Сулейман-Стальский муниципальный райондин кьилиз халкьдихъ рикI кузвай кьегьал хва Имам Музамудинович Яралиев атайдалай гуьгъуьниз гьам социально-экономический рекьерай, гьамни агьалийрин яшайишдинни дуланажагъдин шартIар хъсанарунин рекьерай районда еке дегишвилер кьиле фенвайди ва и кар давам жезвайди виридаз аквазва. Районда спортдин ва физкультурадин кIвалах вилик финизни кьетIен фикир гузва. Аялрихъни жаванрихъ галаз спортдин рекьяй кIвалах-завай 3 махсус школа кардик хьуни, анра саки 200 группада 2000-далай гзаф аялар футболдал, волейболдал, азаддиз кьуршахар кьунал, ушу-саньдадал, каратэдал, дзюдодал, самбодал, боксдал, армспортдал, кьезил атлетикадал ва спортдин маса жуьрейрал машгъул хьуни, районда республикадин дережадин турнирар, чемпионатар тухуни, райондин спортсменри чIехи турнирра агалкьунар къазанмишуни идан гьакъиндай ачухдиз шагьидвал ийизва. Вири и къайгъударвилер себеб яз Куьредин чилел спортдин рекьяй жуьреба-жуьре кукIушар муьтIуьгъарзавай спортсменрин сан йис-сандавай артух жезва. Винидихъ лагьанвай гафариз къуват гузвай мад са вакъиа и йикъарани хьана: Имам Музамудиновича вичин кабинетда спортдин международный классдин мастерар, пешекаррин арада дуьньядин чемпионар, райондин аялринни жаванрин дзюдодинни самбодин школадин тренерар-преподавателар тир Рамазан Къурбанов, Тельман Къурбанов, боксдай Россиядин спортдин мастервиле кандидат, 1-категориядин тренер, райондин аялринни жаванрин 1-нумрадин спортшколадин тренер-преподаватель Альберт Межидов, КIварчагърин юкьван школадин 9-классдин ученик, жаванрин арада боксдай 2009-йисан Дагъустан Республикадин чемпион Муххамед Гьуьсейнов, Кьасумхуьруьн 2-нумрадин юкьван школадин 11-классдин ученик, самбодай ва дзюдодай Дагъустан Республикадин чемпион Муслим Керимов ва и школадин выпускник, самбодай жаванрин арада республикадин чемпион Ислам Исрафилов кьабулна.
-Гьуьрметлу тренерар ва спортсменар! -лагьана гуьруьшдал Имам Музамудиновича,-Куьн кьабулунал, квез райондин вири агьалийрин, кьилди жуван патай спортда къазанмишнавай агалкьунар мубарак авунал зун шад я. Спортди сагълам несил, викIегь, четинвилер алудиз алакьдай ватандашар гьазуруниз куьмек гузва. И месэла Ватан, халкь патал мадни важиблудаз элкъвенва. Спортдихъ галаз алакъада авай кас обществодиз хийирлу жезвайди я. За къе теклифнавай тренерар тир Рамазана, Тельмана, Альберта чпин вири чирвилер, къуватар, тежриба жегьилар спортдиз мукьва авуниз, абур вердишаруниз бахшнава, и рекье агалкьунарни къазанмишзава. Заз и кардай квез ва и гуьруьшда иштиракзавай, чпи, гьеле жаванар ятIани, хейлин турнирра агалкьунар къазанмишнавай Муххамедаз, Муслимаз ва Исламаз чухсагъул лугьуз кIанзава. Чаз квекай къудратлу Россиядиз, республикадиз, гъвечIи ватан тир Куьредиз вафалу инсанар хьана кIанзава, куьн гьахьтинбур язва, язни амукьрай.
-Шадвал кваз, дамахдивди лугьуз жеда хьи, -давамарна Имам Музамудиновича, -куьревийри чеб кьегьал рухваяр тирди виликдайни успат авурди я, гилани ийизва. Мисаларни гъиз жеда. ИкI, Алим Селимовакай кьуршахар кьунай, Альберт Селимовакай боксдай дуьньядин чемпионар хьана. Къенин гуьруьшда иштиракзавай Рамазан ва Тельман Къурбановрини дуьньядин чемпионвилин тIварар къачуна. Чахъ Дагъустан Республикадин, Россиядин чемпионар, призерарни ава. Идахъ галаз сад хьиз, чпин бине СтIал Сулейманан райондай тир, райондин спортдин школаяр акьалтIарнавай, алай вахтунда Махачкъалада, Россиядин жуьреба-жуьре шегьерра ва масанра кIелун давамарзавай чи жегьилрини спортдин рекьяй гъалибвилер къазанмишзава. И кардал чун шад я.
Имам Музамудинович вичин рахунра районда спортдин ва физкультурадин кIвалах вилик тухун, жегьилриз спортдал машгъул жедай шартIар яратмишун патал тухузвай кIвалахдални гегьеншдиз акъвазна. Кьилди къачуртIа, ада къейд авурвал, Цмурдал генерал Мегьамед-Гьанифа Гьажибалаевич Шайдаеван тIварцIихъ галай физкультурадинни сагъламвал мягькемардай комплекс ачухна. Кьасумхуьрел цIийи жуьредин спортивный комплекс эцигдай чка тайинарнава. Аллагьди гайитIа, къведай йисуз анин хандакIарни яда. И кIвалах Госдумадин депутат, чи районэгьли Асанбуба Нуьдуьрбегович Нуьдуьрбегова хиве кьунва.
Курхуьрел спортдин Дворец эцигиз башламишнава. Хуьрера фадлай ишлемиш тийизвай идараяр гъвечIи спортзалриз элкъуьрун патал кIвалахар тухузва. Месела, Алкьвадрал и кIвалах акьалтIарнава. Кьулан СтIалдал, ЦIийи хуьре алай вахтунда ахьтин кIвалахар кьиле физва. Хъсан нетижаяр къалурзавай тренерриз, спортсменриз пулдин рекьяй куьмекар гузва. Гзаф чкайриз спортдин тадаракар, матар ва маса шейэр ахъайна. Са бязи хуьрера ачух майданар спортдин тадаракралди таъминарна, акъажунар тухудай майданар тешкилна. Районда гъвечIи хьтин спортдин дараматар эцигун патал пулдин такьатар чара авун патал серенжемар кьабулзава. Алатай йисарихъ галаз гекъигайла, къведай йисуз спортдин рекьиз пулунин такьатар пуд сеферда артухарда.
Гьа са вахтунда, Имам Музамудиновича къейд авурвал, гзаф муаллимри-преподавателри нетижалудаказ кIвалахзавач. Ахьтинбур чна кIвалахдилай алудда. ТIалабун я абурувай кIвалах авун, акъажунра гъалибвилер къазанмишдай аялар вердишарун, хъсан нетижаяр гун.
-Чи спортсменри спортдин гзаф жуьрейрай цIи хъсан нетижаяр къазанмишна,-давамарна Имам Музамудиновича. –Къведай йисуз чахъ районда Кьиблепатан Дагъустандин, гьатта республикадин дережадин чемпионатар, турнирар тухудай фикирни ава. Мадни, КIварчагърин жегьил боксерри къазанмишзавай агалкьунрини чак шадвал кутазва. Абуру КIварчагърин дере гьакъикъатдани къуччагърин дере тирди чпин гъалибвилералди субутзава. Чахъ инин боксдин филиал спортдин и жуьредай базовый школадиз элкъуьрдай фикирни ава.
-Квез чизва, Дагъустандал бандитри илитIай дяведа Россиядин Игитвилин тIварцIиз лайихлу хьайи Радим Халикьова Кьулан СтIалдал школада тербия къачуна, -лагьана вичин рахунрин эхирдай Имам Музамудиновича. –Герек атайла, гьар сад Ватан хуьз къарагъда. Амма заз куьне, гьуьрметлу жегьилар, викIегьвилер спортдин майданрал къалурна кIанзава. Куьредин спортсменри Европадин, дуьньядин, Олимпиададин медалар къачудай вахтарни алукьдайдахъ инанмишвал ийиз кIанзава заз.
Гуьгъуьнилай И.М. Яралиева, гуьруьшда иштиракай тренеррив ва спортсменрив, гьар са касдиз хуш, гуьгьуьл хкаждай келимаяр лугьуналди, муниципальный райондин Гьуьрметдин грамотаяр, пулдин пишкешар вахкана.
Ачух къайдада, сада-садаз чпин фикирар лугьуз кьиле фейи гуьруьшдал Рамазан ва Тельман Къурбановри, Альберт Межидова чеб кьабулунай, хуш келимаяр лугьунай Имам Музамудиновичаз чухсагъул лагьана, чпин тербиячийрин агалкьунрикай гегьеншдиз суьгьбетна.
-Райондин руководстводи спортдин кIвалахдиз еке фикир гуни, спортсменар чемпионатризни турнирриз финин карда пулунин такьатар чара авуни чун, тренерар, мадни бегьерлувилелди кIвалах авуниз, спортсменар мадни чIехи агалкьунар къазанмишуниз мажбурзава, -лагьана дуьньядин чемпион, тренер Рамазан Къурбанова. - И кар патал чна чалишмишвални ийида.
Тренерри чпин рахунра са шумуд теклифни гъана. ИкI, Р.Къурбанова лагьайвал, адан фикирдалди Кьасумхуьрел муниципальный райондин Кьилин Кубок патал республикадин дережада дзюдодай турнир тухванайтIа ва районда спортдин интернат ачухнайтIа, хъсан кар жедай.
И теклифрин тереф И.М.Яралиева хвена, пулунин такьатриз килигун лазим тирди къейдна.
Тренер-преподаватель А.Межидова КIварчагъа боксдай республиканский турнир тухунин теклиф гъана.
Имам Музамудиновича и теклиф-дални разивал къалурна.
-Къенин чи гуьруьшмишвал гъалибвилерин сифте я, умудзава абур чахъ мадни жеда, -тренерризни спортсменриз мад сеферда чухсагъул лугьуналди, къейдна эхирдай Имам Музамудиновича.
