«Курхуьруьн юкьван школадин 9 классдин ученица Нина Мегьамедовади Центральный телевиденидин 1-каналди тухузвай «Умники и Умницы» викторинада иштиракна» -« Сулейман-Стальский район» муниципальный райондин сайтдай и гафар кIелайла, заз гзаф шад хьана. Руш вич заз таниш туштIани, за рикIяй «Ваз баркалла, Нина» лагьана.
Чаз малум тирвал, «Умники и Умницы» телевикторинада неинки чи уьлкведин, гьакI СНГ-дик акатзавай маса уьлквейрай тир, чпихъ неинки дерин чирвилер, хци зигьин, кьатIунар авай школьникри иштиракзава. Еке мумкинвилер ва шартIар авай Москва, Санкт Петербург, Киев, Минск хьтин шегьеррин ва маса школайра кIелзавай школьникрихъ галаз хуьруьн школада кIелзавай лезги руша акъажунра иштиракун, абурун арада гъалибчи хьун-бес им чи дамах, шадвал тушни?! ГьикI лугьудач адаз «аферин!»
Зун Курхуьрел фена, М.М.Рагьимован тIварунихъ галай юкьван школадин 9 «а» классда кIелзавай Нина Мегьамедовадихъ галаз таниш хьана. Лап секин къилихрин, регъуьвални квай, са артух раханни тийидай руш ихьтин дережадиз экъечIна лагьана ягъун са акьван регьятни туш. Яз я, гзаф чидайбур тIимил рахада, я абуру дамахни ийидач, лугьузва бубайрин мисалда.
Чаз малум хьайивал, Нина отличница, школадин дамах я. Ада вири предметрай анжах «5» къиметар аваз кIелзава. Художественный ктабар кIелунални Н.Мегьамедовадин рикI гзаф ала. Гьавиляй ада школада, районда тухузвай гзаф КВН-ра, жуьреба-жуьре конкурсра иштиракна, анра кIвенкIвечи чкаяр кьуна. Вичихъ хъсан чирвилер, алакьунар авайди руша райондин ва республикадин школьникрин олимпиадайрани къалурна.
Н.Мегьамедовадихъ галаз чи арада куьруь суьгьбетни кьиле фена.
-Нина, гьелбетда, «Умники и Умницы» телевикторинада иштирак авун еке агалкьун я. Мубаракрай. Аниз вун гьикI акъатайди ятIа лагьанайтIа кIанзавай.
-«Умники и Умницы» телевикторинадиз Вирироссиядин телевизионный гуманитарный олимпиада лагьайтIани жезва. За ана иштиракна. И кар патал викторинадин суалриз жавабар кхьена рахкурна кIанзава. Заз малум хьайивал, викторинадин суалриз Россиядин ва СНГ-дин школайрай тир 20 агъзурдалай виниз школьникри жавабар ганвай. Викторинадин жавабдар кас тир МТИМО-дин профессор Юрий Павлович Вяземскидиз зи жавабар ва фикирар дуьзбур яз акуна. Конкурсда иштиракун патал хкягъай 76 школьникдик зуни акатна. Чаз Москвадиз теклифна. Ана Россиядай ва СНГ-дин уьлквейрай атанвай 76 касдин арада сифтедай профессор Юрий Павловича ихтилат (собеседование) тухвана, жуьреба-жуьре суалар гана. Гуьгъуьнилай «Умники и Умницы» телевиденидай къалурзавай викторинада-передачада иштиракдайбур хкядай са шумуд тур тухвана. Анра гъалиб хьайи 24 касдик зуни акатна. Теоретикрин арада тухвай сифтегьан викторинада зун гъалиб хьана, за кьве «орден» къачуна. Гила зи вилик полуфинал ква. Ана Россиядай ва СНГ-дин маса уьлквейрай тир 16 школьникди иштиракда. Гъалиб хьайибур финалдиз акъатда.
-Дагъустандай авайди са вун тирни?
-Ваъ, чун 3 кас авай. Зун хьиз, «Умники и Умницы» викторинадин полуфиналдиз Махачкъалада шегьердай са гадани акъатнава.
-Нина, дуьз лагь, телевикторинадиз вун кьилди гьазур хьанани, тахьайтIа ваз маса ксари куьмекар ганани?
-Гьелбетда, жувни гзаф алахъзава. Школадин муаллимрин куьмекни екеди я. Мадни ихьтин са кардикай лугьун тавуна жедач. Викторинадин суалар гзаф четинбур я, гьавиляй заз герек литература алай вахтунда ДГУ-дин къецепатан чIаларин ва журналистикадин факультетра кIелзавай зи вах Наидади жагъурзава. Адани виликдай «Умники и Умницы» телевикторинада иштиракайди я. Идалайни гъейри, зи чIехи вах университетда отличница я, ада гзаф газетриз, журналриз макъалаярни кхьизва. Зун гьар са карда Наидадилай чешне къачуз алахъзава.
-Къенин девирда хуьруьн чкада яшамиш жезвай инсанриз масаниз физ хтунни са акьван регьят туш. Москвадиз физ ваз куьмекар гайи ксар хьанани?
-Дуьз я, Москвадиз фин- хтун патал пул герек я , тIимилни ваъ. Са шумуд юкъуз гьана яшамишни хьана кIанзава. РикI михьи, вилик физ, къени крар ийиз алахъзавайбуруз куьмекар гудай инсанарни авачиз туш. Заз «Умники и Умницы» телевикторинада иштиракун патал Москвадиз фидайла муниципальный райондин Кьил Имам Музамудинович Яралиева, РУО-дин начальник Жабраил Агъамирзоевич Асланова, Курхуьруьн поселенидин кьил Радик Ризванович Гьажалиева екез куьмекар гана. Идай за ва чи хзанди абуруз чухсагъул лугьузва.
-Нина, школада кIелунилай гъейри, вун алай вахтунда мад квел машгъул жезва?
-За лагьайвал, зун «Умники и Умницы» телевикторинадин полуфиналдиз акъатнава. Захъ гьанани гъалиб хьана, финалдиз экъечIдай фикир ава. Гьавиляй зун тарсарални гзаф алахъзава, алава яз художественный литературани гзаф кIелзава.
-Чи мурад вахъ агалкьунар хьун, вун телевикторинада финалдани гъалиб хьун я.
-Чухсагъул.
