Малум тирвал, вичихъ артуханвал авай милли проектрикай сад тир «Образование» вилик тухунин мураддалди РФ – дин Президентдин указдалди алукьнавай цIийи 2010 – йис Россиядин Федерацияда Муаллимрин йис яз малумарнава. И кардихъ галаз алакъалу яз и мукьвара чи республикадин меркезда муаллимрин йис шад гьалара ачухуниз талукьарнавай мярекат кьиле фена. Ана иштиракдай ва тебрикдин гаф рахадай гьуьрмет чи районэгьли, са шумуд несилди муаллимвилин пеше давамарзавай Агъа-СтIалдилай тир Дагъустандин школайрин лайихлу муаллим, РФ- дин умуми образованидин гьуьрметлу работник, муаллимар патал кхьенвай са шумуд методический пособийрин автор, педагогвилин зегьметдин ветеран Абдулмежидов Абдуселим Абдулмежидовазни авуна. Адахъ галаз и мярекатда гьакI адан муаллимар тир 3 рушани иштиракна. Кьулан СтIалрин СОШ – да музыкадин тарсар гузвай Селимата анал манини яна.
Алатай жуьмья юкъуз, 12- февралдиз, райадминистрациядин заседанийрин залда чи райондани Муаллимрин йис шад гьалара ачухуниз талукьарнавай мярекат кьиле фена. Аниз райондин школайрин руководителриз, педагогвилин зегьметдин ветеранриз ва жуьреба – жуьре лайихлу тIварарин сагьибар тир гзаф кьадар муаллимриз теклифнавай. И дараматдин сад лагьай мертебадин дегьлизда райондин са шумуд мектебдай гъанвай чпин тежрибайрикай лугьузвай стендарни аквадай чкайрал эцигнавай.
И мярекат, залда ацукьнавай муаллимриз, педагогвилин зегьметдин вири ветеранриз Муаллимрин йис мубарак авуналди ва хуш келимаяр лугьуналди, муниципальный райондин администрациядин кьилин сад лагьай заместитель Агьмедов Мусаиб Гьажибалаевича ачухна. Ада чи район алатай асиррилай инихъ чIехи алимрални бажарагълу муаллимралди машгьур тирди, алай вахтундани чи район и жигьетдай республикада 3-чкадал алайди къейдна ва са жерге машгьур муаллимринни алимрин, гьа жигьетдай яз, Алискендер Алкадарскийдин, Къафлан Идрисован, Рамазан Юсуфован, АбутIалиб Абилован, Унейзат Мейлановадин, Маил Аминован, Абдусалам Гьуьсейнован, Пенкер Бабаевадин, Амри Шихсаидован ва масабурун тIварар кьуна.
Ада райондин руководстводи райондин умуми образованидин идарайрин кIвалахдин шартIар хъсанаруниз йисалай–суз артух фикир гузвайди, алатай йисуз вири 57 идарада ремонтар кьиле тухвайди, райондин бюджетдин такьатрин гьисабдай ЦIийи Макьарал виликан дарамат ремонт авуна «Улыбка» тIвар алай аялрин ясли-бахча кардик кутурди, вири школаяр интернетдик кутурди, вири санлай кьурла алатай йисуз и рекьериз райондин бюджетдай 20 миллиондилай виниз пул харж авурди, им алатай са шумуд йис санлай кьурла авур харжийрилай 5 сефердилай артух тирди къейдна.
Алай йис Муаллимрин йис яз малумарунихъ галаз алакъалу яз,- давамарна ада,- 2009-2010- кIелунин йисуз тафаватлу хьайи муаллимар материальный жигьетдай руьгьламишунин мураддалди лап хъсан 10 муаллимдиз гун патал гьар садаз 10 агъзур манатдин кьадарда аваз 10 премия тайинарунин гьакъиндай муниципальный райондин Кьил Яралиев Имам Музамудиновича къарар акъуднавайди къейдна. Квевай гьар садавай а премиядин сагьиб хьун патал женгиник экечIайтIа жеда. Квехъ чандин мягькем сагъвал, чи акьалтзавай несилдиз дерин чирвилер ва тербия гунин жавабдар кIвалахда агалкьунар хьурай, - лагьана ада вичин рахунрин эхирдай.
Микрофон и мярекат кьиле тухунин гьуьрметлу ва жавабдар везифа чпин хивез къачунвай Герейханован хуьруьн СОШ-дин муаллимар тир Шамсудин Магьамдарованни, Альбина Хановадин ихтиярда туна. Муаллимрин тIварцIиз, муаллимвилин пешедин гьакъиндай, чи райондин тарихдикай хуш келимаяр лугьунихъ, куьруь баянар гунихъ галаз санал, абуру Муаллимрин йис ачухун тебрик авун патал сифте гаф Ватандин ЧIехи дяведин активный иштиракчи, дяведин ва педагогвилин зегьметдин ветеран, отставкада авай гвардиядин майор Къазимегьамедов Гьажимегьамед Къазимегьамедоваз гана. Тебрикдин гафарилай гуьгъуьниз, ада дяведилай гуьгъуьнин йисара вичи 45 йисуз Агъа СтIалрин юкьван школада муаллимвал авурди, вичин вири савадлу уьмуьр акьалтзавай несил ватанпересвилин руьгьдаллаз тербияламишунин рекьиз бахшзавайди лагьана. - Гьа са вахтунда,- къейдна ада, - аялри школада кIелзавай бязи учебникра Ватандин ЧIехи дяведин, Гъалибвилин ва ам мукьва авун патал Советрин Союзди къугъвай чIехи ролдин гьакъиндай бязи делилар инкар ийиз ва я абур маса жуьреда гуз алахъзава. И кардиз рехъ гана кIандач. Школайра аялриз женгиниз гьазурунин, ватанпересвилин тербия гунин кIвалахдиз артух фикир гана кIанда, - лагьана ада эхирдай.
Гуьгъуьнлай анал чпин кьисметрикай, чпин кIвалахдикай, алай вахтунда чи уьлкведа образованидин месэла авай гьалдин гьакъиндай чпин рикIел хкунар, теклифар ва гьакIни тебрикар гваз педагогвилин зегьметдин ветеранар тир Гьажиханова Нелла Даниловна (Герейханован хуьр), Абдулмежидов Абдуселим Абдулмежидович (Агъа СтIал), Селимова Саимат Мегьамедовна (Кьасумхуьр) рахана.
Эхирдай анал муниципальный райондин администрациядин кьилин сад лагьай заместитель М. Гь. Агьмедова педагогвилин зегьметдин ветеранар тир Гь. Къ. Къазимегьамедовав, А. А. Абдулмежидовав, Н. Д. Гьажихановадив, Т. М. Мегьамедовадив ва С. М. Селимовадив гзаф йисарин намуслу зегьметдай ва районда умуми образование вилик тухунин карда активвилелди иштирак авунай, гьар садаз 6500 манат пулунин савкьватни галаз муниципальный райондин Гьуьрметдин Грамотаяр шад гьалара вахкана ва абуруз а лайихлу наградаяр, и мярекатда иштирак ийиз кIанз, райондилай къецез финин рехъ акъатнавай муниципальный райондин Кьил Яралиев Имам Музамудиновичан ва гьакIни вичин патай мубарак авуна.
Ада анал гьакI муаллимар тир Рагьманов Нажмудинавни, Ярагьмедова Инаятав образованидинни илимдин работникрин профсоюздин ЦК–дин Гьуьрметдин Грамотаяр вахкана, са шумуд муаллимдизни РУО-дин патай къиметлу пишкешар, гьакIни наградаяр гайи вири дишегьлийриз цуькверни багъишна.
И мярекат анал гьар садан рахунрилай гуьгъуьниз манияр лагьай муаллимар тир Селимат Абдуселимовнади (Кьулан СтIалрин СОШ), Эмирбегов Мегьамеда, Султанагьмедова Зурията (ЦIийи поселокдин СОШ), машгьур манидарар тир Эминуллагь Къадиева ва Расул Аликберова мадни гурлу авуна.
