Малум тирвал, алай йисан 1-январдиз лезгийрин рикI алай артист ва бажарагълу шаир Абдулкъадир Сайдумович Сайдумов дидеди хайидалай инихъ 80 йис тамам хьана. И лишанлу вакъиадихъ галаз алакъалу яз райадминистрациядин къарардалди 2009-йисан 18-декабрдилай 2010-йисан 18-январдалди Абдулкъадир Сайдумован варз малумарна ва и вацран сергьятда аваз культурадин маканра, массовый информациядин такьатрай адан уьмуьрдиз ва яратмишунриз талукьарнавай мярекатар кьиле тухвана, передачаяр, гегьенш материалар гана.
18-январдиз адан хайи хуьре – ДаркIушкъазмайрал – анин юкьван школадин дараматда РСФСР-дин лайихлу ва ДАССР-дин халкьдин артист, Дуствилин ордендин, хейлин медалрин ва гьукуматдин са жерге маса наградайрин сагьиб Абдулкъадир Сайдумович Сайдумован 80 йисан юбилейдиз талукьарнавай шадвилин мярекат хьана.
И мярекатдиз талукьарна ам кьиле тухузвай школадин гегьенш дегьлизда кьве патани регьметлудан, артист ва шаир уьмуьрда активный тереф кьунвай инсан яз, гьар йисара артистрихъ, дустарихъ галаз янавай шикилрин чIехи фотомантаж, стендар акъуднавай.
Юбилейдин мярекат, чIехи артистдикай ва шаирдикай куьруь гаф рахуналди, вахтуналди райадминистрациядин кьилин везифаяр кьиле тухузвайди тир Агьмедов Мусайиб Гьажибалаевича ачухна, ДаркIушрин жемятдиз райондин руководстводин ва гьакIни вичин патай и межлис мубаракна ва ам кьиле тухун и школадин директор Савзихан Савзихановал тапшурмишна.
Анал бажарагълу артист, шаир ва ватанперес инсан тир Абдулкъадир Сайдумович Сайдумован уьмуьрдикай ва яратмишунрикай, адан бажарагъдикай и хуьруьн мектебдин муаллим Абдурагьманова Назиляди куьруь суьгьбет авуна.
Гуьгъуьнлай анал лезги халкьдин дамах тир Абдулкъадир Сайдумован бажарагъдин ва инсанвилин ерийрин гьакъиндай чпин рикIел хкунар ва бязи теклифар, тебрикдин гафар гваз Лезгийрин Гьукуматдин муздрамтеатрдин кьилин режиссер Эседуллагь Наврузбегов, райондин культурадинни информациядин управленидин начальник Майрудин Бабаханов, «Лезги газетдин» кьилин редактордин заместитель Шихмурад Шихмурадов, анин политикадин отделдин редактор Нариман Ибрагьимов, Белиждин Советрин Союздин Игит Абас Исрафилован тIвару-нихъ галай гимназиядин чIаланни литературадин тарсар гузвай муаллим, Дагъустандин лайихлу муаллим ва шаир Гъулан-Герек Ибрагьимова, ДаркIушрилай тир РФ-дин лайихлу архитектор Керим Керимов ва маса юлдашар рахана.
Кьилди къачуртIа, Майрудин Бабаханович Бабаханова икI лагьана:
- Бахтлуди я а халкь, а хуьр ва хзан Сайдумов Абдулкъадир хьтин инсан акъатай. Ада вичин кьетIен бажарагъдалди, инсанвилин ерийралди вичин хайи хуьр, район, хайи халкь вирибуруз машгьур авуна. Амма вич регьметдиз фейидалай инихъ 7 йис алатна-ватIани чавай адан зегьметдиз, адан дережадиз лайихлу къимет гуз алакьнавач.
Чи халкьдин руьгьдин мягькем даяхрикай сад тир Абдулкъадир Сайдумовичан ирс гележегдин несилрал агакьарун патал хуьруьн мектебда, райондин музейда, гьакIни ада вичин вири савадлу уьмуьр, вичин бажарагъ бахш авур Лезгийрин госмуздрамтеатра адаз талукьарнавай кьилдин пипIер тешкилун герек я. Сайдумов Абдулкъадир Сайдумович хьтин бажарагъар асиррилай майдандиз акъатзавайди я. Вичиз аллагьдин регьмет хьурай.
Межлисдал лезги театрдин артистар тир Дагъустандин халкьдин артист Ибрамхалил Рамазанова ва Дагъустандин лайихлу артист Фаризат Зейна-ловади «Жанавурдин тум» къемедадай са сегьне къалурна, А. Сайдумован къаравилияр, куьруь шиирар кIелна, адан чIалариз кхьенвай манияр лагьана. Дар-кIушрин хуьруьн школадин муаллимар тир А. Сайдумован стхадин гада Азмудин Сайду-мовани Мегьамедова Манията «Урусатдин цуьк» тамашадай са сегьне къалурна.
Межлис «Ая кам» ансамблди, манидарар тир Фаризат Зейна-ловади, Керим Керимова, Нажмудин Нежведилова, Абудин Шерифова, Зуьгьрехалум Гьасан-беговади, Закир Алискерова ва масабуру мадни гурлу авуна.
Анал и хуьруьн школадин хейлин аялри А. Сайдумован шиирар хуралай кIелна.
Эхирдай Абдулкъадир Сай-думован уьмуьрдин юлдаш Якъут Эседовнади вичин регьметлу юлдашдин гьуьрметдай ихьтин чIехи межлис тешкилайбуруз, ана иштирак авур вири юлдашриз чухсагъул лагьана.
И мярекат чи райондин куль-турадин уьмуьрда лишанлу са вакъиадиз элкъвена.