Эминхуьруьн врачебный амбулаторияда медсестравиле кIвалахзавай Бабаева Гуьллер хуьруьнвийрин, дидейрин вири дердийриз шерик кас я лагьайтIа, зун са кIусни ягъалмиш жедач.
Мукьвара зи къуншидал яшамиш жезвай са дишегьлидиз пис хьана. За тадиз фена Гуьллер вахаз хабар гана. Гьяд югъ тиртIани, ам вич отпускада авайтIани, герек дарманар къачуна, духтур захъ галаз азарлу дишегьлидин кIвализ атана. Тадиз дишегьлидин гьал ахтармишна, дарманар гана, раб яна. Акваз-акваз дишегьли ачух хъхьана.
Ихьтин мисалар гзаф гъиз жеда. Г. Бабаева азарлу касдин патав эверайла суткадин гьи вахтунда хьайитIани физва. Им ада неинки вичин буржи, гьакI намусдин кар язни гьисабзава.
Лагьана кIанда хьи, Г. Бабаева кIвалахдин рекьяй саки 20 йисан тежриба авай духтур я. Идани адаз вичин хиве авай жавабдар везифа – агьалийрин сагъламвал хуьн – намуслувилелди кьилиз акъуддай мумкинвал гузва. И карда духтурдиз медицинадин рекьяй хъсан чирвилер хьуни мадни куьмек гузва.
- Хуьруьнвийриз Гуьллер вах неинки вичин пешедал рикI алай духтур, гьакI ширин мез, ачух рикI авай, масадан дердиникай хабар кьадай инсан яз чида, - лугьузва 7 аялдин диде Г. Аликберовади. – Сагъламвилин гьал зайиф хьанвай гьар са касдиз дарманрикай, рапарикай хьиз, духтурдин ачухвиликай, ширин мецикайни екез куьмек жезва.
Вичикай инсанриз куьмек хьунай руьгьдин таъминвал аквазвай, Гиппократан кьинез вафалувал къалурзавай Г. Бабаевадихъ мягькем сагъламвал, кIвалахда агалкьунар хьун чи мурад я.