Эхиримжи вахтара 1931-йисалай инихъ райондин печатдин орган яз акъатзавай «Куьредин хабарар» газетдинни кIелзавайбурун арада авай алакъа сих хьуни кьве патазни хийир гузва. Нетижа сад я: газет, адан чинриз акъатзавай материалрин ери хъсан хьанва. Гьа ихьтин фикирдал мукьвара редакцияда кьиле фейи газетдин хуьрерин мухбиррин совещанидин иштиракчияр атана. Лагьана кIанда хьи, эхиримжи кьве йисан къене ихьтин совещание кьвед лагьай сеферда тухвана. Им анжах тебрик ийиз жедай кар я.
Совещание, ам эвер гунин макьсаддикай лугьуналди ва алатай йисан кIвалахдин нетижаяр кьуналди, газетдин редактор Анварбег Асланбегович Миметова ачухна ва кьиле тухвана.
Анал газетдин редактордин заместитель Къ. М. Мурадханова газетдин тарихдикай, 79 йисан къене ам фейи четин, гьа са вахтунда баркаллу рекьикай, алай вахтунда адан вилик акъвазнавай везифайрикай, эхиримжи йисара газетдин чинриз акъатзавай материалрин ери хъсан, абурун мана-метлеб дерин хьанвайдакай гегьеншдиз суьгьбетна.
- Гьелбетда, газетдихъ хьанвай вири хъсан терефрик адан даяхар, куьмекчияр тир хуьрерин мухбиррин еке пай ква, - лагьана Къ. Мурадханова. – Мухбирри чпин чарара чкайрал кьиле физвай дегишвилерикай, хуьрера жезвай цIийивилерикай, карханайра тухузвай кIвалахрикай, баркаллу крарик кьил кутазвай инсанрикай, гьакIни хуьрера рехъ гузвай кимивилерикай хабар гузва. Абурун бинедаллаз газетдин чинра важиблу месэлаяр къарагъарзава, цIийи рубрикаяр ачухзава. Гьавиляй хуьрерин мухбирринни газетдин арада авай алакъа мадни мягькемди хьун лазим я.
Эхиримжи йисара газетдихъ хьанвай нетижайрикай вичин рахунра адан редактор А. А. Миметовани лагьана.
- Квез аквазвайвал, редакциядин дарамат чир техжедайвал дегиш хьанва, адан работникриз кIвалахдай къулай шартIар яратмишнава, идахъ галаз санал редакциядин материально-технический базани хъсан хьанва, - къейдна А. А. Миметова. И кардик газетдин тешкилатчи тир райондин муниципальный тешкилатдин, адан администрациядин еке пай ква. Идай чна Имам Музамудинович Яралиеваз редакциядин коллективдин ва газет кIелзавайбурун патай чухсагъул лугьузва.
Газетдикай, адан везифайрикай совещанидал хьайи рахунра хуьрерин мухбиррини активвилелди иштиракна. Абуру лагьай гафар ва гайи теклифар чна агъадихъ куьрелди гузва.
С. Саидгьасанов: - Газет гужлу яракь я. ИкI вири девирра хьайиди я, гилани гьакI я, гележегдани гьакI амукьда. Райондин газет эхиримжи йисара вири рекьерай вилик фенва, ида гьар са касдик шадвал кутазва. Редакцияда чпихъ хъсан хатI, бажарагъ авай журналистри кIвалахзава. Материалрин мана-метлеб хьиз, газетдин чинриз акъатзавай шикилрин ерини хъсан хьанва.
Амма газет акъатзавай формат гъвечIи я. Гележегда и кардиз фикир ганайтIа хъсан жедай.
Н. Шихнабиев: - Ихьтин совещанияр тухуни газетдинни мухбиррин алакъа мадни сихди хьуниз куьмек гузва. И алакъа себеб яз эхиримжи йисара газетдин ери лап хъсан хьанва. ЯтIани, бязи вахтара газетдин чинриз акъатзавай материалар кIелзавайбурун руьгь тухардайбур жезвач. Тарифдин макъалаяр гзаф жезва, критикадин материалар саки авач. Виликдай газетда «Серкеран чумахъ-зарб галукьда вахъ» рубрика кардик квайди тир. Ихьтин, гьакIни «Сатира ва юмор» рубрикаяр кардик кутун хъувуртIа, са рахунни алачиз, газетдиз кIелзавайбурун патай авай фикир артух жеда.
Р. Набиев: - Редакциядин работникри чкайрилай къвезвай чарариз артух фикир гун лазим я. Редакциядиз ракъурай материал газетдиз акъат тавурла гуьгьуьл хазва.
М. Абдулмуталибова: - Санлай къачурла, газетдикай, адан работникрин кIвалахдикай завай разивилин келимаяр лугьуз жеда. Газетдин чинра тербиядин темайрай, гьакIни баркакллу инсанрикай, чешнелу хзанрикай кхьенвай материалар гзаф хьана кIанда. Абуру, са рахунни алачиз, акьалтзавай несил тербияламишунин кардиз екез куьмек гуда.
Совещанидал хуьрерин мухбирар тир З. Наврузов, Л. Исаева, З. Мегьамедов, А. Агьмедпашаев, В. Жамалдиновни рахана, газетдикай чпин фикирар лагьана, теклифар гана.
Эхирдай А. А. Миметова вичин рахунра къейд авурвал, совещание редакциядин работникар патал хьиз, хуьрерин мухбирар патални менфятлуди хьана. Гьа са вахтунда, редакторди газетдин ери хъсан, адан чинриз акъатзавай материалрин метлеблувал, менфятлувал артух хьун патал алай йисуз редакциядин коллективдин, хуьрерин мухбиррин вилик акъвазнавай везифайрикай лагьана, и рекьяй меслятар къалурна, теклифар гана.
Тайин хьайивал, гьам редакциядин работникрин, гьамни хуьрерин мухбиррин фикир сад хьана: райондин чин, гуьзгуь, адан агьалийрин хабарчи тир «Куьредин хабарар» газетдин ери, адан чинриз акъатзавай материалрин мана-метлеб хъсан хьун. Умудлу я, виридан куьмекдалди гьакI женни ийида. Мисалда лугьузвайвал, халкьдин къажгъан муркIадални ргада.
Совещанидал эхирдай газетдин кIвалахда активвилелди иштиракзавай хуьрерин мухбирриз редакциядин патай къиметлу пишкешар гана.