Гьар са школада, вичин пешедал рикI хьуналди, кIвалахдив жавабдарвал дериндай гьисс авуналди эгечIзавай, вичихъ хайи педколлективда, кIелзавай аялрин, абурун диде-бубайрин патай еке гьуьрмет къазанмишнавай муаллимар жеда. Ахьтинбурун жергедай яз Кьасумхуьруьн 2-нумрадин юкьван школада тарсар гузвай кьилин категориядин муаллим, 2006-йисан РФ-дин Президентдин грантдин сагьиб Лукьманова Къизил Мегьамедовнадин тIварни кьаз жеда.
Гьеле школада кIелзамаз тарсарал гзаф рикI алай, хъсан зигьин-кьатIунар авай жегьил руша вичин савадлу уьмуьр виридалайни ислягь ва баркаллу кеспидиз бахш авун – муаллим хьун кьетIна.
И мураддалди ам ДГУ-дин химический факультетдик кIелиз экечIна ва анаг хъсан чирвилер аваз агалкьунралди акьалтIарна.
1980-йисалай инихъ и школада химиядин тарсар гузвай муаллим яз кIвалахзавай ада чирвилер ва тербия гайи гзафбурукай муаллимар, духтурар ва маса кеспийрин сагьибар хьанва. Кьилди къачуртIа, вичихъ галаз авур суьгьбетда Къизил Мегьамедовнади къейд авурвал, ада тарсар гайи Гьажимурадова Индира Къурбаналиевнади ва Ибрагьимова Гуьлуьшан Ибрагьимовнади алай вахтунда и школада муаллимар яз кIвалахзава. Адан гзаф выпускникри алай вахтунда чи уьлкведин военный академийра кIелзава.
8 «а» классдин руководитель яз кIва-лахзавай адан гъилик квай аялрин саки 70 процентди анжах «4» ва «5» къиметар аваз кIелзава. Адан предметдай аялри школадин ва райондин олимпиадайра гьар йисуз кIвенкIвечи чкаяр кьазва. Ада тарсарилай къецяй чпихъ кьетIен алакьунар, чирвилер авай аялрихъ галаз кьилдин кIвалах-алава тарсар тухузва.
Къизил Мегьамедовнадин гзаф йисарин намуслу зегьмет РФ-дин ва ДР-дин образованидинни илимдин министерствойрин, РУО-дин Гьуьрметдин грамотайралди къейднава. Адан пешекарвилин ва инсанвилин ерийрин гьакъиндай гзаф кьадар хуш келимаяр чаз и школадин директор Велиев Мамед Велибековичан ва гьакIни маса муаллимрин мецелай ван хьана.
Вичин вири уьмуьр чи экуь гележег тир аялриз чирвилер ва тербия гунин четин ва баркаллу кеспидиз – муаллимвилиз бахшнавай тежрибаллу муаллим Лукьманова Къизил Мегьамедовнадихъ чаз вичин хивевай жавабдар кIвалахда мадни еке агалкьунар ва уьмуьрдани бахт, берекат хьана кIанзава.
