1988 – йисуз Эминхуьре райондин ДЮСШ – дин азаддаказ кьуршахар кьунай филиал ачухна. И йисара ана спортдин и жуьредай вердишвилер къачур хейлин жегьилрикай спортдин мастерар, мастервиле кандидатар, Дагъустан Республикадин чемпионар, садакай гъвечIи халкьарин арада кьиле фейи дуьньядин чемпионатдин 3 – призер хьана.
Къазахстан Республикадин лайихлу тренер А.Мегьемедкеримован ва спортдин мастервиле кандидат М.Мурадагъаеван гъилик алай вахтунда 30 – дав агакьна жаван спортсменри вердишвилер къачузва, чпин устадвал хкажзава. Абурукай сад хуьруьн школадин 3 – классдин ученик Абдулагъаев Имран я. Ам кьуршахар кьунал машгъул жез 2 – йис я. Ада районда тухвай са шумуд турнирда вичихъ алакьунар ва хъсан гележег авайди къалурна. ИкI, Имрана Герейханован хуьре М.Бачханован гьуьрметдай тухвай турнирда 3 ва 4 хуьруьн командайрин иштираквал аваз тухвай Эминхуьруьн ачух чемпионатда 24 килограммдин заланвиляй 1– чка кьуна.