И мукьвара чал республикадин меркез Махачкъаладай шад хабар агакьна. «Сулейман-Стальский район» муниципальный райондин Кьил И.М.Яралиевал Махачкъалада авай Россиядин правовой Академиядин филиалдин ректордилай тебрикдин чар хтана. И чарче Академияда кIелзавай чи ватанэгьлияр тир 4 студентдин тIварар ава. Абуру вири предметрай вини кьилин къиметар аваз кIелзава.
Ибурукай сад Уллугъетягърин хуьряй тир Рамазанова Алефтина Себековна я
Куьруь къейд: Рамазанова Алефтина Себековна Уллугъетягърин хуьре совхоздин рабочий Рамазанов Себекан хзанда 1988-йисуз дидедиз хьана. 2005-йисуз хуьруьн юкьван школа лап хъсан къиметар аваз куьтягьай жегьил руш Россиядин правовой Академиядин 1-курсуниз гьахьна. Алай вахтунда Алефтинади 5-курсуна лап хъсан къиметар аваз кIелзава.
Ада школада 1-классдилай башламишна 11-классдал кьван лап хъсан къиметар аваз кIелна. 5-классдилай башламишна за Алевтинадиз урус чIаланни литературадин тарсар гана. Гьа са вахтунда зун и классдин руководитель тир. За и школада муаллимвиле кIвалахиз 47-йис я. И йисара зал гьар жуьредин чирвилер, къилихар авай аялар гьалтна. ЦIудралди за тарс гайи выпускникри илимдин кандидатар, докторар яз республикадин вузра ва карханайра кIвалахзава. Бязибур чпин кьисметди Россиядин маса шегьерриз акъуднава.
И жергедай Алефтина виридалайни бажарагълу, тафаватлу хьана. Ам зал и йисара гьалтай аялрикай сад лагьайди хьана.
Алефтинади школадин, райондин ва республикадин олимпиадайра иштиракна ва вичиз хас тир чкаярни кьуна, грамотаяр, призар къачуна. Са шумуд сеферда за Алефтинадиз гележегда гумманитарный илимрай чирвилер къачун теклифнай. Ада заз гьикьван гьуьрмет ийизвайтIани, зи теклиф кьабулнач. Алефтинадин къаст юрист хьун тир. И фикирдин кIвалахни ихьтинди хьана.
Эхиримжи йисара уьлкведа жезвай татугайвилер Алефтинадизни аквазвай. Ада вичин къаст, фикир гьа татугайвилерин тахсиркарар чирда ва хайи халкь патал женг чIугвада лагьана, юриствилин пеше хкяна. Къуй вичиз хкянавай пеше мубаракрай.
Ихьтин велед хана, тербия гайи дидедизни бубадиз чухсагъул.
Бубайрин масалди лугьузва: «Веледрикай рикI динж хьайи дидени буба кьуьзуь жедач». Къуй вири диде-бубайриз ихьтин веледар хьана, чпин рикI динж хьуй, абур Ватандиз вафалу веледар хьуй.
Алефтинади цIи Академиядин 5-курсуна кIелзава, чи мурад анаг ада яру дипломдалди куьтягьун я. Чаз дерин чирвилер авай, бажарагълу руш Рамазанова Алефтинадихъ гележегда еке тир агалкьунар хьана кIанзава.
Молодец Алефтина! Мы тобой гордимся!
Алефтина мы рады за тебя, за твои успехи и достижения!!! Любим тебя и гордимся тобой!!