Чуьхверхуьруьн фельдшервилинни акушервилин пунктуна (ФАП-да) чпихъ махсус чирвилер авай 3 работникди кIвалахзава. Абуру хуьре яшамиш жезвай 1266 касдиз медицинадин рекьяй къуллугъзава.
Хуьре командировкада авайла ина акушер-гинекологвиле кIвалахзавай Гьажибегова Сейназакай, адан намуслу зегьметдикай агьалийривай чаз хуш келимаяр ван хьана.
Чаз малум хьайивал, С. Гьажибеговади 1994-йисуз Дербентдин медицинадин училище акьалтIарна, 5 йисуз Махачкъалада 2-нумрадин аялрин поликлиникада кIвалахна. 1999-йисалай инихъ Сейназа хайи хуьруьн ФАП-да кIвалахзава.
- Хуьруьн агьалийрикай 620 кас дишегьлияр, гьабурукайни 328 аял хадай яшара авайбур я, - лугьузва С. Гьажибеговади. – Абурун гьакъиндай чна къайгъударвални ийизва.
Акушер-гинекологдин учетда алай вахтунда кIвачел заланзавай 14 дишегьлини ава. Абур духтурдин гьар йикъан гуьзчивилик ква. С. Гьажибегова мукьвал-мукьвал абурун патав кIвалериз физва, сагъламвал ахтармишзава, лазимвал авайбуруз медицинадин рекьерай куьмекар гузва.
Эхиримжи са шумуд йисуз хуьре аялар кьейи дуьшуьшар хьанвач. И кардикни С. Гьажибеговадин зегьметдин еке пай ква.
- Сейназ Исамудиновнадин кIвалахдилай чун ва агьалияр гзаф рази я, - лугьузва ФАП-дин зеведиш Написат Гьасановади.
