И йикъара чи махсус корреспондент чи райондин гуьне патан къадим ва машгьур чIехи хуьрерикай сад тир Испикрин хуьруьн (поселенидин) муниципальный тешкилатдин кьил Магьмудов Руслан Гьажимегьамедовичахъ галаз гуьруьшмиш хьана ва адавай «сельсовет Испикский» муниципальный тешкилатди алатай йис гьикI акьалтIарнатIа ва алай йисуз адак муниципальный тешкилатдик акатзавай хуьрер яшайишдинни социальный жигьетдай вилик тухун патал гьихьтин серенжемар кьабулзаватIа ва гьихьтин мумкинвилер аватIа суьгьбет авун тIалабна.
Агъадихъ чна адан суьгьбет гузва.
- Чи муниципальный тешкилатдик ЦIийи ва куьгьне Испикрин, Асалдхуьр ва Сальянрин хуьр акатзава. 2010-йисан 1-январдин делилралди адан сергьятда 1720 кас агьалияр яшамиш жезва, чахъ вири 326 хозяйство (хзанар) ава. Чахъ зегьметдиз къабил 855 кас агьалияр ава. Гьа са вахтунда кIвалахдай чкаяр тахьуниз килигна абурун чIехи пай бейкарар я. Гзаф кьадар жегьилар патарал кIвалахиз финиз мажбур жезва. Са гьал рабочий чкайралди таъминарзавайди «ЦIийи рехъ» ва «Асаликентский» СПК-яр я. Анрани мумкинвилер къвердавай тIимил жезва.
Чахъ агьалияр са гьалда кIвалах-далди таъминарзавай ЦIийи Испикрин СОШ ва Асалдхуьруьнни куьгьне Испикрин тамам тушир юкьван школаяр, 3 СДК ва 2 библиотека ава, чи администрациядани 4 касди кIвалахзава.
Чаз райондин бюджетдай гузвай дотациядилай гъейри доходар къвезвай артух маса рекьер авайди туш. Шаз дотация яз 1700 агъзур манат пул гана, чаз атай хсуси доходри вири санлай 105 агъзур манат тешкилна. Амни чал лап геж агакьна. Пул чна цIи планламишнавай рекьериз кьенятдивди ва депутатрин гуьзчивилик кваз серфда. ЯтIани чна чи хуьрерин агьалийрин куьмекни галаз хуьрер аваданламишунин, яшайишдинни культурадин къулай шартIар яратмишунин жигьетдай са жерге серенжемар кьабулзава. ИкI, кьилди къачуртIа, хуьрерин агьалийрин куьмекни галаз ЦIийи Испикрин хуьруьз ва Асалдхуьруьз хъвадай яд къвезвай линияр ремонтна, и къайдада куьгьне Испикрин хуьруьзни 5 километрдин мензилдиз хъвадай цин линия гъана. ЦIийи Испикрин хуьре куьгьне хьанвай хъвадай цин линияр ремонт ийида «Прометей» фирмадин куьмекдалди ЦIийи Испикрин хуьруьн саки вири кIва-лериз тIебиатдин газ гъанва. И кIвалах кьиле тухуниз республикадин бюджетдай 2800 агъзур манат пулунин такьатар чара авуна. И кардилай агьалийри еке разивал ийизва. Чахъ гьакI куьгьне Испикрин хуьруьз ва Асалдхуьруьзни тIебиат-дин газ тухунин фикир ава, герек тир документацияр гьазурзава. Чна гьеле 2008- йисуз, талукь тир ремонтар авуна, ЦIийи Испикрин ФАП-диз, Асалдхуьруьн ва куьгьне Испикрин фельдшервилин пунктариз кIва-лахдай ихтияр гузвай лицензияр къачуна. Идахъ галаз сад хьиз, талукь ремонтар кьиле тухвана, ЦIийи Испикрин СОШ-да ва гьакIни куьгьне Испикринни Асалдхуьруьн тамам тушир юкьван школайра сифтегьан классра кIелзавай аялриз чими тIуьнар гун патал пищеблокар кардик кутуна.
Вири и ва са жерге маса кIвалах-рихъ галаз сад хьиз, чи администрацияди хуьрера культурадинни массовый серенжемар кьиле тухуниз, хуьрера михьивилер хуьн патал субботникар тешкилуниз еке фикир гузва.
Чна СДК-айрин работникрин ва гьакIни школайрин муаллимринни чIехи классра кIелзавай аялрин куьмекни галаз гьар суварриз, лишанлу йикъариз талукьарна культурадин, спортдин массовый мярекатар кьиле тухузва, чи халкьдин къадим милли адетар ва сеняткарвилер рикIел хуьн, абур гележегдин несилрал агакьарун патал алахъзава. ИкI, шаз чна райондин 80 йис тамам хьунихъ галаз алакъалу яз райондин Культурадин Дворецдин работникрин иштираквал аваз, ЦIийи Испикрин юкьван школадин дараматдин гьаятда еке мярекат кьиле тухвана.
Гьа са вахтунда чахъ гьял тавунвай месэлаяр, четинвилерни авачиз туш. Асалдхуьруьн СДК квачиз, чахъ амай хуьрера гзаф кьадар инсанар кIватIна массовый мярекатар тухудай культурадин идарайрин чIехи дараматар авач, авай дараматризни ремонт герек я, гьакI чеб ишлемишунин вахтар са шумуд сеферда алатнавай, чеб лап кесиб гьалда авай школайрин дараматрин гьакъиндайни лугьуз жеда.
Чахъ гележегда хуьрерин агьалияр са жуьреда хьайитIани кIва-лахдалди таъминарун ва производство хкажун патал, райондин руководстводин куьмекни галаз, чи адет хьанвай майишатдин хилер-набататчивал, багъманчивал, малдарвал, гьакIни милли сеняткарвилер-гамар ва халичаяр хрун, къенчIин къапар гьазурун-кардик кутунин ва гегьеншарунин мурадар ава. Алай вахтунда и рекьериз государстводини кредитрин еке такьатарни чара ийизва. Умудзава и месэлаяр гъиле кьурла спонсорвилин куьмекар гудай, чпин инвестицияр кардик кутадай кьегьал рухваярни майдандиз акъатда.
Алай йисуз чна чи бюджетдиз 275 агъзур манат хсуси доходар атун гуьзлемишзава. Райондин бюджетдай гузвай дотацияни кваз умуми доходрин кьадар 2 миллиондихъ агакьда. Ам кьенятдивди ва чарасуз рекьериз харж ийида.
