ЦIийи поселокдин юкьван школада кIелзавай йисара Разаханов Нисредина тренер Гьажибалаев Гьажибаладин гъилик азаддиз кьуршахар кьунай вердишвилер къачуз башламишнай. Са шумудра ада районда ва Кьиблепатан Дагъустанда тухвай хейлин турнирра кIвенкIвечи чкаяр кьунай. 2007-йисуз Н. Разаханов Адыгейдин государстводин университетдин юридический факультетдик экечIна. Ина спортдал рикI алай дагъви гада самбодал ва ушудал машгъул хьунал элячIна, спортдин и жуьрейрай Адыгея Республикада ва Кьиблепатан Федеральный округда тухвай чемпионатрани турнирра гъалибвилер къачуна.
Мукьвара Нисредина Майкоп шегьерда ушу-саньшоудай кьиле фейи Россиядин чемпионатда иштиракна. Спортдин и жуьредин шуайцзяо разделдай тухвай акъажунра 68 килограммдин заланвиляй 2-чка кьуна. Адаз гимишдин медаль ва Россиядин ушудин Федерациядин Гьуьрметдин грамота гана.
Чаз малум хьайивал, Н. Разаханов ушу-саньшоудай Россиядин хкянавай командадик кутунва. Адан составда аваз Нисредина алай йисан мартдин вацра спортдин и жуьредай Италияда кьиле фидай Европадин чемпионатда иштиракда. Гьанани кьегьал лезги хцихъ агалкьунар хьун чи мурад я.
Герейханован 1-нумрадин юкьван школадин муаллимрин ва техработникрин коллективди играми диде кечмиш хьунихъ галаз алакъалу яз Сафаралиеврин хзанриз, абурун мукьва-кьилийриз башсагълугъвал гузва.
ЦIийихуьруьн юкьван школадин муаллимрин ва техработникрин коллективди играми вах Зиябат кечмиш хьунихъ галаз алакъалу яз Чубанова Алминадиз, адан хзандиз ва мукьва-кьилийриз башсагълугъвал гузва.