ва ихтибар ава. Ада вичи хъсан кIвалахзавайди, дерин чирвилер, тербия гузвайди хьиз, адалатлу хзанни бажармишзава. Мусинат Абасовнади пуд аялдиз (кьве гадани са руш) тербия гана, кIвачел акьалдарна. Абурухъ пудахъни кьилин чирвилер ава, пудахъни чпин хизанар хьанва.
И мукьвара школадин муаллимри Мусинат Абасовнадиз гзаф йисарин намуслу зегьметдай Россиядин умуми образованидин гьуьрметлу работник тIвар гунин патахъай къарар кьабулна, герек документар гьазурнава.
Гьуьрметлу Мусинат Абасовна, къуй квехъ гележегдани Ватандиз вафалу веледар гьазурунин карда еке агалкьунар хьурай. Идахъ галаз сад хьиз, заз жуван ва гьакIни школадин вири муаллимрин тIварцIихъай квез гатфарин чархачи тир 8 мартдин суварни рикIин сидкьидай мубаракиз кIанзава.
