2010-йисан 15-январдиз С. Стальский райондин суд Кьулан СтIалдилай тир, чеб 1994-йисуз хайи, тамам тушир юкьван образование авай, кIвалахдик квачир, виликдай суддин вилик акъваз тавур, РФ-дин ватандашар тир ва чеб РФ-дин УК-дин 158-статьядин 2-паюнин «а, б, в» пунктара тайинарнавай тахсиркарвиляй тахсиркарвал авунвайбур яз гьисабзавай яшар тамам тахьанвай Гьасанагъаев Гьажимурад Жабраиловичан ва Эседов Александр Эседовичан гьакъиндай къарагъарнавай уголовный делодин материалрихъ галаз таниш хьана ва тайинарна:
2009-йисан 1-ноябрдиз, тахминан йифен сятдин 11-даз, виликамаз меслят хьуналди, А. Э. Эседовни Гь. Ж. Гьасанагъаев масадан эменни чуьнуьхунин мураддалди, дакIардин гуьзгуь хана, Кьулан СтIалрин хуьруьн юкьвал алай Р. М. Алисееван туьквендиз гьахьна. Абуру анай 2500 манат пул, 795 манатдин къимет авай «Винстон», 260 манатдин къимет авай «Красная Ява», 850 манатдин къимет авай «Золотая Ява» сигаретрин блокарни чуьнуьхна. Абуру санлай кьурла туьквендин иесидиз 4605 манатдин зарар гана.
Чпин гьерекатралди абуру кьведани РФ-дин УК-дин 158-статьядин 2-паюнин «а, б, в» пунктара къалурнавай тахсиркарвал авуна.
Суддин заседанидал Гь. Ж. Гьасанагъаева ва А. Э. Эседова, адвокат М. А. Ягъибегов, чпин законлу векилар тир Д. А. Эседова ва Д. Р. Рамазановани галаз чпин тахсиркарвал тамамвилелди хиве кьуна, чеб чпи авур кардал пашман хьанвайди лагьана, суддал вири галай-галайвал хиве кьуна.
Кьилди къачуртIа, А. Э. Эседова лагьайвал, 2009-йисан 1-ноябрдиз кIвализ хкведайла Кьулан СтIалрин рекье адал Гь. Ж. Гьасанагъаев гьалтна. МичIи тир, Р. М. Алисееван туьквендин патавай хъфидайла абур и туьквен атIунин меслятдал атана.
И кар патал къванцелди яна дакIардин гуьзгуь хана. Ачух хьайи арадай А. Эседов дакIардай туьквендин къениз гьахьна. Гь. Ж. Гьасанагъаев гуьзчивал ийиз куьчедал акъвазнавай. Ада дезгейрилай гьар маркайрин сигаретар къачуна, гьикьван къачунатIа рикIел аламач. Ахпа абур гьа туьквендай къачур пакетда туна, кассада авай 2500 манат пулни къачуна. Пакет дакIардай Гь. Ж. Гьасанагъаевав вугана, вични, гьа фейивал, дакIардай экъечIна. Сигаретар авай пакет абуру Гь. Гьасанагъаеван кIвалерин гьаятда чуьнуьхарна. Гуьгъуьнлай сигаретар къубудиз гадарна, пулунихъ недай продуктар къачуна. Ихьтин, сад хьтин, къалурунар суддал Гь. Ж. Гьасанагъаевани гана, хьайи зияндин пул чпин диде-бубайри туьквендин иесидив вахкайдини лагьана.
Суддин заседанидал рахай вичиз зарар хьанвай Р. М. Алисеева къейд авурвал, адан туьквен 2009-йисан 1-ноябрдиз нянин сятдин ругудалди акъазмайди тир. 3-ноябрдиз пакамахъай туьквендал атайла адаз дакIардин гуьзгуь ханвайди акуна. Къенепатаз гьахьайла дезгейрал алай хейлин сигаретар ва кассада авай пул амач, ана къайдасузвал авай. Ада, хайи гуьзгуьни кваз, вичиз вири санлай кьурла 5005 манатдин зиян ганвайди ва кирида кьунвай туьквендал кIвалахзавай вичин хзан патал им чIехи кьадар пул тирди, а пулни абурун диде-бубайри вири вахканвайди лагьана, жаза гудайла и кар закондихъ галаз кьадайвал ва абурун яшни фикирдиз къачун тIалабна.
А. Э. Эседован законлу векил тир Д. А. Эседовади суддин заседанидал лагьайвал, ам вичин уьмуьрдин юлдаш ва аяларни галаз Кьулан СтIалдал хсуси кIвалера яшамиш жезва. А йифиз хва Александр Гь. Гьасанагъаевни галаз кIвализ геж хтайла ада туьнбуьгьарни авурди я, амма ада туьквен атIанвайди пуд йикъалай чир хьана. Гадади чпи къачур сигаретар къубудиз гадарайди ва 2500 манат пулунихъ Кьасумхуьрелай продуктар къачурди хиве кьуна. Ада суддивай вичин хва уголовный жавабдарвилиз чIугун тавун, адал гуьзчивал тухун диде-бубадилай алакьдайди, хьайи зияндин пулни туьквендин иесидив тамамвилелди вахканвайди лагьана.
Ихьтин тIалабун суддивай Гь. Гьасанагъаеван законлу векил Д. Р. Рамазановадини авуна. Абуру кьведани чпихъ яшайишдин къулай шартIар ва абурал гуьзчивал тухудай мумкинвал авайди къейдна.
И кар яшар тамам тахьанвайбурун яшайишдин шартIар чкадал фена ахтармишай актунин делилрини тестикьарзава: абурун яшайишдин кIвалерин санитарный гьал разивал ийиз жедайди я, хзанрикайни разивилин фикирар ава, абурун диде-бубайриз чпин аялрал герек тир гуьзчивал тухудай мумкинвал ава (л.з. 36,50).
Вири терефар ва делилар, тахсиркарвал юкьван заланвилинди ва яшар тамам тахьанвайбур уголовный жавабдарвилиз чIугун тавуна дуьз рекьел хкидай мумкинвал авайди фикирдиз къачуналди ва РФ-дин УПК-дин 431-статьядал бинеламиш хьуналди, судди Эседов Александр Эседовичан ва Гьасанагъаев Гьажимурад Жабраиловичан гьакъиндай мажбури тербиядин таъсир авунин мураддалди абурун гьакъиндай са йисан вахтунда диде-бубайри ва гьакIни С. Стальский райондин администрациядин патав гвай яшар тамам тахьанвайбурун крариз килигдай комиссиядин гуьзчивилик кутунин къарар акъудна.
